Nehemiya 2 - Kutsingken Ira Rimam ti Saen Kyag

Nehemiya Ru Yi Urushelima

¹ Uwae ishaen Nisan, yi kusang ti rikom ti Aritaserke nae ukwe, usir iki, ame sa ambyi anam ka na wu. Awu sae ji-wu ame te uwe ti yir kyikyi usir iki be.

² Ama awu rang m baa, “Imi ti nde kutxuwe-fu yir kyikyi? Ayi si-yi kicaeb ti afu nae be, ayi tatso baa, utob-fu na nae-wu riben be.” Ira-wu ayine fwer m ijwe.

³ Ama ame cwe wu unju baa, “Unyang-fu ā kora ru yi uwe, ukwe! Ame u tsen utob rimang ti uten ti a nji abitse-m atang mbub si riben, ama meme ifu ukoh-wu twen mbub tag pu yi.”

⁴ Ukwe rang m baa, “Imi ti afu ku sha ti m na nde na fu?” Tiri ame jwam itijwam uwog Rimam ti ta apupwen,

⁵ ama u ri te ukwe baa, “Asiti ame a tu uwe tinyang uwog-fu, ukwe, nda m ti m kafe ru yi uten ti Yawuda, uten ti a nji abitse-m atang, ikyaen ti m ka mbye shem wu.”

⁶ Ukwe te uwa-wu ti som fer te wu cwe itijwam-m. Awu rang m kiye ti ame u ru, ba kwer ti kiye ti ame u kafe ba. Ama ame ri te wu.

⁷ Tiri ame jwam wu ti wu na bae na m kutsingken ti m na u sa ka na ande ti ta risu iyenkyab uten ti ukunn uyinn ti Yufiretis ikyaen ti aba na cwe na m ti m na nyatsa uwae uten Yawuda.

⁸ Cwucwo ame jwam wu ti wu na nda kyi m kutsingken iki ti m na u sa ka na Asaf, unde ti ku nungkyi kushwong ukwe, ikyaen ti wu na pu na m ituku ti a ku pu ce sang ifu ukoh ti pakob kusog Rimam tiyang, ti meme ifu ukoh ti pakob uten wu, fa ti kusog ti ame u nae atang. Ukwe cwe, u pu na m meme iken ti ame jwam ikyaen ti, kujwo tinyang na Rimam-m ta risu m.

⁹ Ukwe tom Akwerika iki ti akyirten iki ti ku tso kakum putsa m, ama ame ye ikyi ru yi ukunn uyinn ti usir kujwo ureb. Atang ame pu atsingken ti ukwe bae na m na ande ti uwe ba.

¹⁰ Amaa, kiye ti Sanbalati, unde ti uten ti Beti Horon, ti Tobiya, unde ti uwe na iyenkyab uten ti Amon, fxen baa unde iki na ba pu-wu ti wu na u kyae nyang uten Isirela, aba nde mbeb utob si-yi ti ti ri be.

Nehemiya Baen Ukoh Urushelima

¹¹ Tiri ame ru ka sang Urushelima, u ka som atang ka usir ita.

¹² Tiri, yi ukatitang ame nwunn, u pu ande pang ru ye tetso. Ame ri te-m unde iki iken ti Rimam tso m ti m na ba nde yi Urushelima be. Ati ru ye te nyang ikyinnsu ti ame tso amam.

¹³ Ayi si utitang bwe ti ame ya uten wu ta u ru ye Ufu Kubxab, u ka nyatsa Rubun Mbuku, ba fu ru ye Ufu Kanjag. Ti ame kyang ku ru, ame sae tag ukoh uten wu ti mbub si riben, ti ifu-yi ti urwa twen mbub tag meme.

¹⁴ Tiri ame nwunn pu tsa ru yi Ufu Rubung, u ka ru Kukwae Ambyi Ukwe. Amaa, ikyinnsu ti ame site tu-wu fengo ti awu nyatsa acwupwe yi ti kyaen si be.

¹⁵ Ikyaen yine, ame kafe kakum-m putsa si yi kubxab ti Kidiron u baen tag ukoh uten wu ti mbub si tag riben ne. Ti utitang wu ame kafe putsa ti fengo ti ame ru ye atang sang ti yi uwae uten.

¹⁶ Ande ti uwe uten wu nung-ba uwog ti ame ka atang, ti iken ti ame ka nde be, ikyaen ti, ame ri-m ira iki te ande-m Mbayawuda, ti akwen Rimam, ti ande ti uwe, ti ande tiyang tiyang, ti ande ti tsitsi ti u nde wande yi khika be.

¹⁷ Tiri ame ri te ba baa, “Ni sae rikaen ti ati ta uwae-yi ne. Urushelima mbub si pu wu, ifu ukoh-wu twen mbub tag pu yi. Ni ba ti ti mbye shem ukoh uten wu ti ayi ā sa ru ye ti rukwae.”

¹⁸ Ame ri te ba fengo ti kujwo Rimam ta risu-m, ku ndeya m, fa ti ira ti Ukwe ri te m. Ama aba cwe tso baa, “Een. Ti nwunn ti ti ye wande yi ti ti nde!”

¹⁹ Ama kiye ti Sanbalati, ti Tobiya, ti urae Arab iki ti rinyi-wu si Geshem, fxen iken ti ati ku myae ti ti u nde, aba skaen ti ikyaen u txir ti itxir baa, “Imi ti ani ku nde ne? Ani ku sha ti ni u bom risu te ukwe a.”

²⁰ Ama ame cwe ba unju baa, “Rimam ti apupwen u ndeya ti, ti ti u nde tu wande yi. Ati si apyi-wu, ati u bag itimbye yi. Amaa ani si-ni ti ira iki uwae uten ti Urushelima be, ko ayi ira na uten, ko ira na Rimam.”