Nehemiya 13 - Kutsingken Ira Rimam ti Saen Kyag

Itikanta ti Ande ti Rikyen

¹ Usir wu a nung putsa kutsingken na Musa na anyisu Isirela, ama u ba nungye baa a na cwe na-ba urae Amon ti urae Mowab ti a na ren risu te ba yi Rimam ti fen be.

² Ikyaen imi a kyang te-ba anyisu Isirela kiye ti a ru ye Ijib be. A byang anyisu Isirela wuci ti iken ti ngwa. A yae Balam ti wu na ba faen ba kufaen. Amaa Rimam sa kufaen yi kafe ti tinyang.

³ Kiye ti ande fxen mam ira ayine, a kan ijwe ti ande ti rikyen.

⁴ Ti uwe-yi Eliyashib, kukwen iki ti ta risu asog ti a ku pu wuci tsi atang kusog Rimam, si te ure te Tobiya.

⁵ Awu sa kusog iki na Tobiya, ti si kusog tiyang ti a ku pu umung wuci ti a ku pu na Rimam tsi atang, fa ti akang frankisi ti ku nung kupi, ti Kinjo uwae rijwe na awum ti ambyi anam ti kindob olifi tsi atang. Iken yine si iken ti icwe ri baa a na pu yi na anyisu Lawi ti ande ti ku yang akyang, ti ande ti ku nungkyi ifu kusog, fa ti iken ti a byir ikyaen akwen.

⁶ Kiye ti a ku nde iken yine ame ta-m Urushelima be. Ame kafe ru pu m ti uwog Ukwe Aritaserke, ukwe Babila, ti uwae kusang ti rijweta asu ifaen ti awu si ukwe. Isim kiye iki ame jwam Ukwe, ama awu cwe na m ti m na kafe ru ti Urushelima.

⁷ Ti ame ka sang atang, ame nungye ikentitibi ti Eliyashib nde, nee ti awu sa uwae kusog iki uwae asog Rimam na Tobiya.

⁸ Ame tso rinae timambe u pu meme isu Tobiya jwunn ru ye ise.

⁹ Ame nda unju baa, aba na jwosaen kusog wu, ama ame pu isu ti a ku nde wande te yi kusog Rimam kafe sang ti atang, fa ti umung wuci ti a ku pu na Rimam ti akang frankisi yi.

¹⁰ Ame nungye baa, a na ku pu wuci na-ba anyisu Lawi ti ande ti ku yang akyang cwucwo be, ama ande bane ter ya wande yi ta u kafe ru ti risaen afang-ba.

¹¹ Tiri ame fwan ande ti uwe ba ira, u rang ba baa, “Imi ti nde né ani sae ru kusog Rimam?” Ama ame kunn anyisu Lawi ti ande ti ku yang akyang kafe ba ti unju wande-ba.

¹² Tiri ande ti Yawuda meme pu kinjo uwae rijwe na wuci-ba, ambyi anam-ba, ti kindob-ba bá yi kusog ti a ku pu isu tsi atang.

¹³ Ame pu ande tsi risu asog yi ti a ku pu isu tsi atang ne. Ande ba si Shelemiya kukwen, Zadoki unde ti ku kwen na ande icwe, ti Pedaya umbae Lawi. Unde ti ku ndeya ba si Hanan, umbae Zakur, umbae Mataniya. A nung ba ti a na si ande ti kubenti. Ama a nda ba ti a na kan iken na ameinja-ba.

¹⁴ “Tangsom te m, Rimam! Munnji-fu te wande ti tinyang ti ame nde yi kusog-fu, ti itifen ti ame ku fen fu ko kiye titini be.”

¹⁵ Uwae usir yi ti wur ru ru ame sae ande ti Yawuda ti ku kam ambyi anam usir ikyinn. Aba ku pu awum-ba, u ku nda ikyinnsu su yi usir ikyinn. Cwucwo aba ku su ambyi anam ti awaen-yi, ti awaen kututung, ti isu ti tsotso sang ba Urushelima usir ikyinn. Ama ame fwa ba kusen baa a na jabci-ba wuci usir ikyinn cwucwo be.

¹⁶ Ande ti Tiire ti som uwae uten ti Urushelima su iwag ti isu ti tsotso ba jabci na ande ti Yawuda uwae uten wu.

¹⁷ Ame fwan ande ti uwe na Yawuda kubyag ama u ri te ba baa, “Ani nde rimang ku nde itso ira ti itibi yine ku ye su-ni usir ikyinn be?

¹⁸ Ayine si-yi iken ti abitse-ni ti kute nde nee ayi shir rinae Rimam ba risu-ti uwae uten wune be a. Tine ani nda rinae Rimam ko ku fufa risu Isirela ikyaen ti ani ye su-ni usir ikyinn be.”

¹⁹ Ureb na riben ikyinn, ame ri te ba ti a na cwunnkyi ifu ti ku sang Urushelima, ama ti a na mbub-ba ayi be, se usir ikyinn a nyaetsa pu-yi. Ikyaen ayine ame pu ariki ti ku nde wande te m tsi kir ifu yi, mbwe ti isu iki na sang-yi uwae uten usir ikyinn be.

²⁰ Ka pu-yi atsepu ifaen ti ande ti ku kafe ajwo ti ande ti ku jabci iken ti itsotso nae ise Urushelima.

²¹ Ama ame fwan ba kubyag u rang ba baa, “Ikyaen imi ti ani nae ise pu icwe fam? Ani a nde ahan cwucwo, kujwo-m a ye ni, ani u nung.” Sa kiye wu ru yi uwe aba ba-ba usir ikyinn cwucwo be.

²² Ame nda anyisu Lawi icwe baa, a na jwosaen ijwe-ba ti a na tsikyi ifu, mbwe ti a na nda Usir Ikyinn kuko. Rimam! Tangsom te m ikyaen ayine, ti sae m te ayibrisi uwae ure-fu ti tsi kukunn.

²³ Cwucwo kiye wu, ame sae ande ti Yawuda iki mbe anda ru ye Ashidod, ti Amon ti Mowab.

²⁴ Ikyaen ayine, ariki uwae anyisu-ba ku ri nyáng unju Ashidod ko unju iten ti tsitsi, ama ku ri tu-ba unju uten Mbayawuda be.

²⁵ Ame fwan ba kubyag, ama u faen ba kufaen, u byinn ariki uwae-ba iken, ama u shir ba kutong. Ame nda ba yer unju te Rimam baa, “Ni pu anyisu-ni baen-ni anyisu-ba cwucwo be. Ni mbe-ni anyisu-ba be ama.

²⁶ Ayi si-yi ikyaen anda ti rikyen ayine ti Solomon Ukwe na Isirela mbe né awu nde ikentitibi be a. Uwae akwe meme ukwe iki ta-wu ti pangma awu be. Rimam si te ure te wu timambe, ama u sa wu nae ukwe na Isirela. Ko ti ayi si ahan, anda ti rikyen nda wu nde ikentitibi.

²⁷ Tine, ani ku sha ti ti na ba fxen ni tiri, ti ti na nde ikentitibi uwog Rimam-ti, ama u mbe-ti anda ti rikyen tiri a. Iyee.”

²⁸ Kinjo uwae anyisu Jehoyida, ti si umbae Eliyashib kukwen tiyang, mbe umbae Sanbalati urae Horoni. Ikyaen ayine ame rwae wu ru uwe-m.

²⁹ Rimam-m! Tangsom te iken ti aba nde. Ikyaen ti, aba ye wande akwen yi nde mbeb pu ba, aba ye su-ba unju ti yer akwen ti anyisu Lawi be.

³⁰ Ikyaen ayine ame jwosaen akwen ti anyisu Lawi, ama u ri te ba baa, a na ru yi uwe ti wande tiri.

³¹ Ama ame sha na ba ituku ikyaen iken ti twen ko kiye titini, ti usen wuci. “Rimam-me! Tangsom te m ti fu tso m kutxuwe ti tinyang-fu.”