Nehemiya 1 - Kutsingken Ira Rimam ti Saen Kyag

Nehemiya Sa Uwae Tsi Risu Urushelima

¹ Ayine si ira Nehemiya umbae Hakaliya. Yi ishaen na Kisileb yi kusang ti rikom ti Aritaserke si ukwe na Pasiya, ame Nehemiya ta Susa uten tiyang na uten wu.

² Hanani, kinjo uwae ameinja-m ti ta Yawuda, ba te kumbub na ameinja iki. Ame rang ba ira risu ameinja-ti Mbaibrane ti a ye ba apyi ba ike, ama aba kafe ru pu ba ti yi Urushelima, ti ira risu kujimshwur Urushelima.

³ Aba ri te m baa, “Ande ti ter nwang ti unyang ti kafe ba yi uwae uten, ta uwae rikaen ti rikwae ti wae ti skeb risu-ba. Cwucwo ati mbye tso-ti ukoh Urushelima ti kyaensi riben khika be. Meme ifu ukoh yi ti a twen mbub si riben, kú rubwen bwe.”

⁴ Ti ame fxen tag ira yine, ame som riben u jwub ira. Ame jwub ira yi uwae usir yang-yi, u tsikunn ti ku cwe unju ku jwam Rimam ti apupwen.

⁵ Ame tong unju uwog Rimam baa, “Yaweh Rimam ti ta apupwen, afu ta te kuko, ama ku nda ande ikyenricwu. Afu tsi kukunn ti ku kumunn unju ti yer-fu te ande ti ye ure te fu u ku nae risu riben na fu.

⁶ Pu ayib sae m Yaweh. Naa atong ti fxen itijwam ti ame ku jwam usirtaen ti utitang, ikyaen apyi-fu anyisu Isirela. Ame ku ri tso baa, ati anyisu Isirela na nde pu ti ikentitibi. Ame ti kununn itse-m meme nde pu ti ikentitibi.

⁷ Ati nde ikentitibi ti beb timambe uwog-fu. Ati ye su-ti kusen ti fwa ti icwe, ti iken ti kwen ti afu nda Musa be.

⁸ Tine, tangsom te ira ti afu ri te upyi-fu Musa baa, ‘Asiti ani anyisu Isirela a ye su-ni unju ti yer-ni te m be, ame u byinn ni yaenshag kyife uwae uten na ande ti tsitsi meme.

⁹ Amaa, asiti ani a kafe uwe ba tu m, u nae risu riben te icwe-m ama nde yi, ame u byir ni kafe ba ti yi uten ti ame tsab tsi ti a na fen m atang, ko ti ani a shag kyife ka furu yi fuyen utense meme.’

¹⁰ “Aba si apyi-fu, u si ande-fu. Afu ti nwangru ba yi uwae kuko ti ribom ti ana-fu ti ko timambe.

¹¹ Tine, naa atong ti fxen itijwam-m, ti itijwam na meme apyi-fu ti tsitsi ti ku tsen utob kiye ti aba a ku teb rinyi-fu. Nda m ti m u tu kutxuwe tinyang uwog ukwe yaka ne ti ukwe ā sae m ti ayibrisi.” Yi uwae kiye wune, ame ti si unde ti ku ye iken ti ngwa na ukwe.