Mbaibrane 7 - Kutsingken Ira Rimam ti Saen Kyag

Melkizedeg Kukwen Rimam ti Kucang

¹ Melkizedeg wune, ti si ukwe uten Salem, u si kukwen tiyang na Rimam ti skeb titag, kyangte Ibrahim fengo kiye ti Ibrahim ci rika risu abikwe iki, u kafe ru ku ba. Melkizedeg wae itinyang na wu.

² Ama Ibrahim sa ruye kinjo uwae iken rijwe na patag iken ti awu site, na wu. Umbyi rinyi Melkizedeg ti tawe baa, “Ukwe kubenti.” Ti fa atang awu si Ukwe Salem, ti imbyi-yi si Ukwe Kujimshwur.

³ Awu si-wu te itse, ko iya, ko rishi be, awu site-wu kucangtsi ko ricwunnkyi be. Awu si pangma Umbae Rimam, u si kukwen ti tsikukunn.

⁴ Ni nung itso rurob ti unde wune site, ti nda Ibrahim, itsekam-ti, pu na wu iken kinjo uwae rijwe na meme isu ti awu ci uwog rika.

⁵ Aba Mbalawi ti si akwen Rimam, a nda ba unju uwae icwe ti a na mbe iken kinjo uwae rijwe uwog ameinja-ba ti si sí rishi Ibrahim.

⁶ Amaa, unde wune, Melkizedeg, ti si-wu rishi Mbalawi be, mbe kinjo uwae iken rijwe ajwo Ibrahim, u wae itinyang na Ibrahim, ti si unde ti Rimam yer unju ne te wu.

⁷ Ishaen ti shaen ta-yi atang be ti unde ti siskeb ti ku wae ira na itikiyib.

⁸ Yi a si ira Mbalawi, ayi si ande ti ku cwucwu ti ku mbe kinjo uwae iken rijwe, aba akwen Rimam. Yi fengo ti ifaen ama, Melkizedeg, a ri ira risu-wu baa, awu na ku cwu-wu cwu be.

⁹ Unde u ndeye ti u ri baa, Lawi, ti si itsekam ande ti ku mbe kinjo uwae iken rijwe, na pae kinjo uwae rijwe ama na Melkizedeg yi fengo na Ibrahim.

¹⁰ Ikyaen ti, kiye ti Melkizedeg tu Ibrahim, u mbe iken kinjo uwae rijwe uwog-wu, akyi Lawi ta pu yi uwae itsekam-wu Ibrahim.

¹¹ Mbaibrane tu Icwe Musa yi fengo na akwen Rimam, aba Mbalawi. Á baa, wande akwen ti Mbalawi ku nde na nyang pu yi, imi ti ú sa ba ti itso kukwen iki u nwunn, u fikyi kufxen Melkizedeg, ti si-yi rishi Aruna be.

¹² Asiti itikafe a ta atang yi wande akwen, itikafe u ta kang atang ama yi icwe.

¹³ Kukwen wu ti a ku ri ira yine risu-wu, ru ye kumyaem ti uriki uwae-ba nde ji-wu wande akwen be.

¹⁴ Ayi nae paenine baa, Itsekuru-ti na ru ye kumyaem Yawuda ti Musa ri-wu ira akwen risu-ba be.

Ati Site Kukwen ti si Pangma Melkizedeg

¹⁵ Itikafe icwe saen siskeb asiti ati a nung baa kukwen tishe na nwunn pu wu ti putsa kufxen Melkizedeg.

¹⁶ Kukwen wune, i si-yi ti awu ru ye yi rishi kukwen iki be. Iyee, awu si kukwen ikyaen ti, awu site kuko ti wu u som usom ti itsikukunn-yi ta-yi be.

¹⁷ A ri ira risu-wu baa, “Afu si kukwen ti tsikukunn itso na Melkizedeg.”

¹⁸ Ira yi ta re. Ti tawe, a sa icwe ti kucang tsi iyen ikyaen ti, awu site-wu itindeya be, u kpag-wu be.

¹⁹ Icwe yi sa ba-yi itikyaenyang iki be. Amaa, a kyae fengo iki ti nyang siskeb, ti ati u sa uwae tsi atang, ti tae ti ba fer Rimam.

²⁰ A ye fengo tishe yine tsi ti uben ti ben. Itaen ti sang wande akwen kucang, a ben-ba uben be.

²¹ Amaa, ana Yesu, a pu wu sang wande ti uben ti ben yi unju Rimam, ti ri ira risu-wu baa, “Itsekuru ben uben, ama u fi-wu unju be, ‘Afu si kukwen ti tsikukunn.’ ”

²² Ayine sa na Yesu, awu si unde ti kwa kujwo risu unju ti yer ti nyang skeb awu ti tikyi wu.

²³ Akwen ti kucang jwúnn, ikyaen ti, iticwu byangkyi ba, aba ku nde wande ka-ba uwe be.

²⁴ Amaa, Yesu ku nde wande-wu na kukwen ru fife yi uwe ikyaen ti, awu ku cwu-wu cwu be.

²⁵ Ikyaen yine, ko kiye titini, awu u ndetu ti wu nwangru meme ande ti a rutsa uwog-wu ba uwe Rimam, ikyaen ti, awu tsikunn ku jwam itijwam ikyaen-ba.

²⁶ Ayi kpang atang ti, ti ati site itso kukwen tiyang ne, ti som sisaen, u site-wu riraen ko ajib be, u txi ra te ande ti ku nde ikentitibi, u site rurob ti skeb meme iken ti apupwen.

²⁷ Awu si-wu pangma akwen tiyang ti kucang ti ku twen ikentitwen ti usir usir be. Aba ku twen ana risu-ba, titawe m ba twen ana ande ti tsitsi. Awu nde yi kipaen kinjo amam kiye ti awu sa risu-wu na Rimam.

²⁸ Icwe nda riyae ti a u tsab ande ti pu iskin, ti a nde wande akwen tiyang. Amaa, yi unju ti yer Rimam ti ba isim, ti awu yir bom ti uben ti ben, Rimam tsab Umbae-wu, ti tsi sisaen, ti u ndetu tag iken tsi yiyer.