Mbaibrane 4 - Kutsingken Ira Rimam ti Saen Kyag

Unyang ti Pu Si Ikyaen Ande ti Ru Kubenti

¹ “Ikyaen yine, unju ti yer na Rimam risu itisang uwog unyang ti pu-wu, tsi ti atang. Ti kyen ikyenricwu mbwe ti unde iki uwae-ti ā shanum-wu itisang uwog unyang ti pu Rimam be.

² Ira tinyang ba uwog-ti pangma ti ayi ka uwog-ba. Amaa, ira yi ti aba fxen ndeya-yi aba be, ikyaen ti, a paenmbe-ba ira yi ti a fxen te uwae kinjo be.”

³ “Ati ande ti ru pu ti uwae kinjo, ati ti si ande ti u sang unyang ti pu wune, pangma ti awu ri baa, ‘Pangma ti ame ben uben uwae rinae-m, aba u sang-ba uwae unyang ti pu-m be.’ ” Ko ti wande-wu mamtag pu yi, ti ti a tā imbyi utense.

⁴ Uwog iki, awu ri pu-wu ira risu usir ti itsongfaen baa, “Usir ti itsongfaen, Rimam pu unyang uwae wande-wu meme.”

⁵ Ama uwog wune, awu ri kyi cwucwo baa, “Aba u sang-ba uwog unyang ti pu-m be.”

⁶ Riyae unyang ti pu wune ta ti atang ikyaen ande ti tsi utob, amaa, ande ti fxen kutsa unyang ti pu wu kucang, sang-ba be ikyaen risu ti kpag.

⁷ Ikyaen yine, isim asang yang-yi wur ru, awu sa usir iki tsi baa, “Yaka” u ri ruye unju Dawuda uwae ira ti ati ri mam pu ti baa, “Yaka ne, asiti ani a fxen afxenjwin-wu, ni yirkyi-ni utob-ni be.”

⁸ Á baa, Jeshuwa na nda pu wu aba unyang ti pu, Rimam ú ri-wu ira risu usir iki cwucwo be.

⁹ Ayi ku tatso baa, unyang ti pu ta ti atang ikyaen ande Rimam ti pangma unyang ti pu na usir ikyinn.

¹⁰ Unde titini ti a sang ba pu wu uwae unyang ti pu ana Rimam, awu u pu unyang ti wande-wu ti ti nde, pangma ti Rimam nde.

¹¹ Ikyaen yine, ameinja, unde titini uwae-ti ā kwab ti awu tu unyang ti pu na Rimam wune, ikyaen ti unde iki uwae-ti ā nde-wu iken ti kpag risu pangma ti abitse-ti nde, u jwunnsi be.

¹² Ikyaen ti, ira na Rimam site unyang u ku nde wande. Ayi cin skeb pu yi unju kisum wen, u ku sang fife yi riyaen utob unde uwog ti kusung ti unyang rentso atang, ka kwer ti itum akub. Ayi ku nung tag ira ti kab na unde, ti meme iken ti awu ku myae uwae utob-wu.

¹³ Iken iki ta-yi utense wune ti si iken ti kitam uwe Rimam be. Meme iken nae ise paenine uwe-wu. Ati meme u tsi uwe-wu u fxirtso iken ti ati nde.

Yesu Kristi Si Kukwen-ti

¹⁴ Ikyaen yine, ti ati site kukwen tiyang ti tso pu wu uwog Rimam apupwen akwen, awu Yesu Kristi Umbae Rimam, ti ye su uwae kinjo-ti ting ting.

¹⁵ Awu kukwen tiyang-ti wune si unde ti site ayibrisi risu-ti. Awu nung pu wu uwog ti ati pù iskin atang ti awu u ndeya ti, ikyaen ti, kiye ti awu ta utense, a myae wu myae pangma ti a ku myae ti ama. Amaa, ana-wu, kiye ti a myae wu, awu jwunnsi-wu uwae ikentitibi be.

¹⁶ Ikyaen yine, ti kyen-ti ikyenricwu be. Ti bom utob u ko fer kutxom kujwokwe Rimam-ti ti site ayibrisi, ti ti ba paembe ayibrisi ti rinyangwae-wu kiye ti ati a shanum iken.