Mbaibrane 12 - Kutsingken Ira Rimam ti Saen Kyag

Fengo ti Rimam ku Kwen na Anyisu-wu

¹ Somtsa yi uwae kinjo ande bane ti pakob ti ti rikob, ti tur meme iken ti ku rob ti ijwe tika. Ti fxae ikentitibi ti ku shir ti ti isim. Ti ti ru yi uwe uwae inyae ti ter, ti utob ti ye ka sang ricwunnkyi.

² Ti pu ayib cwutsa Yesu ti si ipab ti itikumunn uwae kinjo-ti, awu nung utob ti tsen ti tsi ku ji wu uwe, u ye utob, u cwu ricwu risu kutuku ti cice, u saeru rukwae ti wae yi, u ka som kujwo rici na kutxom ukwe Rimam.

³ Ni tangsom te Yesu, awu ti ye utob uwae rikaen kujwo ande titibi, ikyaen ti ani ā num-ni ijwe u pucwu be.

⁴ Uwae rika ti ani ku ta te ikentitibi, ani ba ye-ni kiye ti ani sa anying-ni yaen mbub khika be.

⁵ Ani munnji pu ni ira ti Rimam ri a? Awu ri kpag ni utob u kunn ni baa, anyisu-wu. A bae uwae kutsingken baa, “Umbae-m, asiti Itsekuru a byinn fu kimbab, sa utob-fu tsi atang. Awu a shir fu kutong, yer-fu anying utob be.

⁶ Ayi si unde ti Itsekuru ye ure te wu ti awu ku byinn wu kimbab. Unde titini ti awu a paembe, unde wu ti u si umbae-wu, awu ku shir wu kutong.”

⁷ Ayi si ikyaen kutong ti shir ti afu u ye utob. Uwog Rimam, ani si anyisu-wu. Umbae iki ta atang ti itse-wu ku byinn awu kimbab be a.

⁸ Asiti a byinn-ba ani kimbab risu ikentitibi-ni pangma anyisu ti tsitsi be, ani si anyisu apaen, u si-ni anyisu ti kununn be.

⁹ Ati site abitse-ti ana rimenn ijwe ti ku byinn ti kimbab, ati ku kyen ba. Itse-ti na Kusung ama re? Ati u kyen-ti ikyenricwu itse-ti na kusung u tu unyang ti tsi kukunn be a?

¹⁰ Abitse-ti ku byinn ti kimbab yi uwae kiye pang utense ike, yi fengo ti ku nyang uwae-ba. Amaa, ana Rimam, awu ku byinn ti kimbab ikyaen ti wu kyaenyang ti nyang, ti ati ā som usom ti saen kyag pangma awu.

¹¹ Kiye ti a ku byinn unde kimbab, ayi ku cicaeb, u si-yi iken ti ku tsen utob be. Amaa, isim-yi, ayi u waen awaen ti pang atang uwog unde ti cwe, u paembe itikwen uwae kimbab ti byinn yi.

A ku Fwa ti Kusen

¹² Ikyaen yine, ni ndabta ajwo-ni ti kyensi rikom, ti afxen-ni ti bom-yi riben be.

¹³ Ni kyaenyang fengo ni, ti afxen-ni ā fur caeb-yi be, amaa, ayi ā bubom.

¹⁴ Ni kwab ti ni som usom kujimshwur te ande meme, ti usom ti sisaen. Ayi a si-yi te usom ti sisaen be, unde u nung-wu uwe Itsekuru be.

¹⁵ Ni nung nyinyang ti unde iki ā shanum-wu rinyangwae Rimam be. Ama ti ira titibi iki ā nwunn-yi kutampwa-ni ti u ndembeb ande yang-ba be.

¹⁶ Unde iki ā som-wu usom amae te iyag ti nae pangma ti Esuwa nde be. Awu sam rimenn, u sa undufu-wu jabci ikyaen wuci na kiskinn kinjo amam.

¹⁷ Isim-yi, awu sha ti aten ayib ti wu mbe itinyang uwog itse-wu, ayi nde-yi cwucwo be. Ko ti awu sha riyae itikyaenyang, awu tu-wu be.

¹⁸ Ani ka-ni uwog rikwen ti a ku tekunn wu, pangma ti ande Isirela nde yi Sinai be. Urwa ku cwe atang, uwog byi tang tang, imam ku taen, itikyib ti kpakang nwunn.

¹⁹ A fxen kutumu ku kunn, ti afxenjwin ti ribom ti ku tso, ama ande ti fxen ira yi ikyaen ikyenricwu, jwam Rimam baa, awu na ri wu ira te ba cwucwo be.

²⁰ Kusen ti Rimam fa-ba, bom timambe. Ko ayi a si ibye ti a tekunn rikwèn wu, a jwunn wen-wu te atxom.

²¹ Iken ti aba nung uwog wune nda ba ikyenricwu timambe. Musa ti risu-wu ri baa, “Ijwe-m ku fufwer ku kunn ku tig tig tig.”

²² Amaa, ana ni, ani ba pu ni umbyi Rikwen Siyon, ti si uten Rimam, awu ti site unyang. Ayi si Urushelima ti apupwen, uwog ti ujwunn atom Rimam ti apupwen ku shwam ashwu atang.

²³ Ani sang pu ni uwae itifunn anyisu rifen Rimam, ti a bae rinyi-ba uwae kutsingken unyang ti apupwen. Ani ba pu ni uwog Rimam, awu ti u pwen ande meme rikwen. Ani sangfa pu ni asung ande ti kubenti, ti Rimam kyae nyang pu utob-ba.

²⁴ Ani ba pu ni uwog Yesu, ti si unde ti tsi kutanpwa na unju ti yer ti tishe, ti ani ba uwog anying-wu, ti a pu sam sam sam. Ayi si anying ti ku ri ira ti nyang skeb ana Abila.

²⁵ Nung! Ni pyir-ni ira unde wu ti ku ri ira yine te ni be. Ni shaen-ni ishaen be. Ande ba ti pyir atom Rimam ti ri ira te ba uwae utense ike, a nwang-ba be. Asiti ati a pyir ira atom ti si apupwen ba ati u nwang rimang?

²⁶ Kiye wu ti kucang, afxenjwin-wu nda utense kyi ijwe tang tang. Tine awu yer unju baa, “Ame u kyi-m utense amam be, fa ti apupwen meme.”

²⁷ Ira ti awu ri baa “cwucwo” tatso baa, kiye na ku ba ti patag iken ti a kyae uwae utense ne na u kyi ijwe, u fen ru, ama iken ti ku kyi-yi kyi be amam ti u tsi kukunn.

²⁸ Ikyaen yine, ti nde fxaefa ikyaen ti ati paembe pu ti kujwokwe ti ku kyi-wu kyi be, ti ti kyen ikyenricwu Rimam, ti ti fen-wu ti ijwe ti fwer yi fengo ti wu u paembe ti,

²⁹ ikyaen ti, Rimam-ti si urwa ti ku twenji iken.