Mbaibrane 10 - Kutsingken Ira Rimam ti Saen Kyag

Yesu Sa Ijwe-wu na Rimam Kipaen Kinjo amam

¹ Icwe Musa si nyang kusung iken ti tinyang ti ku ba uwe, ti tatso tag-yi paenine itso ti iken yi tsi be. Icwe iken ti twen nee a ku twen shem twen shem ti kusang kusang, ayi nde tu-yi ti yi jworu ikentitibi ande ti ko ba ku fen Rimam be.

² Á baa, iken ti yerwen ne na site kuko ti u jworu ikentitibi ande, iken yi u ta-yi cwucwo be, ande ama u sī-ba anying utob risu ikentitibi-ba cwucwo be.

³ Amaa, iken ti yerwen yine ku nda ba tangsom riraen-ba kusang ti kusang.

⁴ Ikyaen ti, anying indag ti ana mbawen u sa ru tu-yi ikentitibi ande be.

⁵ Né iken ti nde ti Kristi sang ba utense, awu ri baa, “Afu ku sha-fu iken ti yerwen, ti rinyangwae be, iken ti afu ku sha si rimenn ijwe ti afu sa na m.

⁶ Rinyangwae iken ti twen, ti ana itijwosaen ikentitibi, ku tsen-yi afu utob be.

⁷ Ikyaen yine ame ri te fu baa, ‘Rimam, m ba pu m ti m nde iken ti utob-fu ku sha, pangma ti a bae risu-m uwae Kutsingken Icwe.’ ”

⁸ Tikucang awu ri baa, “Rinyangwae iken ti twen, ti rinyangwae iken ti yer wen, ti ani ku nde ikyaen ikentitibi-ni, ku tsen-yi afu utob be.” Awu ri ira yine ko ti a ku nde yi putsa icwe Musa.

⁹ Cwucwo, awu ri baa, “Nung, ame ba pu m ti m ba nde iken ti utob-fu ku sha.” Ayine ku tso baa, awu na twenji wande iken ti yerwen ti kucang, u ye itiyerwen Kristi tsi kutunn unju itikucang.

¹⁰ Ama, ikyaen iticwu Yesu, Unde ti Rimam Tsab Tsi, a jwosaen pu ba ati kukunn, si-yi ti unde iki ā yerwen iken cwucwo be.

¹¹ Usir ti usir, akwen ku nde wande-ba, u tsikunn ti ku yerwen iken, ti ku jworu tu-yi ikentitibi ande be.

¹² Amaa, ana Kristi, awu sa ijwe-wu na Rimam kipaen kinjo amam ikyaen ti awu u sa ru ikentitibi. Si-yi ikyaen ti a u yer wen iken iki na Rimam cwucwo be. Isim yine awu tso ka som kujwo rici na Rimam apupwen.

¹³ Awu som ku ji usir ti Rimam u nda ande rika-wu meme kafe iken ti awu u ceb pu fa afxen.

¹⁴ Ikyaen wande iticwu-wu ti awu cwu kipaen kinjo, ande ti awu jwo sisaen, ayi kumunn pu yi itijwosaen-ba ru fife yi uwe.

¹⁵ Kusung ti Saen kyag cwe te ti baa, ayi na si kubenti. Isim-yi, awu ri baa,

¹⁶ “Unju ti yer ti ame u yer te ande-m usir ti ku ba uwe ta re. Ame u sa ira-m bae tsi uwae riyaen utob-ba, u nda ba kab ira risu-yi ko kiye titini.” Itsekuru-ti Rimam ti ri.

¹⁷ Ti fa kyi, “Ame u tangsom-m ikentitibi-ba ti riraen-ba cwucwo be.”

¹⁸ Asiti Rimam a yata na ande ikentitibi, ayi si-yi ti a u yer wen iken na Rimam ikyaen ikentitibi cwucwo be.

Ande na Kristi Site Fengo ti A u Ba Uwog Rimam

¹⁹ Ameinja, ati site kpakang utob ti ti sang fe yi uwae uwog ti cwe siskeb ikyaen anying Yesu.

²⁰ Yi iticwu-wu, awu mbubta na ti fengo tishe, ti si fengo ti ku nda unyang. Ikyaen ti, awu shiryaen kutupwa ti a pu kagkyi uwae uwog ti cwe siskeb, ti si rimenn wu.

²¹ Ati site kukwen tiyang ti ta risu kusog Rimam.

²² Ikyaen yine, ti ko ba fer Rimam ti utob ti kubenti, yi fengo uwae kinjo ti si-yi te uwae ti kab be, ti utob ti a jwo sisaen uwae ira ti kab titibi, ti ijwe ti a jwujwo te ambyi ti sisaen.

²³ Ti tsi ting ting risu iken ti ati sa uwae tsi atang, ikyaen ti, Rimam, awu ti yer unju te ti, si-wu Rimam ti ku kafe unju ama be.

²⁴ Ti kwab ti ti kunn shwur atso uwae ira na ure, ti uwae ira na wande ti tinyang ti ti nde.

²⁵ Ti saeru-ti itifunn-ti pangma ti ariki ku nde be. Amaa, ti ri bom atso utob, ti si iken ti ani u nde siskeb tine ti ani nung baa, Usir wu fer ku pu wu.

Ti Kafe-ti ti Isim be

²⁶ Asiti ati a tsikunn ku nde ikentitibi ti unghae isim ti ati tu pu ti itinungye kubenti, fengo iki ta-wu ti a u nda Rimam rinyangwae itiyerwen ikyaen ikentitibi cwucwo be.

²⁷ Iken ti tsitsi si ti ti som ujwin uwae ikyenricwu rikwen Rimam, ti uvum urwa ti u ba twenmbub ande ti ku tsi ikub te ira Rimam.

²⁸ Uwae Icwe Musa, asiti ande ifaen ko ita a cwe pu ba baa, a na nung unde iki nyatsa icwe, a ku wen wu wen. A ku sae-ba wu te ayibrisi ama be.

²⁹ Afu ku kab baa, ayi u beb rimang, asiti unde a saeru Umbae Rimam, u saesi anying unju ti yer ti jwosaen ti, u ri mbeb Kusung ayibrisi?

³⁰ Ati nung pu ti Rimam, awu ti ri baa, “Ame ti u ye ripab ikentitibi.” Cwucwo, “Itsekuru u pwen ande-wu rikwen.”

³¹ Ayi si iken ti ikyenricwu, asiti rikwen Rimam ti site unyang, a ye fu unde.

³² Ni tangsom te iken ti nde uwae kiye ti wur ruru ti ani bag ku nungye ira Rimam. Ani kwab, u ye utob uwae rikaen u som kunn ti kubenti.

³³ Uwae kiye iki ande ku txun ni asu u ku byinn ni kutxu uwe ande, kiye iki ama ani ku tsi te ande ti ku ngwa itso rikaen yine.

³⁴ Ariki ti a pu ba sang pursuna, ani sae ba te ayibrisi. Ani tsen utob kiye ti a byinn fxaembe rifunn-ni meme, ikyaen ti, ani nung pu ni baa, ani na site rifunn iki ti skeb ayine. Ayi si rifunn ti u tsi kukunn ama.

³⁵ Ikyaen na yine, ni sa uwaetsi-ni jwunn tika-ni be. Ayi site kujwojang tiyang.

³⁶ Ayi nyang ti ni kaen kutxom sur utob, ikyaen ti ani a nde pu ni iken ti Rimam ku sha, ani u tu iken ti a yer unju risu-yi.

³⁷ A bae uwae Kutsingken Rimam baa, “Ayi u tsi-yi tsi be unde wu ti ku ba, u ba. Awu u nde-wu kukyib be.

³⁸ Amaa, ande-m ti som usom ti pang atang u som ti uwae kinjo. Asiti aba a kafe ti isim, ame u tsen-m utob te ba be.”

³⁹ Ama ana-ti, ati si-ti utso ande ti u kafe ti isim u twenji tag be. Ana-ti, ati ru uwae kinjo uwog Rimam, u nwangru.