Matiyu 19 - Kutsingken Ira Rimam ti Saen Kyag

Ribaen Ti Wen

¹ Kiye ti Yesu ri tag ira yine, awu nwunn uten Galili u kafe ru ti yi uten ti Yawudiya, ukunn akwen unyim ti Yordan.

² Ande kuko tum atso putsa wu, awu ama ku nwangru ba uwae acaeb-ba.

³ Ande ti kumbub Farisi ru ba myae wu kumyae u ri baa, “Uwog-fu, i nyang ti unde ā fxae iben-wu te uwa-wu, asiti awu a ku sha a?”

⁴ Yesu rang ama baa, “Ani fxen-ni ira ti a bae uwae Kutsingken Rimam be a. Ti kucang ti Rimam kyae ande, awu kyae urom ti unda

⁵ u ri baa, ‘Unde u ya ite-wu ti iya-wu ta u ti uwa-wu u baen atso, meme ifaen-ba kafe anying kinjo.’

⁶ Aba si-ba ande ifaen cwucwo be, aba si unde kinjo. Ikyaen na yine, iken ti Rimam a yir pu-wu, unde iki ā saen-wu ayi be!”

⁷ Ande ba rang kyi Yesu baa, “Ayi a si ahan, imi ti nde ti Musa sa icwe tsi baa, asiti unde a te uwa-wu u kata ribaen, awu na nda unda wu kutsingken na iben ti wen ti awu na tē wu ru?”

⁸ Yesu ri te ba baa, “Musa nda ni icwe ti ni na kata ribaen ikyaen utob ti kwen-ni. Ayi si-yi ahan ti kucang cang ti Rimam mam utense be.

⁹ Ame ku ri te ni baa, unde a wen ribaen-wu te uwa-wu, ti a si-yi ikyaen ti unda wu nae isa be, asiti unde wu a ru ka mbe unda tishe, awu nae pu wu amae te unda wu.”

¹⁰ Atugbug Yesu ri te wu baa, “Asiti ayi a si ahan kutampwa urom te unda, ayi nyangskeb ti ribaen ā ta-yi be.”

¹¹ Amaa Yesu ri te ba baa, “Ira ti ame ri ne, i si-yi meme ande ti u kyangte yi be, se ande ti Rimam sa yi na pu wu aba.

¹² Ikyaen ti, ira munnae munnae ti nde ne arom u mbe-ba anda be. Ariki cwu umbyi ru ti uwae rishwu iya-ba. Ariki ikyaen ti, ande ndembeb ba. Ariki ama ku mbe-ba anda be ikyaen wande na Kujwokwe Rimam ti apupwen. Unde ti a u nde tu, awu ā fxen iken ti kwen yine.”

Yesu Nde Anyisu Tinying Itinyang

¹³ Ande pu anyisu-ba ba uwog Yesu ti wu na pu ajwo cwu tsa ba risu ti wu na jwam itinyang Rimam ba risu-ba, amaa ande ti imbyi Yesu fwan ande ba kibyag.

¹⁴ Yesu ri baa, “Ni ya anyisu ta ti a ru ba uwog-m. Ni rwae-ni aba rwae be, ikyaen ti, Kujwokwe Rimam ti apupwen si ikyaen utso ande pangma anyisu bane.”

¹⁵ Yesu pu ajwo cwu tsa anyisu ba risu tawe u nwunn atang.

Unde ti Rifunn ti Kujwokwe Rimam

¹⁶ Kiye iki unde iki ru ba uwog Yesu u rang wu baa, “Unde ti uwe, imi ti tinyang ti ame u nde titawe ame u tu unyang ti tsikukunn?”

¹⁷ Yesu rang wu ama baa, “Afu kyang rimang ku rang me ira risu iken ti tinyang? Unde ti tinyang si nyang unde kinjo amam. Afu a ku sha ti fu u tu unyang ti tsikukunn, ye su icwe Rimam.”

¹⁸ Unde wu rang Yesu baa, “Icwe titini?” Yesu ri te wu baa, “Wen-fu unde be, nae-fu amae be, yib-fu riyib be, yer-fu rifen be,

¹⁹ nda itse-fu ti iya-fu kuko, ye ure te unde ice-fu pangma ti afu ku ye te risu-fu.”

²⁰ Unde wu ri te Yesu baa, “Ame ye su tag pu m meme icwe yine, imi ti tsitsi kyi cwucwo?”

²¹ Yesu ri te wu baa, “Asiti afu a ku sha ti fu na si-fu ti riraen be, ru ka pu rifunn-fu jabci ti pu aser-yi kan na ande ti rikaen. Afu u tu rifunn apupwen akwen. Isim ayine, ba putsa m.”

²² Kiye ti unde ti rifunn wu fxen ira yine, awu nwunn uwog atang ti utob ti byir, ikyaen ti, awu site rifunn ko timambe.

²³ Yesu ri te atugbug-wu baa, “Kubenti ti ame ku ri te ni, ayi bom pu yi ti unde ti rifunn u sang Kujwokwe Rimam ti apupwen.

²⁴ Ame ku ri te ni kyi cwucwo, ayi caeb skeb pu yi ti unde ti rifunn u sang Kujwokwe Rimam ti ti a u sa kakum nwunn sang umbyi uyi.”

²⁵ Kiye ti atugbug Yesu fxen ira yine, ayib fur ba risu, a nwunn u ku rang atso baa, “Ayi a si ahan ama aye ti u nwangru kyi cwucwo?”

²⁶ Yesu pu ayib cwu tsa ba piin u ri baa, “Ayine si iken ti cicaeb uwe ande, amaa iken iki ta-yi ti si iken ti cicaeb uwog na Rimam be.”

²⁷ Ti Bitrus fxen ira yine, awu rang baa, “Tine ati ya iken-ti meme ta pu ti u ba putsa fu. Kujwojang imi ti ati u tu?”

²⁸ Yesu ri te ba baa, “Kubenti ti ame ku ri te ni, kiye ti a u kafe utense tishe, Umbae Unde u som tsa iken ti som na Ukwe-wu, ani ande-m rijwe asu ifaen ne u som tsa iken ti som na akwe ama. Ani u pwen rikwen risu rishi anyisu Isirela rijwe asu ifaen.

²⁹ Unde ti a ter ya kununn-wu ta, ko inja-wu ko kaya-wu ko ite-wu ko iya-wu ko anyisu-wu ko risaen ufang-wu ikyaen rinyi-m, awu u tu iken yi ti awu ya ta ne atsepu mae itsong. Cwucwo awu u tu unyang ti tsi kukunn.

³⁰ Amaa, ande yang akwen ti si ti kucang u ba kafe ande ti isim, ande ti isim ama u ba kafe ande ti uwe.”