Matiyu 18 - Kutsingken Ira Rimam ti Saen Kyag

Unde ti Ko Siskeb Uwae Kujwokwe Rimam

¹ Uwae kiye wune atugbug na Yesu ba tu wu u rang wu baa, “Unde ti ko siskeb uwae Kujwokwe Rimam ti apupwen si aye.”

² Yesu kunn ra umbae ti kitinying iki u sa wu tsi uwe-ba

³ u ri baa, “Kubenti ti ame ku ri te ni, asiti ani a kafe utob-ni u sa ijwe-ni tsi-ni pangma anyisu tinying be, ani u sang-ni kujwokwe Rimam be.

⁴ Unde ti sa risu nae riben pangma umbae wune, awu ti si unde ti ko siskeb uwae Kujwokwe Rimam ti apupwen.

⁵ Unde ti a kyangte umbae ti kitinying pangma awune uwae rinyi-m, awu kyangte m.

Itikyaefa Anyisu Tinying

⁶ “Amaa, unde ti a kyaefa kinjo uwae anyisu tinying bane ti ru uwae kinjo uwog-m u nda wu jwunnsi, ayi nyang skeb uwog unde wu ti a ú sa umbae ricwo tiyang kya fa wu ti ukwae ti awu ā ngwa cwu uwae uyinn.

⁷ Ayae ande ti utense ikyaen iken ti u nda ande kyen kufxen fengo Rimam! Ande u tu kang iken ti ku kyen kufxen utense ike, amaa ayae unde ti u shir kufxen ti kyen yi ba.

⁸ “Asiti kujwo-fu ko kufxen-fu a nda fu ti fu nde ikentitibi, kum ra wu ru ti sa jwunn tika. I nyang skeb ti afu u shanum te ajwo ti afxen ti fu sang unyang ti ti afu u site afxen te ajwo u ru ka sang uwae urwa ti ku ten ku jim-wu jim be.

⁹ Asiti riyib-fu a ku sha ti wu u nda fu nde ikentitibi, wag ra wu ruye ti sa jwunn tika. I nyang skeb ti fu u shanum te riyib kinjo u sang unyang ti ti afu u site ayib ifaen u sang uwae urwa ti ku ten ku jim-wu jim be.”

Mbawentam ti Yag fufa

¹⁰ “Ni sae ru-ni ko kinjo uwae anyisu tinying bane be. Ame ku ri te ni baa, aba na site atom-ba ti apupwen ti ku sae uwe Itse-m ti ta apupwen.

¹² “Ani nung rimang? Asiti unde iki a site mbawen mae itsong, kinjo a yag ta uwae-yi, awu u nde rimang? Awu u ter ya mae inje ka mbe rijwe asu itsongnje ti tsitsi ta ibaen rikwen u ru ka sha awu ti yagtita, be a.

¹³ Kiye ti awu a tu pu awu ama, kubenti, awu ku tsen utob risu-wu skeb pu wu ti awu u tsen risu mae inje ka mbe rijwe asu itsongnje ti tsitsi ti yag ta-ba ta be.

¹⁴ I si ahan ama, Itse-m ti ta apupwen ku sha-wu ti uriki uwae anyisu bane na yagta be.

Iken ti Unde u Nde te Inja-Wu ti Raen Wu Ira

¹⁵ “Asiti inja-fu a raen fu ira, ru ka tu wu ti tatso wu riraen-wu. Amaa nde yi uwae kitam, kutampwa-fu te awu amam. Asiti awu a fxen fu, afu tu pu fu inja-fu ti atang.

¹⁶ Amaa asiti awu a shaen-wu ti wu u fxen fu, sha unde kinjo ko ifaen fwa ijwe-fu, ikyaen ti ande ba ā fxen ira ti inja-fu wu raen meme, pangma ti a bae baa, unde a raen ira, ande ifaen ko ita na fxen yi titawe.

¹⁷ Asiti awu a fxen-wu ande bane be, sa ira yi tsag te andufu uwae kumbub ande na Rimam. Asiti awu a fxen-wu andufu be, ni sa wu tsi pangma unde ti nung-wu Rimam be ko unde ti ku mbe aser ukwe.

Yesu Nda Ande ti Putsa-Wu Kuko

¹⁸ “Kubenti ti ame ku ri te ni, iken ti ani a shaen riben ike, a shaen pu ba ayi apupwen akwen ama. Iken ti ani a cwe riben ike, a cwe pu ba ayi apupwen akwen ama.

¹⁹ Cwucwo ame ku ri te ni, asiti ande ifaen uwae-ni a yer unju risu iken iki ti aba jwam uwog Rimam riben ike, awu Itse-m ti ta apupwen u nde na ba iken yi.

²⁰ Ikyaen ti, uwog ti ande ifaen ko ande ita a byir atso uwae rinyi-m, ame te ba som te atso.”

Upyi ti A Yata na-ba Wu Riraen-Wu be

²¹ Ama Bitrus ye ra unju tso u rang Yesu baa, “Itsekuru-m, ame u yata na inja-m atsepu imwa asiti awu a nde m ikentitibi? Atsepu itsongfaen a?”

²² Yesu ri te wu baa, “Iyee! Ayi si-yi atsepu itsongfaen be. I si atsepu mae ita mbe rijwe asu itsongfaen.

²³ Ikyaen ti, a ku myae Kujwokwe Rimam ti apupwen te ukwe iki ti ku sha ti wu u pwen aser ti awu ku putsa apyi-wu.

²⁴ Ti awu sang aser yi ti ti pwen, a shir unde iki uwae-ba sang ba tu wu. Ukwe ku putsa unde wu ripab zinariya kumbub rijwe.

²⁵ Unde wu site-wu aser ti awu u pae ripab yi be. Ikyaen yine ukwe wu ri baa, a na sa unde wu te uwa-wu, te anyisu-wu, te iken ti awu site yi kujwo meme jabci ikyaen ti wu pae aser yi.

²⁶ Ama unde wune ku riben uwe itsekuru-wu u jwam wu baa, ‘Ame mbyae ajwo, ya ta na m, ame u pae pu m afu!’

²⁷ Ama itsekuru-wu nung risi-wu u ya ta na wu aser yi meme.

²⁸ “Upyi wune nwunn u ruye ka tu inja-wu iki ti si upyi ama. Unde wune ci ripab uwog upyi ti kucang dinari ukob kinjo. Awu ye wu ti ukwae u sang wu itibyinn u ku ri te wu baa, ‘Pae na m aser ti ame ku putsa fu.’

²⁹ Upyi wune si ku riben u jwam inja-wu baa, ‘M mbyae ajwo, ya ta na m, ame u pae pu m afu.’

³⁰ Amaa awu shaen tag u ye unde ti ripab-wu ru ka sang pursuna u ri te wu baa, se iken ti awu na ā pae pu wu titawe awu na u ruye.

³¹ “Kiye ti apyi ti tsitsi fxen ira yine, utob-ba ndembeb. Aba nwunn ru ka tu itsekuru-ba u ri te wu ira yi meme.

³² Ukwe wu kunn unde wu sang ba u ri te wu baa, ‘Afu upyi titibi, ame ya ta na fu meme aser ti ame ku putsa fu, ikyaen ti, afu jwam m baa, ame na ya ta na fu.

³³ Ama afu u sae-fu risi inja-fu pangma ti ame sae risi-fu be a.’

³⁴ Itsekuru-wu tso rinae u sa wu cwunn pursuna se kiye ti awu na a pae tag pu wu ripab ti ta risu-wu.

³⁵ “Ayine si iken ti Itse-m ti ta apupwen u nde te unde titini uwae-ni, asiti ani a ku ya ta na-ni atso ikentitibi-ni ti utob-ni kinjo be.”