Matiyu 16 - Kutsingken Ira Rimam ti Saen Kyag

Ande iki Sha ti Yesu na Tatso Ba Iken ti ku Fur Ayib

¹ Ande ndufu iki ti kumbub Farisi ti kumbub Saduke ru ba uwog Yesu. Aba ku sha ti a u ye Yesu ti riraen. Ikyaen yine aba ri te wu ti wu na nde wande ti fur ayib ti a na u nung baa, ko Rimam ti na tom wu ru ba bara.

² Ama Yesu ri te ba baa, “Kiye ti usir a si ku te, ani ku ri baa, ucwe upwen u tsa-wu be ikyaen ti, apwa apupwen bibyaen.

³ Kiye iki ama, kiskinn fifae ti usir a pur ku tso, asiti apwa apupwen a jwom u bibyaen, ani ku ri baa, ‘Upwen u tsa yaka ne.’ Ani nung pu ni ti ni u ri baa, usir na u tsi ko upwen na u tsa. Amaa, iken ku nde uwae utense ike tine ti ku tatso iken ti u ba uwe, ama, ani nungye-ni ayi be.

⁴ Ani ande titibi ti kiyuku ne ti pyir pu ni ira Rimam, ani ku ri baa, ame na tatso ni iken ti ku fur ayib ané? Iyee, ame u tatso-m ani be. Wande ti ku fur ayib ti ame u tatso ni si nyang ana Jona amam.” Isim yine Yesu ya ba ta atang u kyang ikyin-wu ru.

Yesu Sunn Ira Risu Ande Ndufu

⁵ Kiye ti ande na Yesu yen ru ka sang ukunn akwen uyinn, a tangsom ti a ye su-ba buredi be.

⁶ Yesu ri te ba baa, “Ni nung afxen-ni nyinyang riben ti yisiti na ande ti kumbub Farisi ti Saduke.”

⁷ Ande ti imbyi Yesu sang ira ti ti ri te atso baa, “Iki be awu ku ri ira yine ikyaen ti, ati ye su-ti buredi be.”

⁸ Yesu nung mam pu wu ira ti aba ku ri te atso u ri te ba baa, “Ani nde rimang ku ri ira yine te atso risu buredi ti ani ye su-ni be? Ani nde rimang ru-ni uwae kinjo be?

⁹ Ani nungye-ni khika be a. Ani tangsom-ni te kiye ti ame nyangta abyi buredi itsong u kan na ande kumbub itsong be a. Atyika imwa ti ani byir amumunn-yi munn atang?

¹⁰ Abyi buredi itsongfaen ti ame nyangta u kan na ande kumbub inje ama re? Atyika imwa ti ani byir amumunn-yi si munn atang?

¹¹ Kiye ti ame ri baa, ni na nung afxen-ni riben nyinyang ti yisiti na ande ti kumbub Farisi ti Saduke, ame ri-m ira risu buredi be. Ani kyang rimang nungye-ni ira yine be? Ni nung ijwe-ni nyinyang te ande ti kumbub Farisi ti kumbub Saduke. Aba si pangma yisiti uwae buredi.”

¹² Tiri ande Yesu nungye baa, awu na ku ri-wu ira risu yisiti ti ku ndub buredi be, awu na ku ri te ba ira risu iken ti kwen na ande ti kumbub Farisi ti kumbub Saduke.

Bitrus Ri baa Yesu na Si Unde wu ti Rimam Tsab Tsi

¹³ Kiye ti Yesu ru yi uten ti Kaisariya ti ta uten Filipi, awu rang atugbug-wu baa, “Ande ku ri baa, Umbae Unde na si aye?”

¹⁴ A ri te wu baa, “Ariki ku ri baa, afu na si Yohana ti ku nde batisma. Ariki ku ri baa, afu na si Eliya, ariki ama ku ri baa, afu na si Irimiya ko kinjo uwae ande ti ya iskin ira Rimam ti kute.”

¹⁵ Yesu rang kyi ba baa, “Ani ama re, ani ri baa, ame na si aye?”

¹⁶ Siman Bitrus ri te wu baa, “Afu si Unde ti Rimam Tsab Tsi ti wu nwangru utense. Afu si Umbae Rimam, Rimam ti site unyang.”

¹⁷ Yesu ri te wu baa, “Siman umbae Yohana, itinyang si ana-fu, ikyaen ti, ayi si-yi unde iki ti tatso fu ira yine be, ayi ruye uwog Itse-m ti ta apupwen.

¹⁸ Ikyaen yine ame ku ri te fu, afu si Bitrus, ama yi kutxú wune, ame u mbye kumbub ande ti putsa-m tsitsa atang, ama iticwu u nde num wu num.

¹⁹ Ame u nda fu iken ti ku mbub ufu kusog ana Kujwokwe Rimam. Ira ti afu a shaen riben ike, a u shaen yi apupwen akwen ama. Ira ti afu a cwe riben ike, a u cwe yi apupwen akwen ama.”

²⁰ Isim yine, Yesu fwa atugbug-wu kusen baa, a na ri te-ba unde iki baa, awu na si Unde ti Rimam Tsab Tsi be.

Yesu Ri Ira Risu Iticwu-wu

²¹ I tsi kiye wune ru yi uwe Yesu bag ira ti ri paenine te atugbug-wu baa, awu na u ru yi Urushelima ama u ngwa rikaen ti tsotso kujwo ande ndufu ti akwen tiyang ti ande ti ku kwen na ande icwe. Ande na u wen wu. Usir ti fa ti ita, awu na u nwunn ti unyang.

²² Bitrus pu ra Yesu ru iyen kyab u ka fwan wu kubyag baa, “Itsekuru, Rimam ā nde-wu ti ira yine ā tu fu be. Ira yine u tu-yi afu be.”

²³ Yesu kafe uwe u ri te Bitrus baa, “Afu Shetann, ko ru ru uwe-m ike! Afu si ukum ti cekyi fengo-m, ikyaen ti, ira ti kab-fu yine si ana unde, i si-yi ana Rimam be.”

Su Kutuku ti Cice-Fu ti Fu Putsa M

²⁴ Isim yine Yesu ri te atugbug-wu baa, “Asiti unde iki a sha ti wu u putsa m, awu ā munnji te ira ti si ana-wu ti risu-wu, awu ā ye kutuku ti cice-wu tso ukwae-wu, ti awu ā putsa m.

²⁵ Ikyaen ti, unde ti a ku sha ti wu na u nwangru unyang-wu, awu u shanum unyang-wu, amaa, unde ti a shanum unyang-wu ikyaen-m, awu u tu unyang-wu.

²⁶ Imi ti unde u tu asiti awu a tu tag iken ti ta utense meme u shanum te unyang-wu? Imi ti unde u sa fi ti wu tu unyang-wu?

²⁷ I kyang ku yaen pu yi ti Umbae Unde u ru ba uwae kuko ti riyinn na Itse-wu. Atom Rimam ti apupwen te wu u ba tetso. Awu a ba pu wu, awu u ba pae unde titini kujwofwa wande ti awu nde.

²⁸ Ame ku ri te ni kubenti baa, ariki ta uwae-ni ike ti u cwu-ba be se iken ti aba a nung Umbae Unde a si ku ba yi Kujwokwe-wu.”