Markus 4 - Kutsingken Ira Rimam ti Saen Kyag

Unde ti ku Yag Itso

¹ Usir iki Yesu ku kwen iken unju uyinn tiyang. Ande yang-ba akwen byir uwog-wu. Ikyaen ayine awu sī uwae kuyae u ko sang yi uwae uyinn kpang. Ande meme tsi unju uyinn. Awu ama som uwae kuyae, ku kwen na ande.

² Awu kwen na ba iken ko timambe uwae ira ti sunn. Uwae ira-wu ayi awu ri te ba baa,

³ “Ni naa atong. Unde ti ritom ru kaa yag itso.

⁴ Ti awu ku yag itso yi, itso yi iki ta ka si fengo. Inung ru ba u ba tob pu yi ci.

⁵ Itso yi iki ta ka si riben asang, uwog ti isa ta ko-yi atang be. Itso yi ruye tsi-yi tsi be, ikyaen ti, isa ta ko-yi atang be.

⁶ Ama kiye ti usir tso ba kitaen, ayam usir fxab wu. Ama awu wam cwu ikyaen ti, awu si-wu te ipab be.

⁷ Itso yi iki ta ka si uwae icwong, icwong ser ka taen kyi yi, ama awu waen-wu awaen be.

⁸ Itso yi iki ta ka si uwog riben ti tinyang. Ayi ruye nyang timambe u ser jwag jwag tso u ka waen awaen. Uwog iki a ka tu ikaen rijwe ita, uwog iki a ka tu ikaen mae ande ita, uwog iki a ka tu mae ande itsong.”

⁹ Ama awu ri baa, unde ti a site atong ti ku fxen ira, awu ā fxen.

Iken ti Nde nee Yesu ku Sunn Ira

¹⁰ Isim ayine ti ande nwunn ya wu ta, ande ti tsitsi ti ku putsa wu, ti atugbug-wu rijwe asu ifaen, ba rang wu ira risu ira ti sunn yine ti awu kwen na ba.

¹¹ Awu ri te ba baa, “Ana-ni, a ku mbubta na ni ira ti ku cwucwe na Kujwokwe Rimam. Amaa ande ti ta-ba uwae-ni be, a ku ri te ba ira meme ti ira ti sunn.

¹² A nde yine ikyaen ti ‘Ayi a si itisae, aba ā sae, amaa, a u sae tu-ba be. Ayi a si itifxen, aba ā naa atong u fxen, amaa, a u nungye-ba be. Ayi a si-yi ahan be, aba u kafe ba uwog Rimam, ama awu u yata na ba.’ ”

Imbyi Ira Risu Unde ti ku Yag Itso

¹³ Yesu rang ba baa, “Asiti ani a nungye-ni imbyi ira ti sunn yine be, ani u nde rimang titawe ani u nungye ira ti sunn ti tsitsi?

¹⁴ Unde ti ku yag itso yi si unde ti ku ri ira Rimam te ande.

¹⁵ Itso yi ti ta ka si fengo si ira risu ande iki ti a tso ira Rimam uwae riyaen utob-ba. Ti aba fxen ira yi, ti kufe Shetann ru ba tob ra ira yi ti a tso uwae riyaen utob-ba.

¹⁶ Cwucwo itso yi iki ti ta ka si riben asang, si ande ti fxen ira yi, ti kufe aba paembe yi ti utob titsen.

¹⁷ Amaa, aba site-ba ipab be, u tsi ka-ba uwe be. Kiye ti rikaen a ye ba, ko ande a ku nde ba rikaen ikyaen ti aba na putsa ira Rimam, ti ritsen aba u ter kafe ti isim.

¹⁸ Itso yi iki ti ta ka si uwae icwong, si ande iki ti fxen ira Rimam,

¹⁹ amaa, ira ti kab ana utense, ti kukyaefa ana rifunn, ti ayib ti taen ana iken sang ba taen kyi ira Rimam, ama awu waen-wu awaen be.

²⁰ Itso yi ti ta ka si riben ti tinyang si ande ti a fxen ira Rimam u paembe yi. Ira yi ku nde wande uwae riyaen utob-ba, ku waen awaen. Uwog ande iki a tu ikaen ka rijwe ita. Uwog ariki a tu ikaen mae ifaen. Uwog ariki a tu mae itsong.”

Fitila

²¹ Yesu rang ba baa, “Unde u bae fitila u burkyi wu ti kitu a? Ko awu u sa tsi sang uwae iwaen a? Awu u sa tsi tsa-wu risu tebur be a?

²² Ira ti ku cwucwe, a u sa ri yae tag te ande. Iken ti a burkyi yi kyi ti kute, a u mbub yi tita.

²³ Unde ti a site atong ti ku fxen ira, awu ā fxen.”

²⁴ Awu sunn ira te ba baa, “Ani naa atong nyinyang, ti ni sa utob tsi risu ira ti ani ku fxen! Iken ti afu a myae na ande, ayi ti si iken wu ti a u myae na fu atang, ama a u kora yi fa fu fa.

²⁵ Unde ti site iken, a u si fa wu fa. Unde ti site-wu iken iki be, ayi ti awu site kpang, a u mbe ra yi ra uwog-wu.”

Itso ti ku Ruye Ise

²⁶ Yesu ri baa, “Kujwokwe Rimam pangma si unde ti ku yag itso uwae risaen.

²⁷ Awu ku nae ku shwu ku nae ku shwu, ama itso ku shap atsing ku ser yi fengo ti awu nung-wu be.

²⁸ Isa ti risu-wu ku nda wuci ku waen awaen. Ti kucang si atsing-yi, ti putsa si asaen-yi, ti fa ti ita si acwong-yi.

²⁹ Kiye ti wuci yi a ben pu yi, ti ritsen, unde ti risaen u sa kisim fxen kum ira ti bunn amam, ikyaen ti, kiye ti a u tob wuci riben nde pu yi.”

Isinn Musita

³⁰ Yesu rang ba baa, “Ati u sa Kujwokwe Rimam myae ti imi? Ira ti sunn titini ti tatso saen wu?”

³¹ Awu ri baa, “Kujwokwe Rimam si pangma isinn musita. Kiye ti a sa yi ku ta riben, isinn yi ti yib skeb uwae isinn iken meme.

³² Amaa isim yi ti ayi a ruye ise u mbubta ku shab, ayi ti ko skeb uwae atsingken meme. Ayi kya kyikya ko timambe, ama inung ku ba ku kyae afug-ba atang.”

³³ Itso ira ti myae yine si ti Yesu ku sa kwen na ande ira Rimam atang. Awu kwen na ba pang ti iken ti aba u fxen tu.

³⁴ Awu u ri te-wu aba ira iki be, se ira ti sunn. Amaa kiye ti a kum awu ti atugbug-wu, awu ku mbubta na ba imbyi ira yi meme.

Yesu Nda Ufunn Kyae Tsi

³⁵ Usir jwo ureb usir wune Yesu ri te ande ti imbyi-wu baa, “Ti yen ru yi ukunn uyinn akwen.”

³⁶ Ande-wu aba ya ande ti funn atang ta u si yi uwae kuyae ti Yesu som atang. Aba ru tetso. Ande iki sang uwae ayae iki u te ba ru tetso.

³⁷ Ama upwen jwom ku ba. Ufunn ti ribom nwunn ku kae. Ama ambyi ku byinn kuyae ka ikyae ne, ka ikyae ne, ku txi ra ambyi sang uwae kuyae, ama kuyae awu munn ku kyi ti ambyi.

³⁸ Yesu nae-wu kicwag uwae imbyi kuyae. Awu sa risu-wu nae tsa iken ti a ku sa ta risu. Aba kunn shwu wu u rang wu baa, “Unde ti uwe, afu kab-fu rikaen asiti ati a cwu uwae ambyi ike be a.”

³⁹ Yesu shwu kicwag u taen ufunn ira u ri te uyinn tiyang baa, “Bwe tag! Nae riben skirr!” Ufunn ya ta. Uwog meme bwe tag skirr.

⁴⁰ Yesu rang ande ti putsa wu baa, “Imi ti nde ne ani ku kyen ikyenricwu? Ba kwar tine, ani site-ni uwae kinjo khika be a?”

⁴¹ Ama ikyenricwu ye ba timambe. Aba ri ira te atso baa, “Awune si itso unde ti rimang ti uyinn ti ufunn ku nae risu riben ti ira-wu?”