Markus 16 - Kutsingken Ira Rimam ti Saen Kyag

Yesu Nwunn Uwae Kuskab

¹ Ti usir ikyinn-ba yafe pu wu tiri, Mberimu Magadalen ti Salome ti Mberimu iya Yakubu, nwunn u ru ka jab acin ti ku nung kuyang ti tinyang ikyaen ti a u sa ru ka yaen si rukom Yesu.

² Ucwe fam-yi usir ti kucang uwae kutsab-ba, ti kiskinn fifae, aba nwunn ku ru yi kuskab Yesu atang.

³ Ti aba kyang ku ru, aba ku ri ira tetso baa, “Aye ti u kaen ru na ati kutxom ti aba sa cwunn kyi unju kuskab?”

⁴ (Kutxom wu ko ken pu wu.) Ama ti aba pu ayib tso, aba nung ti a kaenra kutxom wu ru pu ba unju kuskab atang.

⁵ Ti aba sang yi uwae kuskab wu, aba nung utaen unde iki ti sī arun titsen, awu som kujwo rici uwae kuskab atang. Ikyen ricwu ye ba si-yi ti ti ri be.

⁶ Utaen unde wu ri te ba baa, “Ni kyen-ni ikyenricwu be! Ame nung pu m ti ani ku sha Yesu unde ti Nazareti ti a kwer wu kutuku ti cice ne. Awu nwunn pu wu ti unyang. Awu ta-wu ike be. Nung! Uwog ti a sa rukom-wu nae atang ta ri!

⁷ Tine, ni ru ti ni ka ri te atugbug-wu, fa te Bitrus meme, baa, Yesu na ta uwe-ni u ku ru yi Galili. Ani u tu wu atang pangma ti awu ri te ni kute.”

⁸ Anda ba ter inyae ruye uwae kuskab atang, ikyaen ti, unyang kunn ba timambe. Ijwe-ba ku fufwer. Aba ri-ba ira te unde iki be, ikyaen ti, aba ku kyen ikyenricwu.

Yesu Tu Mberimu Magadalen

⁹ Isim-yi ti Yesu nwunn uwae kuskab, ti kiskinn fifae usir ti kucang uwae kutsab na Mbayawuda, awu tawe tu Mberimu Magadalen, unda ti awu rwae ruye rijwen titibi itsongfaen risu-wu kute.

¹⁰ Mberimu ru yi uwog ande ti tsitsi ti te Yesu som tetso kucang, uwog ti aba som ku jwub ira ricwu atang. Awu ri te ba baa, awu na nung pu wu Yesu.

¹¹ Ama, ti aba fxen baa, Yesu na nwunn pu wu ti unyang, Mberimu ama na sae wu ti ayib-wu, aba ru-ba uwae kinjo atang be.

Yesu Tu Ande iki Ifaen

¹² Isim ayine, ande iki ifaen uwae ande ti putsa Yesu ru ku ye uwae uka, ku ru yi ufang. Ti aba kyang ku ru, Yesu tu ba ti ijwe ti tishe.

¹³ Aba kafe ti isim u ru yi uwae uka u ka ri te ande ti tsitsi ti ku putsa Yesu. Aba ama ru-ba uwae kinjo uwae ira yi be.

Yesu Tu Ande-Wu Rijwe asu Kinjo

¹⁴ Isim ayine, ande ti imbyi Yesu rijwe asu kinjo byir ku ci wuci uwog kinjo. Ama Yesu ba tatso risu-wu uwog-ba. Awu fwan ba ira ikyaen ti aba ru-ba uwae kinjo be. Cwucwo, ikyaen ti aba bom pang-ba risu. Ikyaen ti, ko ti ande nung wu ti awu nwunn ti unyang, aba cwe-ba be.

¹⁵ Yesu ri te ba baa, “Ni ru ko aka uwae utense, ti ni ya iski ira-m ti tinyang te ande meme.

¹⁶ Unde titini ti a ru uwae kinjo kutsa ira tinyang yine, a nde na wu batisma ama, Rimam u nwangru wu uwae ikentitibi-wu. Unde ti a shaen u ru-wu uwae kinjo kutsa ira tinyang yine be, Rimam u pwen wu rikwen iticwu.

¹⁷ Ande ti ru uwae kinjo u nde iken ti ku fur ayib. Yi rinyi-m, aba u rwae rijwen titibi ruye risu ande. Aba u ri ira ti unju tishe ti aba kwen ji-ba ayi be.

¹⁸ Asiti aba a ye ajwae ti ikob yi kujwo, ko asiti aba a ngwa acin iki ti ku wen ande, iken yine meme u nde-yi aba iken iki be. Aba u sa kujwo nae tsa risu ande ti kicaeb, ande ti kicaeb aba u nwangru uwae kicaeb-ba.”

Yesu Tso yi Apupwen

¹⁹ Isim ti Itsekuru-ti Yesu ri te mam atugbug-wu ira yine, a ye wu tso yi apupwen. Awu ru ka som kujwo rici na Rimam.

²⁰ Ande ti putsa-wu ru yi ko aka meme uwae utense, ku ri ira-wu ti tinyang te ande. Itsekuru-ba Yesu ku ndeya ba. Awu ku nda ba wande ti ku fur ayib ti aba ku nde uwe ande, ti ku tatso ande baa, ira-wu na si kubenti.