Markus 15 - Kutsingken Ira Rimam ti Saen Kyag

A Pu Yesu Ru yi Uwog Bilatus

¹ Ucwe fam-yi, ti kiskinn fifae, kukwen ti siskeb kunn byir akwen tiyang ti andufu ti ande ti ku kwen Icwe Rimam fa kyi ti ande ndufu ti tsitsi ti ku myae ira meme. Ti aba myae mam pu ba ira, aba yir Yesu u pu wu ru ka na Bilatus unde ti uwe uten.

² Bilatus byib wu baa, “Afu ti si ukwe Mbayawuda a.” Yesu ri te wu baa, “U ri pu fu.”

³ Uwog wune, ande ti uwe na akwen tiyang yer ira nae tsa Yesu baa, awu na nde ikentitibi munnae munnae.

⁴ Bilatus kafe rang kyi Yesu cwucwo baa, “Afu u ri-fu unju-fu be a? Fxen ira yang-yi ti aba ku ri risu-fu ne.”

⁵ Amaa Yesu mbub-wu unju be, ama ira yi fur Bilatus ayib.

A Pwen Yesu Rikwen Iticwu

⁶ Ko kusang titini ti kiye ukwab tiyang a nde pu yi, Ukwe Bilatus ku sa ruye na ande ti uten atang unde kinjo uwae ande ti a ye ba sang pursuna, nee ande a jwam wu risu unde wu.

⁷ Uwae kiye wune, unde iki ta atang, rinyi-wu baa, Barabas. Awu ta uwae pursuna fa te ande iki ti wen ande uwae rika-ba ti a ta ti ande ti ye su uten.

⁸ Ikyaen yine, aba Mbayawuda pu atso ba byir uwog Bilatus ikyaen ti a jwam wu ti wu na nde na ba iken ti awu ku nde na kob ba ko kusang titini.

⁹ Bilatus ri baa, “Ani ku sha ti m na sa ruye na ni ukwe-ni a.”

¹⁰ Awu ri ira ne ikyaen ti, awu nung pu wu ti ande ti uwe na akwen tiyang ku tsinn kutsinn risu Yesu, né iken ti nde a sa Yesu ba na wu.

¹¹ Ama ande ti uwe na akwen tiyang kang fa ande ti funn atang ti a na jwam Bilatus ti wu na sa ruye na ba Barabas risu unju Yesu.

¹² Bilatus rang kyi ba cwucwo baa, “Ame u nde rimang ti unde wu ti ani ku kunn wu baa, Ukwe Mbayawuda?”

¹³ Ama aba mbub ukunn baa, “Ye wu ru ka kwer!”

¹⁴ Bilatus rang ba baa, “Ikyaen imi? Ikentitibi-wu si imi ti awu nde?” Ama aba taen ira skeb kyi ti kucang u nghae ira baa, “Ye wu ru ka kwer!”

¹⁵ Uwog wune, Bilatus ku sha ti wu na u tu kutxuwe ti tinyang uwog ande. Awu sa ruye na ba Barabas. Ama awu ri te akyirten-wu baa, aba na byinn Yesu kimbgáb, ama a na ye wu ru ka kwer kutuku ti ta cice.

Akyirten Nde Yesu Uru Ijwe

¹⁶ Isim ayine akyirten pu Yesu ku sang yi utabshi uwae kununn unde ti uwe uten. Aba ka kunn byir tag akyirten ti tsitsi meme.

¹⁷ Aba pu itso kutupwa ti tibyaen ti ukwe ku si u pu si Yesu ijwe. Aba ka kyae ikajwo pangma ubur ukwe u sa bur wu risu.

¹⁸ Isim ayine aba kunnji wu ira ku rug wu kujwo ku ri baa, “Usuko Ukwe Mbayawuda!”

¹⁹ A ku byinn wu ukum risu, u ku tub atsang tso wu, ku jwunn ikyig uwe-wu baa, aba na ku nda wu rurob.

²⁰ Ti aba txir mam fe wu, aba tunn tso arun ti tibyaen ti a pu si wu kucang u pu arun ti ana-wu si kyi wu ti atang. Isim yine, aba pu wu ru yi ise ti a ka u kwer wu.

A Kwer Yesu

²¹ Ti aba pu wu ku ru ku ye uwae uka atang, a tu unde iki ti ru ufang ku ba. Rinyi-wu si Siman, unde ti Kirene. Awu si itse Alezanda ti Rufus. Akyirten ba kang fa wu ti wu na su kutuku wu ti aba na u kwer Yesu atang.

²² Aba pu Yesu tso yi kumbukunn iki ti a ku kunn wu baa Golgota. (Imbyi rinyi Golgota baa, uwog kukoto risu.)

²³ Ti aba ka fe atang, a nda Yesu ambyi anam ti a naa yi fa ti acin umung murr, amaa, awu pyir u ngwa-wu ayi be.

²⁴ Isim yine aba ye wu kwer ijwe kutuku wu. Aba caen iticaen u pu atupwa-wu ka fa atso kujwo, ti a u nung iken ti unde titini u tu.

²⁵ Aser itsongnje ti kiskinn si kiye ti a kwer wu.

²⁶ A bae ariraen-wu ijwe iken, u sa fxeb risu kutuku wu baa, “Awune si Ukwe Mbayawuda.”

²⁷ Aba pu ande ifaen ti ku byinn fxaen mbe iken ande fengo, kwer fa ti iyen kyaeb Yesu atang, kinjo kujwo rici, kinjo kujwo ife.

²⁹ Ande ti ku yafe fengo atang meme ku txun wu asu, ku jwunn ti risu titag, ku ri baa, “Mhm, afu ri baa, afu na u mbub Kusog Rimam tiyang, na u mbye cwunn wu uwae usir ita!

³⁰ To, nwangru ijwe-fu risu kutuku wune ti fu si ba riben!”

³¹ Akwen tiyang ti ande ti ku kwen na ande Icwe Rimam ku byib Yesu unghae baa, awu na nwangru pu-wu ande iki, amaa awu nde num ti wu nwangru risu-wu!

³² Awu si Unde ti Rimam Tsab Tsi re! Awu si Ukwe Isirela! Awu ā si risu kutuku ba yí, ti ti u nung, u ru uwae kinjo uwog-wu! Ande ifaen ti a pu kwer fa wu atang ku txun wu asu ama.

Iticwu Yesu

³³ Ti aser rijwe asu ifaen ba kwer aser ita ti ureb, uwog byikyi meme uten wu.

³⁴ Uwae kiye wu, Yesu kunn ira ti afxenjwin ti ribom baa, “Eloyi, Eloyi, lama sabakatani?” Imbyi-yi baa, “Rimam-m, Rimam-m, imi ti nde afu ya m ta?”

³⁵ Ande ti tsi atang fxen ira-wu ayi. A ri baa, “Ni fxen, awu ku kunn Eliya ira.”

³⁶ Unde iki uwae-ba atang ter inyae ru ka sa soso jwae uwae ambyi anam ti fufab u sa ter si ukum u sa ndab ta tso yi apupwen uwog unju Yesu ti wu na ngwa. Aba ri baa, “Tsi tum ti ti nung iki be Eliya u ba nwangru wu, u sáen wu si risu kutuku ahoo.”

³⁷ Ama uwog wune, Yesu jwub ira ti afxenjwin ti ribom u cwu-wu.

³⁸ Uwae kusog Rimam tiyang, kutupwa ta atang ti aba sa yer tsen. Kiye ti Yesu cwu ne, kutupwa wune kata ifaen ti apupwen si ba furu ti riben.

³⁹ Kiye wu ama, unde ti uwe akyirten tsi riben uwe Yesu. Ti awu nung itso iticwu ti Yesu cwu ne, awu ri baa, “Kaya! Unde wune si kang Umbae Rimam, kubenti.”

⁴⁰ Anda iki ta atang, aba tsi fengo ti rwen, ku sae iken yi ti ku nde ne. Aba si Salome ti Mberimu Magadalen ti Mberimu iya Yose ti Yakubu ti ricwunnkyi, fa kyi ti anda iki.

⁴¹ Kiye ti Yesu ku nde wande-wu uten ti Galili, anda bane te wu putsa atso u ku ndeya wu. Anda iki yang akwen ti putsa wu ru ba yi Urushelima. Aba ta riben atang ama.

Itinji Yesu

⁴² Ayi si usir ti aba ku kyae ijwe-ba ikyaen ti, ucwe fam-yi si usir ikyinn-ba. Ikyaen yine, yi usir jwo ureb-yi,

⁴³ Yusufu, unde ti Arimateya ti si kinjo uwae ande ndufu ti ku pwen rikwén, ru ba. Ande ku sa rurob na wu ko timambe. Utob-wu tsi yi Kujwokwe na Rimam. Awu bom utob u ru yi uwog Bilatus u ka jwam ti a na nda wu rukom Yesu.

⁴⁴ Ti Bilatus fxen baa, Yesu na cwu tsi-wu tsi be ahan, ira yi fur wu ayib. Awu kunn unde ti uwe akyirten ira u rang wu baa, “Yesu cwu pu wu a?”

⁴⁵ Ti Bilatus fxen unju unde ti uwe akyirten baa, Yesu na cwu pu wu, awu cwe ti a na ye rukom Yesu na Yusufu.

⁴⁶ Ama Yusufu jab kutupwa rukom tititsen u ru ka ye rukom Yesu si ba yi riben. Isim yine awu cwin rukom Yesu te kutupwa wu u ye rukom wu nae uwae uwáe ti awu mum uwae kutxú tiyang ti namtur. Awu kaen kutxom tiyang ba takyi unju kuskab wu.

⁴⁷ Mberimu Magadalen ti Mberimu iya Yose sae uwog wu ti Yusufu ye rukom Yesu ru ka nji atang.