Markus 14 - Kutsingken Ira Rimam ti Saen Kyag

A ku Sha ti A u Wen Yesu

¹ Ayi tsitsi usir ifaen titawe Mbayawuda u nde Ukwab Itiyafe ti ukwab ana buredi ti si-yi te yisiti be. Akwen tiyang ti ande ti ku kwen na ande ira Icwe ku sha fengo ti kitam ti a na u ye Yesu u wen wu wen.

² Aba ri baa, “Ati u ye-ti awu usir ukwab yine be, be ande u nwunn ti ira ti nyae.”

Unda iki sa Kindob ti ku Nung Kuyang Yaen Si Yesu Risu

³ Uwae kiye wune, Yesu ta Betani uwae kununn Siman, unde ti kicaeb kum ye wu. A ku ci wuci ajwo, ama unda iki sang ba uwog-wu ti iturbasa kindob ti tinyang ti ku nung kuyang. A kyae kindob yi te ipab nardi. Kindob yi site aser ko timambe. Ama unda wu mbubta iturbasa wu u sa kindob yaen si Yesu risu.

⁴ Ariki uwae ande ti ta atang tso rinae, ku pwen unju te atso baa, “A! A! A nde rimang ku ndembeb kindob yine!

⁵ Á baa a na sa kindob yine jabci u pu aser yi ka na ande ti rikaen, ayi ú nyang skeb. Aba u tu siskeb acwur azurfa ukob ita!” Ama aba fwan unda wu ira.

⁶ Yesu rang ba baa, “Ani nde rimang ku fwan unda wu kibyag? Ni ya wu ta. Iken ti awu nde na m si wande ti tinyang.

⁷ Ko usir titini, ani ku som te ande ti rikaen. Asiti ani a ku sha ti ni u nde na ba iken ti tinyang, ni u nde na ba. Amaa ame u som kunn-m te ni be.

⁸ Unda wune nde pu wu iken ti awu nde tu. Awu ba ti wu ba kyae nyang ijwe-m ti kindob ikyaen iticwu-m ti itinji-m ti tsi ji m uwe.

⁹ Kubenti ti ame ku ri te ni, iken ti unda wune nde te m ne, ande u ri yi ko aka uwae utense uwog ti ande ku ri Ira Tinyang na Rimam atang. A u tangsom te kujwo wande-wu yine.”

Yawuda Cwe ti Wu Sa Yesu Jabci

¹⁰ Tiri, Yawuda Iskariyoti, ti si kinjo uwae atugbug rijwe asu ifaen ana Yesu, ru ka tu kukwen tiyang ikyaen ti wu na sa Yesu jabci na ba.

¹¹ Ti aba fxen ira-wu ayi, aba tsen utob te wu. Aba yer unju te wu baa, aba na u pu na wu aser. Isim ayine, awu sha fengo ti wu na u ye Yesu ruye na ba.

Yesu Ci Ukwab te Atugbug-Wu

¹² Usir ti kucang na ukwab-ba na buredi ti site-yi yisiti be nde pu yi. Ayi si kiye ti aba ku yerwen mbawen, ku tangsom te itiruye-ba uwae uten ti Ejib. Ande ti putsa Yesu rang wu baa, “Uwog ti afu ku sha ti ti na kyae nyang na fu ti fu ci ukwab atang si aka.”

¹³ Ama Yesu tom pu ande ifaen uwae-ba u ri te ba baa, “Ni ru yi uwae uka. Ani u tu unde iki ti su kitutong ambyi. Ni putsa wu

¹⁴ ru yi kununn ti awu u sang atang. Ni ri te unde ti kununn wu baa, ‘Awu Unde ti ku kwen iken, ku rang kusog rikyen ti awu ti atugbug-wu u ci ukwab atang.’

¹⁵ Unde wu u tatso ni kusog ipim tiyang ti apupwen. Meme iken ti ani a ku sha ta atang. I si uwog wu ti ani u kya wuci tsika ati atang.”

¹⁶ Ande ifaen aba nwunn u sang yi uwae uka. Aba tu iken meme pangma ti Yesu ri te ba. Aba nde wuci na ukwab tsi atang.

¹⁷ Ti usir te pu wu, Yesu ti ande ti umbyi-wu ru ba.

¹⁸ Ti aba som ku ci wuci, Yesu ri te ba baa, “Kubenti ti ame ku ri te ni, unde iki uwae-ni ike u sa m jabci na ande ti rika-m. Unde wu si kinjo uwae ande ti ku ci wuci te m ike.”

¹⁹ Ti ande ti imbyi Yesu fxen ira yine, aba beb utob. Aba ku rang Yesu ti kinjo ti kinjo baa, “I si ame a?”

²⁰ Yesu ri te ba baa, “Unde wu si kinjo uwae-ni ande-m rijwe asu ifaen ne, unde ti te m sa kujwo si uwae kitu wune.

²¹ Awu Umbae Unde u cwu pangma ti a bae uwae Kutsingken Rimam risu-wu. Amaa, ayae si ana unde wu ti u sa wu jabci! Á baa, a na mbae-ba unde wune utense ike, ayi ú nyang skeb!”

Yesu Ci Wuci na Unju ti Yer te Atugbug-Wu

²² Ti aba ku ci wuci, Yesu ye buredi u nde na Rimam fxaefa u nyangta buredi wu ti ajwo-wu na ba. Awu ri baa, “Mbe buredi wune ti ni ci, i si rimenn ijwe-m.”

²³ Isim ayine, awu ye kitu ambyi anam u nde na Rimam fxaefa u ye na ba. Meme-ba ngwa.

²⁴ Awu ri te ba baa, “Ayine si anying-m ti u yaen mbub ikyaen na ande yang akwen. Anying-m yine si iken ti tatso unju ti yer tishe ti Rimam yer te ande.

²⁵ Kubenti ti ame ku ri te ni, ame u ngwa-m ambyi anam cwucwo be, se usir ti ame u ngwa yi yi fengo tishe uwae Kujwokwe Rimam apupwen.”

²⁶ Ama isim ti aba yang pu ba akyang, aba nwunn u pu atso ru yi Rikwen Zetunn.

Bitrus Shaen Ishaen Risu Yesu

²⁷ Yesu ri te ba baa, “Meme-ni u ter shag u shaen m, ikyaen ti, Rimam ri ira uwae Kutsingken-wu baa, awu na u byinn wen unde ti ku shi mbawen, mbawen yi ama u ter yaen shag.

²⁸ Amaa, isim yi ti ame a nwunn pu m uwae kuskab ti unyang, ame u ru uwe-ni ru yi Galili.”

²⁹ Bitrus ri te wu baa, “Iyee, ko ande meme a ter ya fu ta, ame u ya fu ta-m be.”

³⁰ Yesu ri te wu baa, “Kubenti ti ame ku ri te fu, utitang wune, ti ti mbakunn u ta ira ka-wu atsepu ifaen be, afu u shaen ishaen ka atsepu ita baa, afu na nung ji-fu ame be.”

³¹ Ama Bitrus ri kyi ira te wu ti kpakang baa, “Ko asiti a wen m wen ikyaen-fu, ame u pyir-m afu be. Ame u cwe!” Aba ande na Yesu ti tsitsi meme ri ira pangma ti Bitrus ri ama.

Yesu Jwam Rimam Uwae Risaen ti Getsemane

³² Yesu ti atugbug-wu ru ka sang uwae risaen iki ti a ku kunn wu baa Getsemane. Awu ri te ande-wu baa, “Ni som ji m ti ike. Ame u ru ka u jwam Rimam.”

³³ Ama awu pu Bitrus ti Yakubu ti Yohana kora ka uwe. Anying yer wu utob timambe. Awu fxen ti utob ti byag si-yi ti ti ri be.

³⁴ Awu ri te ba baa, “Utob-m byag timambe, u sha ti wu u wen me. Ni som ike. Ni som ti ujwin.”

³⁵ Awu ko ru yi uwe kpang u jwunn ikyig u ku jwam Rimam baa, ko iki be, asiti ayi a u nde tu, kiye rikaen yine na u yafe wu.

³⁶ Awu jwam baa, “Itse, afu Itse-m, iken meme caeb-yi caeb uwog-fu be. Afu a cwe ira, ye ra kitu rikaen yine ru uwog-m. Amaa, ame u cwe iken ti afu ku sha, si-yi iken ti ame ku sha be.”

³⁷ Uwog wune, awu kafe ba tu ande-wu ita bane ku cwag kicwag. Awu rang Siman Bitrus baa, “Siman, afu ku cwag kicwag a. Afu u nde tu-fu ti fu u som ti ujwin kiye kpang be a.

³⁸ Ni som ti ujwin. Ni jwam Rimam, be, ani u pu kutxae Shetann. Kubenti, kusung cwe, amaa, ijwe namtur.”

³⁹ Awu kafe ko ru kyi yi uwe kpang cwucwo u jwunn ikyig u ku jwam Rimam ku ri kyi ira pangma ti kucang.

⁴⁰ Ti awu kafe ba uwog ande-wu aba, aba ku cwag kicwag cwucwo. Ayib-ba rob teng ti kicwag. Aba shanum te ira ti a u ri te wu.

⁴¹ Ti awu kafe ru u ka kafe ba kyi ti apu-ita, awu rang ba baa, “Ani ta ti uwae kicwag ti cwag ku pu bwe unyang ti atang a. Ayi pang pu yi. Kiye wu ba pu wu ti a u ye Umbae Unde na ande ti ku nde ikentitibi.

⁴² Ni nwunn ti ti ru. Nung! Unde ti u sa m jabci ba pu-wu!”

Ande Ndufu Ye Yesu

⁴³ Ti ti awu ta ti uwae ira ti ri, Yawuda Iskariyoti ba sang. Awu si kinjo uwae atugbug rijwe asu ifaen ana Yesu. Ande yang akwen putsa wu. A ye su asum ti ituku. Akwen tiyang ti ande ti ku kwen na ande Icwe Rimam, ti ande ndufu ti ku myae ira, aba ti tom ande bane ba ikyaen ti aba na ba ye Yesu.

⁴⁴ Ti uwe-yi, unde ti u tur Yesu na ba (awu Yawuda) ri te mam pu wu ande ba iken ti awu u nde. Awu ri te ba baa, “Unde ti ame a ye wu bur utob si unde ti ani ku sha. Ni ye wu ti ni nung wu nyang nyang, be awu u shir nwangru.”

⁴⁵ Uwog wune, ti Yawuda ba sang, awu ru yinn yi uwog Yesu u ye wu bur utob u ri baa, “Unde ti uwe!”

⁴⁶ Ama a sang kob Yesu u ye wu tiri.

⁴⁷ Unde iki ti ku tsi te Yesu atang nwaen ra kisim-wu u pye ra kutong upyi na kukwen tiyang.

⁴⁸ Ama Yesu ri te ba baa, “Ani ba uwog-m ti usu rika ti ni u ye m pangma unde ti ku sī ande kubwa fengo a.

⁴⁹ Ko usir titini ame te ni som te atso, ku kwen na ande iken uwae kusog Rimam. Ani ye-ni ame be. Ani ku nde ayine ikyaen ti ni u kumunn ira yi ti a bae risu-m uwae Kutsingken Rimam ti kute.”

⁵⁰ Uwog wune, ande ti imbyi Yesu meme ya wu ta u ter yaen shag.

⁵¹ Utaen unde iki ti si kinjo uwae ande ti putsa Yesu yab kutupwa u tsi fer atang. Ande ba sha ti a u ye wu fa ti atang.

⁵² Amaa awu shi fwer u ya kutupwa ti yab-wu ta u ter ru ti ribam.

A Pu Yesu Ru yi Kusog Rikwen

⁵³ Uwog wune, aba pu Yesu ru yi kununn kukwen ti siskeb. Ama meme akwen tiyang ti ande ndufu ti ande ti ku kwen na ande Icwe Rimam meme ru ba byir uwog-wu.

⁵⁴ Bitrus ama putsa Yesu ku kyang ti isim ti isim akwen. Awu sang yi utab ishikununn kukwen ti siskeb u ru ka som ku wē urwa te ande ti som kyi kusog andufu Rimam.

⁵⁵ Akwen tiyang fa ti ande ndufu ti tsitsi ti ku pwen rikwen meme, ku sha ti a u tu ira iki ti a u ri risu Yesu ti a na u wen wu. Amaa aba tu-ba ira iki be, ko ti kinjo.

⁵⁶ Ande munnae munnae yer rifen risu-wu, amaa unju-ba ren-yi uwog kinjo be.

⁵⁷ Ricwunnkyi-yi, ariki uwae-ba nwunn ritsen u ri ira ti rifen nae tsa wu baa,

⁵⁸ “Ati fxen wu, awu ri baa, awu na u byinn mbub kusog Rimam wune ti ande mbye wu te ajwo, ama na u mbye mam kusog iki uwae usir ita ti na si-yi unde ti na mbye wu be.”

⁵⁹ Ira-ba ayi ama ru kwar-yi atso be.

⁶⁰ Kukwen ti siskeb nwunn ritsen uwe ande meme u byib Yesu baa, “Afu site-fu ti ira ti ti ri risu ira yine ti ande bane ku ri risu-fu ne be a?”

⁶¹ Amaa, Yesu bwe tag iken-wu skirr. Awu ri-wu ira iki be. Kukwen ti siskeb wu kafe u byib kyi Yesu ira cwucwo baa, “Afu ti si Unde wu ti Rimam Tsab Tsi a? Afu si Umbae Rimam a?”

⁶² Yesu cwe baa, “Ame si awu. Uwe ike ama, ani u nung Umbae Unde ku som kujwo rici na Rimam. Ani u nung wu awu u si apupwen ba uwae abyi.”

⁶³ Ti kukwen ti siskeb fxen ira yine, awu ndembeb utob u ye atupwa-wu shir yaen ti ajwo-wu ti wu tso utob ti ndembeb-wu. Awu rang ande ndufu ti tsitsi ba baa, “Ira ti awu ri ne, ati ku sha kyi ira iki risu-wu cwucwo a?

⁶⁴ Ani fxen pu ni ira-wu ayi. Awu ku kunn ijwe-wu baa, awu na si Rimam. Ani nung rimang?” Meme-ba cwe u shaen ira Yesu baa, awu na nyaetsa pu wu icwe, na u pang iticwu.

⁶⁵ Uwog wune ande iki uwae-ba tub atsang tso Yesu ijwe, u pu iken yir kyi wu ayib. A byinn wu u rang wu baa, “Aye ti byinn fu? Ri te ti!” Ande ti ku som kyi kusog kukwen ti siskeb ama te wu ku rug fa atso.

Bitrus Txen baa Awu na Nung-Wu Yesu be

⁶⁶ Bitrus ta ti uwae utab ishi atang, ama mbawandab iki ti si kinjo uwae apyi na kukwen ti siskeb ru ba atang.

⁶⁷ Ti awu ba nungye Bitrus ku wē urwa, awu sae wu tso sae wu si u ri baa, “Afu ama fa uwae na ande ti putsa unde ti Nazareti wune, awu Yesu wu.”

⁶⁸ Bitrus txen baa, “Ame nung-m be. Ame nung-m imbyi ira yi ti afu ku ri ne be.” Awu nwunn iyen kyaeb utab ishi atang u sang yi uwae ukag. Ama mbakunn ta ira ti kucang.

⁶⁹ Mbawandab wu nungye wu, ti awu ru ka tsi kyi uwae ukag akwen cwucwo. Ikyaen yine awu ru ka ri ira te ande ti tsi te wu atang baa, “Unde wune fa uwae ande Yesu.”

⁷⁰ Ama Bitrus txen kyi cwucwo. Ti ayi paji kpang, ande ti tsi uwog wu atang kafe ri kyi te Bitrus baa, “Kubenti, afu si kinjo uwae-ba, ikyaen ti, afu si unde ti Galili!”

⁷¹ Ama Bitrus ben uben baa, “Ame a ku ri-m kubenti be, Rimam ā nde m tibi. Ame nung-m unde wu ti ani ku ri ira risu-wu ne be.”

⁷² Ti ira unju ne mbakunn ta ira ti apu-ifaen. Bitrus tangsom te ira yi ti Yesu ri te wu ti kucang baa, ti ti mbakunn na u ta ira ka atsepu ifaen, Bitrus na u txen baa, awu na nung-wu awu be atsepu ita. Ti Bitrus tangsom te ira yi, awu ka nae ira ti jwub.