Markus 12 - Kutsingken Ira Rimam ti Saen Kyag

Ande ti ku Nde Wande Uwae Risaen Anam

¹ Kiye iki Yesu sunn ira ti riben te ba baa, “Unde iki ka pye risaen tishe u sa ituku anam yen atang. Awu fae kundag pakob uwae risaen wu u kyae uwog ti aba u kam ambyi awaen anam atang. Awu kyae kitaen-kujwén tsi atang ku nungkyi risaen wu. Isim yine, awu pu itaen ti ku nungkyi iken tsi atang ti a na u nde wande meme uwae risaen wu u tu kujwojang-ba ti uwae risaen atang. Ama awu ye ikyin-wu ru fengo ti rwen.

² Kiye ti awaen anam yi ben, awu tom unde ti imbyi-wu iki ru ka uwog ande ti ku nungkyi uwae risaen wu, ti wu na ka mbe awaen iki na ru ba na wu.

³ Ama ande ba ye upyi wu u byinn wu iken u rwae wu kafe ru yi uwae kuru ajwo ukaen.

⁴ Awu tom kyi upyi-wu iki ru kyi cwucwo. Aba byinn mbag wu risu u nde wu iken ti ku nde risi.

⁵ Uwog wune, unde ti risaen tom kyi upyi-wu iki ru kyi cwucwo. Ande ti ku nde wande ba wen ra wu tika. Awu tom apyi-wu ko timambe ru. Amaa, ande ba byinn ariki, u wen ariki.

⁶ Tsitsi unde kinjo ti unde ti risaen site wu amam tiri; awu si umbae-wu ti utob uwae-wu. Awu ku tang baa, aba na u fxen kang umbae-wu. Ama awu tom ra umbae-wu ru uwae risaen atang.

⁷ Amaa ande ba ti ku nungkyi uwae risaen atang ri ira te atso baa, ‘Nung unde ti u ci rifunn risaen wune ti ta ne! Ni ru ba ti ti wen wu, ti ti ci rifunn risaen wune!’

⁸ Aba ye wu wen u sa rukom-wu jwunn tika ise ana risaen atang.”

⁹ Uwog wune, Yesu rang ande ndufu ba baa, “Ani tang baa, unde ti risaen u nde rimang tiri? Kubenti, awu u ba wen tag ande ti ku nungkyi uwae risaen atang u pu ande tishe fen kyi ba.”

¹⁰ “Ani fxen ji-ni ira ti a bae uwae Kutsingken Rimam be a.” A bae baa, “Kutxom ti ande ti ku mbye kusog pyipyir kafe pu wu kutxom ti ku nda ikub kusog tsi ti ribom.

¹¹ Itsekuru-ti ti nde iken yine. Ayi si iken ti ku fur ayib uwog-ti.”

¹² Ama aba ande ndufu ti Yesu ri te ba ira yine nungye pu ba ti Yesu na ku sunn ira yi risu-ba. Aba ku sha ti a ye wu, amaa a ku kyen ikyenricwu ande ti funn atang. Ikyaen ayine aba ya wu ta u ru-ba iken-ba.

Aser Ukwe

¹³ Isim ayine, aba tom ande iki ru yi uwog Yesu ikyaen ti a na ka fxen wu ira unju, iki be aba na u tu riraen unju-wu. Ariki uwae-ba si ande ti kumbub Farisi. Ariki cwucwo si ande ti ta imbyi Ukwe Herodus.

¹⁴ Aba ba uwog Yesu u ri baa, “Unde ti uwe, ati nung pu ti ti afu ku ri ira-fu ti kubenti. Afu ku tang-fu utob ti ira ti ande ku ri be. Cwucwo, afu si-fu pangma ande iki ti ku cwe ira ande iki skeb ariki be. Ama afu ku kwen na ande fengo ti kubenti na Rimam. Ri te ti, uwae Kutsingken Rimam, a cwe ti unde u pae aser ukwe na Kaisar a? Ati u pae kang aser ukwe na Kaisar ree, re ti ati u pae-ti be?”

¹⁵ Ama Yesu nungye pu wu ti aba ku fur ira. Awu rang ba baa, “Ani kyang rimang ku fxen me ira unju? Ni sa riyaen aser ba ti m nung!”

¹⁶ A sa riyaen aser ba na wu. Awu rang ba baa, “Risu aye, ti rinyi aye ti ta ijwe aser yine?” Aba ri baa, risu Ukwe Tiyang, ti rinyi-wu ti na ta atang.

¹⁷ Yesu ri te ba baa, “Ayi nyang. Nda Ukwe Tiyang iken ti si ana Ukwe Tiyang. Nda Rimam iken ti si ana Rimam.” Ira ti awu ri ne fur ba ayib risu.

Itinwunn Uwae Iticwu

¹⁸ Isim ayine cwucwo ariki ba uwog Yesu. Aba si ande ti kumbub Saduke. Abane si ande ti ku ri baa, unde a cwu pu wu, awu na u nwunn-wu uwae kuskab be. Aba ri te Yesu baa,

¹⁹ “Unde ti uwe, awu Musa bae na ti baa, ‘Asiti unde a cwu u ya uwa-wu ta, awu a site-wu umbae be, inja-wu na ā mbe kang uwa-icwu wu, ti awu ā mbae umbae tsi kyi risu inja-wu ti cwucwu ne.’

²⁰ Ande iki ta atang, a ka itsongfaen. Aba si ameinja atso. Ti ndufu uwae-ba mbe unda. Unda wu mbae-wu umbae be. Unde wu sa cwu.

²¹ Unde ti ifaen ba pu uwa icwu wu mbe. Uwa icwu wu mbae umbae na-wu awu be. Unde wu sa cwu kyi cwucwo. Unde ti ita si pangma aba ti kucang.

²² Ama meme itsongfaen-ba mbe uwa icwu wune kwar ti ikyinn risu-ba. Uwa icwu wu mbae umbae na-wu aba be. Aba cwu tag patag. Uwa icwu wu ama cwu yaen putsa ba.

²³ Pangma ti ande itsongfaen bane mbe unda wune, usir ti aba a nwunn pu ba uwae kuskab, unde titini ti u si ubaen unda wune?”

²⁴ Yesu ri te ba baa, “Ani ya fengo ta pu ni ikyaen ti, ani nung-ni Kutsingken Rimam be. Ani kab ye-ni iken ti Rimam u nde tu be.

²⁵ Kiye ti ande a nwunn pu ba uwae iticwu, aba u pangma atom na Rimam ti apupwen. Arom u mbe-ba anda be. Anda ama u baen-ba arom be. Ribaen ti baen ta-yi atang be.

²⁶ Ayi a si ira risu itikunnwunn ande uwae itikicwu, ani fxen ji-ni ira ti a bae yi uwae kutsingken Musa risu kutur ti tirisub ti ye urwa be a? Kiye wune Rimam ri ira te Musa baa, ‘Ame si Rimam na Ibrahim ti ana Ishaku ti ana Yakubu.’

²⁷ Rimam si Rimam na ande ti site unyang. Aba si-ba ande ti cwu kukunn be. Ani jwunnsi pu ni.”

Icwe ti Skeb Patag

²⁸ Unde ti ku kwen icwe Rimam iki fxen ishaen ti shaen yi u ru ba. Ti awu nung ti Yesu nda ba amsa ti tinyang awu rang Yesu baa, “Uwae icwe Rimam meme, iti skeb patag si titini?”

²⁹ Yesu ri baa, “Icwe ti skeb si awune: ‘Ni naa atong ti ni fxen, ani ande ti Isirela. Itsekuru-ti Rimam, awu ti si Itsekuru-ti kinjo-wu.

³⁰ Ye ure te Itsekuru-fu Rimam ti utob-fu meme, ti unyang-fu meme, ti ira ti kab-fu meme, ti kpakang ijwe-fu meme.’

³¹ Icwe ti putsa si awune: ‘Ye ure te unde ice-fu pangma ti afu ku ye ure te risu-fu.’ Icwe iki ti skeb ayine ta-yi be.”

³² Unde wu ri te kyi Yesu baa, “Unde ti uwe, afu ri kubenti. Itsekuru-ti si Rimam. Rimam iki ta-wu be, nyang awu kinjo-wu amam.

³³ Ikyaen yine, unde ā ye ure te Rimam ti utob-wu meme, ti ira ti kab-wu meme, ti kpakang-wu meme. Cwucwo awu ā ye ure te unde ice-wu pangma ti awu ku ye ure te risu-wu. Asiti unde a putsa icwe ifaen yine, ayi ú nyang skeb ititwen rinyangwae ikentitwen ti ibye ti yerwen na Rimam, ti a bae uwae icwe.”

³⁴ Yesu nung pu wu ti unde wune ben ira unju. Awu ri te wu baa, “Afu ta fifer te Kujwokwe Rimam.” Isim ayine unde iki ta-wu ti site kpakang utob ti wu u rang Yesu ira cwucwo be.

Unde wu ti Rimam Tsab Tsi

³⁵ Ti Yesu ku kwen na ande ira Rimam uwae kusog Rimam tiyang, awu rang ba baa, “Ayi nde rimang itawe ande ti ku kwen na ande icwe Rimam ku ri baa, Unde wu ti Rimam Tsab Tsi na u si umbae Ukwe Dawuda?

³⁶ Dawuda ti risu-wu ri baa, ‘Itsekuru-ti Rimam ri te Itsekuru-m baa, Som kujwo rici-m se usir ti ame u ci kujwo rika risu ande ti rika-fu.’ Kusung Rimam ti nda Dawuda ri ira yine.

³⁷ Awu ku kunn Unde wu ti Rimam Tsab Tsi baa, awu na si Itsekuru-wu. Asiti Unde wu ti Rimam Tsab Tsi a si itsekuru na Dawuda, ayi u nde rimang itawe awu u ba kafe umbae Dawuda cwucwo?” Ande yang-ba ti byir atang fxen ira Yesu ne ti utob ti tsen.

Yesu Fwa Ande Kusen Risu Ande ti Kufur

³⁸ Ti awu ku kwen na ba awu ri baa, “Ni nung afxen-ni riben nyinyang ti ande ti ku kwen na ande Icwe Rimam! Aba ti ku sha ti a u sī arun tiyang, ku ndub ijwe-ba ku kyang uwae ritug. Aba ku sha ti ande na kunnji ba ira, ti a na nda ba rurob.

³⁹ Aba ku sha uwog ti som ti rurob uwae kusog Rimam, ti uwog ti som ti rurob uwog ukwab.

⁴⁰ Ama aba ku fxaen mbe anunn awa icwu ti site-ba iken kujwo be, u ku ci iken-ba ti tikong. Isim yine aba ku jwam Rimam yi uwae ira ti ri ti rikob ti rikob uwe ande ikyaen ti ande na tang baa, aba na si ande ti tinyang. Ame ku ri te ni, rikwen ti Rimam u pwen ba kpag skeb tag pu yi ana ande ti tsitsi meme!”

Rinyangwae na Uwa Icwu

⁴¹ Yesu som fer uwog ti ande ku ta iken na Rimam atang. Awu ku sae ande yang akwen ku ta iken-ba na Rimam. Ande ti rifunn ku pu aser si yang-yi.

⁴² Ama uwa icwu ti rikaen iki ru ba u ba ta ana-wu waeri ifaen ti fob-yi kobo kinjo be.

⁴³ Yesu kunn ande ti imbyi-wu ba yi uwog-wu u ri te ba baa, “Kubenti ti ame ku ri te ni, wáeri ifaen ti uwa icwu wune sa ta na Rimam ne, skeb pu yi ana ande ti tsitsi patag.

⁴⁴ Ikyaen ti, ande bane meme sa iken-ba ruye uwae rifunn-ba. Amaa uwa icwu wune si unda ti rikaen. Awu ta na Rimam iken ti awu site kujwo-wu meme. Awu site-wu aser iki na iken ti ci cwucwo be!”