Markus 10 - Kutsingken Ira Rimam ti Saen Kyag

Iben ti Wen

¹ Yesu nwunn ya uwog wu ta u ru yi uten Yawudiya ti uten ti ta ukunn unyim ti Yordan. Ti awu ka atang, ande yang akwen ru ba byir kyi uwog-wu pangma ti kucang. Ama awu ku kwen na kyi ba cwucwo pangma ti awu ku nde kob ti kute.

² Uwog wune, ande ndufu iki ti kumbub Farisi ru ba uwog-wu ikyaen ti a na fxen wu ira unju. A byib wu baa, “Uwae icwe, a byang kyi unde ti wu u wen ribaen-wu ti uwa-wu a?”

³ Yesu rang ba baa, “Musa bae imi risu ira wune uwae icwe-wu?”

⁴ A ri baa, “Musa cwe baa, unde u nde tu ti wu bae na uwa-wu kutsingken na ribaen ti wen, u kata te wu.”

⁵ Yesu ri te wu baa, “Iken ti nde itawe Musa bae na ni icwe yine, si ikyaen ti, ani si ande ti kpag risu.

⁶ Ti kucang ayi si-yi ahan be. ‘Ti ti Rimam kyae iken meme, awu kyae urom ti unda som utense.

⁷ Ayine si iken ti nde unde u ya itse-wu ti iya-wu ta u ba te uwa-wu som te atso.

⁸ Aba meme ifaen-ba kafe iken kinjo.’ Aba si-ba ifaen cwucwo be, aba si kinjo amam.

⁹ Ikyaen yine, iken ti Rimam a yir pu wu, unde iki ā saen ta-wu ayi be.”

¹⁰ Ti Yesu ti atugbug-wu kafe ba sang uwae kusog, aba rang kyi wu ira cwucwo risu ira iben ti wen yine.

¹¹ Yesu ri te ba baa, “Unde ti a wen ribaen te uwa-wu u ru ka mbe unda iki, awu tsi uwe Rimam pangma si unde ti ku nae amae.

¹² Unda ama ti a ya ubaen-wu ta u ru ka baen unde iki, awu tsi uwe Rimam pangma unda ti ku nae amae.”

Yesu Wae Ira na Anyisu Tinying

¹³ Ande iki pu anyisu ku ba yi uwog Yesu ti awu na sa kujwo nae tsa ba risu. Amaa atugbug-wu fwan ba kibyag baa, aba na ba-ba uwog-wu be.

¹⁴ Ti Yesu nung iken ti atugbug-wu ku nde, awu tso rinae u ri te ba baa, “Ni byangkyi-ni anyisu tinying ba be. Ni ya ba ta ti a ba uwog-m. Ikyaen ti, utso ande ti pangma bane ti Kujwokwe Rimam ta ikyaen-ba.

¹⁵ Kubenti ti ame ku ri te ni, unde u sang tu-wu Kujwojwe Rimam be, se awu a cwe ti Rimam u nae ukwe risu-wu pangma ti Rimam ku nae ukwe risu anyisu tinying.”

¹⁶ Uwog wune, Yesu ye anyisu ba fa ajwo u sa kujwo nae tsa ba u nde na ba ti tinyang.

Unde ti Rifunn

¹⁷ Ti Yesu nwunn ku ru fengo, unde iki ru ba uwog-wu ti inyae u ba ku riben uwe-wu u rang wu baa, “Unde ti ku kwen iken ti tinyang, ame u nde rimang itawe ame u tu unyang ti tsikukunn?”

¹⁸ Yesu ri te wu baa, “Afu nde rimang ku kunn m baa, ‘Unde ti tinyang!’ Unde ti tinyang ta-wu be, se Rimam kinjo-wu amam ti si ti tinyang.”

¹⁹ Yesu ri te unde wu baa, “Afu nung pu fu icwe Rimam: Wen-fu unde be, nae-fu amae be, yib-fu riyib be, yer tikong tsa-fu unde be, ci-fu iken unde ti tikong be, nda itse-fu ti iya-fu kuko.”

²⁰ Unde wu cwe baa, “Een, unde ti uwe, ame ku putsa icwe yine meme ti ti ame ser itaen-m ba kwar tine.”

²¹ Yesu sae wu ayib ure u ri te wu baa, “Ayi tsitsi iken kinjo amam ti afu nde-fu khika be. Ru ka pu iken-fu meme jabci, ti pu aser yi kan na ande ti rikaen, titawe afu u tu rifunn na Rimam ti apupwen. Isim yine, ru ba putsa m.”

²² Ti unde wu fxen ira Yesu yine, utob-wu ndembeb, awu ye uwe ndembeb ndembeb u ru-wu iken-wu, ikyaen ti, awu site rifunn ko timambe.

²³ Yesu sae ayib pakob atugbug-wu u ri te ba baa, “Ayi u kpag ti unde ti rifunn u sang Kujwokwe Rimam.”

²⁴ Ira yi ti awu ri ne fur ba ayib. Ama Yesu ri te kyi ba ira cwucwo baa, “Anyisu-m, itisang Kujwokwe na Rimam kpag timambe!

²⁵ Ayi tomskeb ti kakum u sang imbyi uyi ti ti unde ti rifunn u sang Kujwokwe ana Rimam.”

²⁶ Atugbug Yesu nung ira yine fur ba ayib si-yi ti ti ri be. Aba ku rang atso baa, “Itso ira yine, unde iki u nwangru uwae rikwén Rimam njwaa?”

²⁷ Yesu sae ba ayib piin u ri te ba baa, “Ande u nwangru tu-ba risu-ba be. Amaa uwog Rimam ayi site-yi rikaen be. Iken meme pab, Rimam u nde tu yi.”

²⁸ Bitrus ye ra afxenjwin tso baa, “Meme iken ti ati site, ati ya yi ta ikyaen ti ti putsa fu.”

²⁹ Yesu ri baa, “Kubenti ti ame ku ri te ni, unde titini ti a ya kuru-wu ta, ko ameinja-wu ko ambakaya-wu ko iya-wu ko itse-wu ko anyisu-wu ko risaen-wu, ikyaen ira-m ti ikyaen na ira Rimam ti tinyang ti ame sa ba,

³⁰ ame ku ri te ni, ti ti unde wu tsi ti user uwae utense ne, awu u tu iken yine meme skeb ti kucang atsepu mae itsong, ko ayi a si kuru, ko ayi si ameinja, ko ayi si ambakaya, ko iya, ko anyisu, ko risaen. Ama awu u ngwa kang rikaen ama. Cwucwo, awu u tu unyang ti tsi kukunn kiye ti awu a cwu.”

³¹ Yesu ri baa, “Ande yang akwen ti si ande ti uwe tine u ba kafe ande ti isim. Ande ti ta ti isim tine ama u ba kafe ande ti uwe.”

Yesu Ri Kyi Ira Risu Iticwu-wu

³² Yesu ti ande-wu rijwe asu ifaen ti ku kwen iken uwog-wu ta fengo ku tso yi Urushelima. Yesu ku ru uwe, ande-wu ku putsa wu isim. Anying yer ba utob. Ande ti ku putsa ba isim ama, ku kyen ikyenricwu. Yesu pu aba rijwe asu ifaen tsi iyen kyaeb u ri te ba iken ti u tu wu uwae Urushelima.

³³ Awu ri baa, “Ande-m, ati ku tso yi Urushelima, ati a ka pu ti atang, a u sa Umbae Unde sang kujwo akwen tiyang ti ande ti ku kwen na ande Icwe. Aba u pwen wu rikwen iticwu. Aba u sa wu fae si kujwo ande ti nung-ba Rimam be.

³⁴ Ande ba u txir wu itxir. Aba u tub atsang si wu rimenn. Aba u byinn wu kimbab. Isim ayine aba u wen wu. Amaa usir ti fa ti ita awu u nwunn uwae kuskab ti unyang.”

Yakubu ti Yohana Jwam Yesu Iken

³⁵ Yakubu ti Yohana, anyisu Zebedi, ru ba uwog Yesu u ri te wu baa, “Unde ti uwe, asiti ati a jwam fu iken iki, ati ku sha ti afu na nde iken yi na ti.”

³⁶ Awu rang ba baa, “Iken ti ani ku sha ti m u nde na ni si imi?”

³⁷ A ri te wu baa, “Kiye ti afu a som pu fu uwae riyinn na ukwe-fu, uwae-ti ande ifaen ne, ati ku sha ti unde iki na som kujwo rici-fu, unde ti ifaen ama u som yaen kujwo ife-fu.”

³⁸ Yesu ri te ba baa, “Ani nung-ni iken ti ani ku jwam be. Ani u ngwa tu iticwae ti ame u ngwa a. Ko ani u nde tu batisima ti ame u nde a.”

³⁹ Aba ri te wu baa, aba na u nde tu. Yesu ri te ba baa, “Kubenti, iticwae ti ame u ngwa, ani u ngwa, ama batisima ti a u nde m te yi, a u nde ni te yi ama.

⁴⁰ Amaa ame site-m fengo ti ame u nda ande ti a som kujwo rici ti kujwo ife-m be. Ayi si wande na Rimam ti u nda ande uwog ti si ana ande ti a kyae yi tsi na ba.”

⁴¹ Ti atugbug-wu rijwe ti tsitsi fxen ira yi ti Yakubu ti Yohana ri, aba tso rinae te ba.

⁴² Ama Yesu kunn ba meme ira ru ba u ri te ba baa, “Ani nung pu ni, aba akwe na ande ti nung-ba Rimam be, aba ku tso ande-ba kuko ukwe-ba timambe. Ande ti uwe-ba ama ku fwan pang-ba ande kibyag yi kuko ti tso.

⁴³ Amaa, uwog-ni ande ti putsa m, ayi ā si-yi ahan be. Unde ti a ku sha ti wu u si unde tiyang uwae-ni, awu u nde kang rikaen na ni meme-ni.

⁴⁴ Unde iki uwae-ni a ku sha ti wu u si unde ti uwe, awu u sa risu-wu kafe upyi na ande ti tsitsi.

⁴⁵ Ikyaen ti, Umbae Unde ba-wu utense ikyaen ti a na nde na wu wande apyi be, amaa, ikyaen ti wu na nde na ande wande. Cwucwo, awu ba ti wu u sa unyang-wu tika ikyaen ti wu u jab mbe unyang ande yang akwen.”

Yesu Nwangru Unde ti Mbub Ayib

⁴⁶ Aba ru ka sang uten ti Jeriko. Ti Yesu ti atugbug-wu nwunn ku ru ku ye uwae uten atang, ande yang akwen putsa ba. Ama unde ti mbub ayib iki ku som riben iyen fengo atang, ku jwam iken. Rinyi-wu baa Bartimawu. (Imbyi rinyi-wu ayine baa, umbae Timawu.)

⁴⁷ Ti awu fxen baa, Yesu unde ti Nazareti na ya ku fe, awu sa afxenjwin tso ritsen u nghae ira baa, “Yesu, umbae Dawuda, sae m ayibrisi.”

⁴⁸ Ande yang akwen fwan wu kibyag baa, awu na bwe tag. Amaa, unde wu nghae ira skeb ti kucang baa, “Umbae Ukwe Dawuda, sae me ti ayibrisi!”

⁴⁹ Yesu kyae tsi u ri baa, aba na kunn unde wu ira na ba. Aba kunn wu ira u ri te wu baa, “Tsen utob! Nwunn ritsen! Awu ku kunn fu ira!”

⁵⁰ Awu waen pu kutupwa ti yab-wu tika u fa sunwunn u ru yi uwog Yesu.

⁵¹ Yesu rang wu baa, “Iken ti afu ku sha ti m na nde na fu si imi?” Unde ti mbub ayib wune ri baa, “Unde ti uwe, ame ku sha ti ayib-m na mbubta ti ame u sae uwog.”

⁵² Yesu ri te wu baa, “Ka-fu nyinyang. Uwae kinjo-fu nwangru pu wu afu.” Ti ritsen, ayib-wu mbubta, awu sae uwog. Ama awu putsa Yesu fengo atang.