Luka 5 - Kutsingken Ira Rimam ti Saen Kyag

Yesu Kunn Atom-Wu ti Kucang

¹ Kiye iki ti Yesu ta unju uyinn ti Genesare ku ri ira Rimam te ande, aba ku tur atso fer wu ti a na fxen ira Rimam.

² Awu nung ayae ifaen ti a ku ye iwag te yi ta unju uyinn atang. Ama ande ba ti ku ye iwag yi nwunn tso pu ba yi akaense u ku jwo akye-ba unju ambyi.

³ Kinjo uwae ayae yi si ana Siman Bitrus. Yesu sang uwae kuyae wune u ri te Siman baa, awu na jwora wu na ko sang yi uwae uyinn kpang. Yesu som si uwae kuyae u kwen na ande ira Rimam.

⁴ Kiye ti awu ri ira ri ri ri u ri mam pu wu awu ri te Siman ti arwan wande-wu baa, “Ni ko ru ka sang uwog ti jijang ti ni pu akye-ni sī, ti ni ye iwag.”

⁵ Siman ri te wu baa, “Itsekuru-m, ati kwab pu ucwefam u tu-ti iken iki be. Amaa, ikyaen ira-fu ame u pu akye-m si.”

⁶ Isim ti a pu akye-ba si, aba ye iwag yang-yi. Ama ikyaen kuko iwag yi, akye-ba bag ti ti yáen.

⁷ Ikyaen yine a sam arwan-ba ti ta kuyae ti ifaen ajwo baa, aba na ru ba ndeya ba. Ande ba ru ba u te ba yaen iwag munn yi ayae ifaen yi, ama ayae yi meme ifaen-yi ku nde pangma ayi na u fxaebur.

⁸ Kiye ti Siman Bitrus nung iken yine, awu nwunn ru ba ku riben uwe Yesu, u ku ri baa, “Itsekuru-m, nwunn-fu uwe-m ike tiri, be ame si unde ti ku nde ikentitibi.”

⁹ Awu ri ira yine ikyaen ti, ayib fur wu ti arwan-wu ti ta uwae ayae atang ikyaen ira ti Yesu ri ne nee aba ye iwag ko timambe.

¹⁰ Yakubu ti Yohana, anyisu Zebedi ti Siman, ayib fur ba ama. Yesu ri te Siman baa, “Kyen-fu ikyenricwu be. Pangma ti afu ku ye iwag tine, tsikunn ike ru yi uwe, afu u si unde ti ku ye ande!”

¹¹ Isim ti aba jwo ayae-ba ba pu ba yi ukunn ambyi, aba ya isu-ba ta ukunn atang u nwunn putsa Yesu.

Yesu Nwangru Unde ti Kicaeb Ikum

¹² Kiye iki ti Yesu ta uwae uten iki, unde ti kicaeb ikum ru ba tu wu. Kiye ti unde wu nungye Yesu, awu si ku riben uwe Yesu u ku jwam wu baa, “Itsekuru-m, kicaeb-m ayine nda m kafe iken ti ku txi iyib uwog ande. Afu u nde tu ti fu nwangru m, asiti afu a cwe ira.”

¹³ Yesu ndab ta kujwo-wu u sa tekunn wu u ri baa, “Ame cwe pu m, a nwangru pu ba fu uwae kicaeb.” Ti ira unju-wu, kicaeb ikum yi ya unde wu ta.

¹⁴ Yesu fwa unde wu kusen baa, awu na tsag te-wu unde iki ira risu iken yine be, ama awu ri te wu baa, “Ru ti ka tso risu-fu uwe kukwen Rimam, ti ru ka nda iken na Rimam ikyaen kicaeb yi ti ya fu ta ne pangma ti Musa ri. Ayine u tso ande kubenti na kicaeb yi ti yag ta.”

¹⁵ Amaa, iten Yesu shag kyi uwog meme skeb ti kucang. Ande ti kumbub-ba nwunn u ru ba ti a na fxen wu. Ande ti acaeb ti tsotso ru ba ama ti Yesu na nwangru ba.

¹⁶ Amaa ana-wu awu ku nwunn u ku ru-wu yi uwog ti ande ta-ba atang be u ku jwam Rimam.

Yesu Nwangru Unde ti Cwu Afxen ti Ajwo

¹⁷ Usir iki Yesu ku kwen na ande iken, ariki uwae kumbub Farisi som atang ama, fa ti ariki ti si ande ti ku kwen na ande ira Icwe Rimam. Ariki uwae-ba ru uwae uten ti Galili, ariki ru uten ti Yawudiya, ariki ama ru Urushelima ba. Uwae kiye wune Kusung Rimam ku nde wande ti kuko uwae ijwe Yesu, ku nda wu nwangru ande ti acaeb.

¹⁸ A baa, a na nunung, ande iki su unde ti cwu afxen ti ajwo ku ba risu iken ti nae. Ande ba kwab ti a na ye wu sang ka nae uwe Yesu.

¹⁹ Amaa ikyaen na ande ti munn pang-ba, a tu fob-ba riyae be. Ikyaen yine aba su wu tso yi usen rukub u ka tsig ta usen rukub u sa unde wu fa ti iken ti nae-wu meme si ba riben uwe Yesu kutampwa ande ti funn atang.

²⁰ Kiye ti Yesu nungye uwae kinjo na ande bane, awu ri te unde wu ti kicaeb baa, “Umbae-m, a yata pu ba afu ikentitibi-fu.”

²¹ Ande ba ti ku kwen na ande ira icwe ti ande ti kumbub Farisi nwunn ira ti rang uwae utob-ba. Aba ku rang baa, “Unde wune si aye ti ku ri unju titibi? Ira-wu ti awu ri ne, awu ku ri mbeb Rimam. Unde iki nde tu-wu ti wu yata na ande ikentitibi-ba be, se Rimam amam.”

²² Ti Yesu nungye ira ti aba ku kab uwae utob-ba, awu rang ba baa, “Ani kyang rimang u ku rang itso ira yine uwae utob-ni?

²³ Iken ti tom skeb si titini, ti a ri te unde ti pxib afxen baa, a na yata na pu ba wu ikentitibi-wu ree, re ti a ri te wu baa, awu na nwunn ritsen ti wu na kyang ikyin?

²⁴ Ame u tatso ni baa, Umbae Unde na site kuko uwae utense wune ti awu yata na ande ikentitibi-ba.” Uwog wune Yesu ri te unde wu ti cwu afxen ti ajwo baa, “Ame ku ri te fu, nwunn ti fur iken ti nae-fu ti ru yi kununn.”

²⁵ Ti ritsen, unde wu fa sunwunn uwe-ba atang u fur iken ti nae-wu u ru yi kununn ku teb rinyi Rimam.

²⁶ Aba som, ayib fur ba risu meme. Aba ama nwunn ku teb rinyi Rimam ti ikyenricwu. Aba ku ri baa, “Yaka ne ati nung pu ti itso iken tishe.”

Yesu Kunn Lawi

²⁷ Isim yine Yesu ya ba ta u ruye yi ise u ka tu unde iki ti som ufu kusog ti a ku mbe aser ukwe atang. Awu si unde ti ku mbe aser ukwe. Rinyi-wu si Lawi. Yesu ri te wu baa, “Putsa m.”

²⁸ Awu teya meme iken yi ta u nwunn u putsa Yesu.

²⁹ Isim usir iki Lawi nde ukwab na Yesu. Awu yae ande ti ku mbe aser ukwe yang-ba ba kununn-wu atang ama, fa ti ande iki. Aba som tebur, ku ci ku ngwa.

³⁰ Ama ande ti kumbub Farisi, ti ande-ba ti ku kwen na ande icwe nung ira yi. Aba ndembeb utob u ru ka tu ande na Yesu u ku rang ba baa, “Ani nde rimang ku ci ku ngwa te ande ti ku mbe aser ukwe ti ande ti ku putsa-ba icwe be?”

³¹ Yesu fxen ira-ba u ri baa, “I si ande ti nae kicaeb ti ku sha unde ti kucin, i si-yi ande ti tsi ti ribom-ba be.

³² Ame ru ba-m ikyaen na ande ti ku nde iken ti tinyang be; ame ba ikyaen na ande ti ku nde ikentitibi, ti m na kunn ba ti a na ya ikentitibi-ba ta.”

A Rang Yesu Ira Risu Unju ti Cwe

³³ Ande iki rang Yesu baa, “Imi ti nde nee ande na Yohana ti ande ti ku putsa ira Farisi ku cwe unju u ku jwam Rimam ko kiye titini amaa ande ti ana-fu ku ci-ba ci amam u ku ngwa-ba ngwa amam u ku cwe-ba unju be?”

³⁴ Yesu ri te ba baa, “Kiye ti ubaen unda ishe a te arwan-wu ta tetso a u nde tu ti a nda ba cwe unju u som rimenn a?

³⁵ Usir ku ba ti aba u cwe unju isim ti a ye pura ubaen unda ishe ru pu ba uwog-ba.”

³⁶ Yesu sunn kyi ira iki te ba cwucwo baa, “Unde iki u shiyaen-wu kutupwa tishe u sa bur fa kutupwa tikyi be. Asiti unde a nde ahan, kutupwa tishe wu u shiyaen ti tikyi. Cwucwo, awu ti tishe ti itikyi u ru-yi atso be.

³⁷ Aye ti u sa ambyi awaen anam si uwae apwa ti tikyi? Unde ti a nde yine, apwa yi u ndub yaen. Ambyi anam ti apwa meme u yaen mbub riben.

³⁸ Unde u funn kang ambyi anam ti tishe si uwae apwa ti tishe.

³⁹ Cwucwo, isim ti unde a ngwa mam pu wu ambyi anam ti ire, awu ku sha-wu ambyi anam ti tishe cwucwo be. Awu u ri baa, ‘Itikyi yi nyang skeb pu yi.’ ”