Luka 20 - Kutsingken Ira Rimam ti Saen Kyag

A Rang Ira Risu Kuko na Yesu

¹ Usir iki, ti Yesu ta Kusog Rimam tiyang ku kwen na ande u ku ri te ba ira Rimam ti tinyang, ama akwen Rimam tiyang ti ande ti ku kwen na ande Icwe Rimam ti andufu ti tsitsi ru ba funn.

² Aba rang Yesu baa, “Ri te ti uwog ti afu tu kuko atang itawe afu ku nde iken yine. Aye ti cwe na fu baa afu na nde iken yine?”

³ Yesu ri te ba baa, “Ame ama u rang ni ira iki. Ani ri te m,

⁴ kiye ti Yohana ku nde na ande batisma, Rimam ti cwe na wu ree, re unde iki ti cwe na wu?”

⁵ Aba nwunn ku shaen ishaen te atso u ku rang atso baa, “Ati u ri baa imi? Asiti ati a ri baa, awu na tu yi uwog Rimam, awu u ri baa, ati nde rimang ru-ti kubenti uwog Yohana be bara?

⁶ Amaa asiti ati a ri baa, awu na tu yi uwog unde, ande ti funn ike ne u jwunn wen ti ti atxom, ikyaen ti, aba kab mam pu ba baa, Yohana na si unde ti ku ya iskin ira Rimam.”

⁷ Ikyaen yine a ri te Yesu baa, “Ati nung-ti unde ti cwe na Yohana ti wu na ku nde batisma be.”

⁸ Yesu ri te ba baa, “To, ame ama u ri te-m ani uwog ti ame tu kuko atang nee ame ku nde iken yine be.”

Ira ti Sunn Risu Ande ti Uwe Uten

⁹ Tiri Yesu nwunn ku tsag te ande ira ti sunn iki. Awu ri baa, “Unde iki pye risaen-wu u yen ituku anam atang u sa risaen wu na ande iki ti a na nungkyi wu. Isim yine awu nwunn u ru yi uten uwog iki u ka som yer atang.

¹⁰ Ti awaen ituku yi ben mam ti itici, awu tom umbae-wu iki ru ka tu ande ba ti awu sa risaen wu na ba kujwo ikyaen ti wu na ru ka mbe awaen-yi iki na ru ba na wu. Amaa ande ba ti ku nungkyi risaen wu ye umbae wu kum u jae wu ru yi kununn ti ajwo ukaen.

¹¹ Ikyaen yine unde ti risaen tom umbae-wu iki ru ba kyi cwucwo, amaa ande ba ye kyi wu kum u waen tag wu ribam u jae wu kafe ru ajwo ukaen.

¹² Unde wu tom kyi umbae-wu iki ru kyi fa ti atsepu ita. Ande ba kum wu u mbog wu rimenn u jae wu ruye.

¹³ Isim yine unde ti risaen wu kab baa, ‘Ame u nde rimang tine? Ame u tom umbae-m ti riyaen utob-m ru. Iki be a u kyen ikyenricwu-wu.’

¹⁴ Amaa kiye ti ande ba nungye umbae wu, a ri te atso baa, ‘Nung umbae unde ti risaen ti ta ri. Ni ru ba ti ti wen wu, ikyaen ti risaen wune ā kafe ana-ti!’

¹⁵ Ikyaen yine a fam wu ruye uwae risaen atang u ka kum wen wu.” Yesu rang ande ti ku fxen wu baa, “Ani nung iken ti unde ti risaen u nde te ande bane a?

¹⁶ Awu u ru ka wen tag ba meme u sa risaen na ande iki.” Kiye ti ande fxen ira yine aba ri baa, “Ayaa! Rimam ā cwunnkyi fengo wune!”

¹⁷ Ama Yesu pu ayib sae ba, u rang baa, “Ani tang rimang risu ira ti a bae uwae Kutsingken Rimam kute baa, ‘Kutxom ti ande ti ku mbye kusog pyir wu pyir ba kafe kutxom ti a ku mbye kusog putsa wu.’

¹⁸ Ame ku ri te ni cwucwo, kutxom ti ame ku ri ne, asiti unde iki a pu ipu ijwe kutxom wune, awu u munnyer munnyer. Asiti kutxom wu a jwunnsi risu unde iki, awu u sher wen wu.”

Aser Ukwe ti ti Pae

¹⁹ Ande ti ku kwen na ande Icwe Rimam ti ande ti uwe na ande ti ku fen Rimam ku kwab ti a ye Yesu ti riben atang ikyaen ti aba nungye baa, ira ti sunn ti awu na ri ne na ye pu yi aba, amaa a nde fob-ba be, ikyaen ti a ku kyen ikyenricwu ande ti funn atang.

²⁰ Ikyaen yine aba som ji kiye ti a u tu riyae ti a ye wu. Aba sha tu ande iki ti tatso pangma aba na si ande ti kubenti. A ru ka jwen Yesu u ku tang baa, iki be a na u tu riraen unju-wu ti a na pu wu ru ka kunn rikwen uwog unde ti uwe uten.

²¹ Aba nwunn u ru ka ri te Yesu baa, “Unde tiyang, ati nung pu ti baa, iken ti afu ku ri tso u ku kwen na ande si kubenti. Ti fa atang afu ku nda-fu ande iki rurob skeb ande iki be u ku kab-fu ira risu iken ti ande ku ri be, ama afu ku kwen na ande ira ti kubenti risu fengo Rimam.

²² Ri te ti, Icwe Rimam cwe baa, ati na pae aser na Ukwe ti Roma ree, re ati na pae aser na-ti awu be?”

²³ Ama Yesu nungye pu wu kutxae-ba u ri te ba baa,

²⁴ “Ni nda m kobo ti m nung.” A nda wu. Awu rang baa, “Uwe unde ti ta ijwe kobo wune, ti rinyi ti a bae atang ne, si ana aye?” A ri te wu baa, ayi na si ana Ukwe ti Roma.

²⁵ Yesu ri baa, “I nyang pu yi. Iken ti si ana Ukwe, ni nda Ukwe, iken ti si ana Rimam ama, ni nda Rimam.”

²⁶ Ande ba tu-ba ira titibi unju Yesu ti a ye wu uwe ande be, ama fengo ti awu nda ba ira risu ira ti ti rang-ba fur ba ayib. Aba shanum ira ti ri.

Itinwunn Uwae Kuskab

²⁷ Usir iki ande iki ti ta kumbub Saduke ru ba uwog Yesu. Aba si ande ti ku ri baa, unde a cwu pu wu awu na u nwunn-wu uwae iticwu cwucwo be.

²⁸ Aba rang Yesu baa, “Unde tiyang, itse-ti Musa bae na ti uwae icwe baa, asiti unde a cwu u ya uwa-wu ta u mbae-wu umbae be, inja-wu na mbe unda wu ikyaen ti aba na mbae anyisu tsi kyi afxen inja-wu ti cwucwu.

²⁹ Ande iki ta atang ka itsongfaen, aba si ameinja atso. Utindufu uwae-ba mbe unda u mbae-wu anyisu be, u sa cwu.

³⁰ Utifaen pu unda wu u pu mbe ama, uwa icwu wu mbae na-wu awu umbae be. Unde wu sa cwu.

³¹ Unde ti fa ti ita pu uwa cwu wu mbe, unda wu mbae na-wu awu umbae iki be. Unde wu ama sa cwu. Meme-ba itsongfaen mbe uwa icwu wune kwar ti ikyinn risu-ba. Meme-ba sa cwu ti kinjo ti kinjo. Uwa icwu wu mbae na-wu uriki uwae-ba umbae be.

³² Ricwunnkyi-yi meme, unda wu ama ba cwu.

³³ Ama, ti meme-ba itsongfaen mbe wu kwar ti ikyinn risu-ba ne, usir ti a u ba kunn shwur ande uwae iticwu, unda wune u si uwa aye uwae-ba?”

³⁴ Yesu ri te ba baa, “Uwae kiye wune arom ku mbe anda, anda ama ku baen ande,

³⁵ amaa arom ti anda ti a kunn nwunn ba uwae iticwu, aba ti Rimam cwe baa, aba na pang pu ba ti aba na sang kununn-wu apupwen, aba u mbe-ba anda be u baen-ba ande be.

³⁶ Ayi nde tu-yi ti aba u cwu cwucwo be, ikyaen ti aba pangma atom Rimam. Aba u si pangma itse-ba Rimam, ikyaen ti aba si ande ti nwunn pu ba uwae iticwu.

³⁷ “Ira risu ande ti cwucwu ti itinwunn-ba ama, Musa tso biben baa, ande ti cwucwu na u nwunn uwae iticwu, ikyaen ti uwae ira ti awu bae risu afub ti ku ten urwa uwae kutur, awu ri ira risu Itsekuru-ti Rimam baa, awu na si Rimam Ibrahim u si Rimam Ishaku u si Rimam Yakubu ama.

³⁸ Rimam si-wu Rimam na ande ti cwucwu be. Awu si Rimam na ande ti site unyang. Uwog-wu, ande meme site unyang, aba ti tsi user ti aba ti cwucwu.”

³⁹ Ariki uwae ande ti ku kwen na ande Icwe Rimam ri baa, “Unde ti uwe, afu ri pang atang.”

⁴⁰ Aba site-ba ti kpakang utob ti a u rang wu ira iki cwucwo be.

Kristi, Unde ti Rimam Tsab Tsi

⁴¹ Ama Yesu rang ba baa, “A nde rimang bae baa, Unde wu ti Rimam Tsab Tsi na u si kang umbae Ukwe Dawuda?

⁴² Dawuda ti risu-wu ri uwae Kutsingken Akyang baa, ‘Rimam ri te Itsekuru-m baa, som kujwo rici-m ike,

⁴³ se ti ame twenji pu m ande ti rika-fu u nda fu ceb risu-ba.’

⁴⁴ Dawuda ri baa, Unde wu ti Rimam Tsab Tsi na si Itsekuru-wu. Asiti awu si Itsekuru-wu, awu u kyang rimang u si umbae-wu cwucwo?”

Yesu Ri Ira Risu Ande ti ku Kwen na Ande Icwe

⁴⁵ Ti ande meme funn ku fxen wu, Yesu ri te ande ti imbyi-wu baa,

⁴⁶ “Ni nung ijwe-ni nyinyang te ande ti ku kwen na ande Icwe Rimam. Aba ku pu arun tiyang tiyang si u ku kyang kyi fe uwog meme u ku sha ti ande na fen ba uwae ritug. Aba ku sha uwog ti som ti rurob uwae asog Rimam ti uwog ti som ti rurob uwog ukwab unda ishe.

⁴⁷ Amaa aba ku ci isu na awa icwu ti tikong. Aba ku jwam Rimam ti rikob ti rikob ikyaen ti ande na tang baa a na si ande ti tinyang. Rikwen ti Rimam u pwen ba u beb skeb tag pu yi ana ande ti tsitsi meme.”