Luka 14 - Kutsingken Ira Rimam ti Saen Kyag

Yesu Nwangru Unde ti Kicaeb

¹ Usir ikyinn iki Yesu nwunn u ru ka ci wuci kununn unde iki ti si unde tiyang uwae kumbub Farisi. Ande iki ta atang ama u ku sae-ba wu.

² Unde iki ti afxen-wu ti ajwo-wu mbumbwe, ru ba uwog Yesu.

³ Yesu sa ra unju tso u rang ande ti ku kwen na ande Icwe ti ande ti kumbub Farisi baa, “Uwae Icwe-ti, ayi kpang atang ti a u nwangru unde Usir ikyinn ree re ti yi kpang-yi atang be?”

⁴ Amaa aba ri-ba ira iki be. Yesu sa kujwo ye ra unde ti kicaeb wu u nwangru wu u tē wu ru.

⁵ Tiri awu ri te ande ti funn atang baa, “Asiti umbae unde iki uwae-ni ko indag-wu a jwunnsi uwae kukwae ambyi Usir ikyinn, awu u pyir u shir umbae wu ko indag-wu tso-wu be baa, ayi na si Usir ikyinn a?”

⁶ Ande ba shanum te ira ti aba u ri.

Ure ti Risu ti Nae Riben

⁷ Uwog ukwab atang, Yesu nung ti ande ti rikyen ku tsab uwog ti tinyang titawe u ku ru ka som atang. Ikyaen yine awu sunn na ba ira iki baa,

⁸ “Kiye ti a yae ni ru ka uwog ukwab unda ishe, ni tsab-ni uwog ti ti som ti tinyang ti ni ru ka som atang be. Ikyaen ti, iki be a u yae unde iki ti skeb fu te riyinn ama.

⁹ Asiti afu a kyae ijwe-fu som mam pu fu risu iken ti som wu, ama unde wu ti ifaen a ka ru ba, unde ti yae ni u ba ri te fu baa, ‘Sunwunn ti nda unde wune uwog ti som-fu,’ i si iken ti ku wae rukwae ti afu u nwunn u ru ka som iken ti som ti riben.

¹⁰ I nyang skeb, asiti a yae fu ru ka uwog ukwab, som iken ti som ti riben. Asiti unde ti yae fu a ru ba nung fu, awu u ri baa, ‘Urwan, sunwunn ru ba som uwog ti tinyang.’ Ayine u nda fu rurob uwe ande ti rikyen ti tsitsi meme.

¹¹ Ikyaen ti, unde titini ti a ku sha ti wu tso risu-wu baa, awu na ko pu wu, a u shir wu si yi riben, ama unde titini ti a nae risu riben, a u nda wu kuko.”

¹² Tiri Yesu ri te unde wu ti yae wu ba wuci baa, “Kiye ti afu a nde ukwab tsi ikyaen ande, yae-fu arwan-fu be, ko ameinja-fu, ko ande ti kununn-fu ko ande ice-fu ti rifunn be, ikyaen ti, usir iki aba u yae fu ama u pae na fu iken ti tinyang-fu ti atang.

¹³ Kiye ti afu a nde ukwab tsi, yae ande ti rikaen, ande ti kwar ijwe, ti ande ti cwu afxen ti ande ti mbub ayib.

¹⁴ Yi fengo yine, afu u tu itinyang timambe ikyaen ti, aba u pae na tu-ba afu be. Rimam u pae na fu kiye ti ande ti tinyang a nwunn uwae iticwu.”

Ira ti Sunn Risu Ukwab Tiyang

¹⁵ Unde kinjo uwae ande ti som risu tebur atang fxen ira yine u ri te Yesu baa, “Ande ba ti u ru ka ci ukwab Kujwokwe Rimam, ana-ba nyang timambe!”

¹⁶ Yesu ri te wu baa, “Unde iki ta atang, awu nde ukwab ken tag. Awu yae ande ko timambe.

¹⁷ Ru ba sang usir ukwab, awu tom upyi-wu ti a na ka ri te ande ba ti a yiyae baa, a na ba-ba tiri, ikyaen ti, wuci na ben pu yi.

¹⁸ Amaa, meme-ba ti kinjo ti kinjo pyir-ba, u shaen baa, aba na u ba-ba be. Urwan-wu ti kucang ri te upyi wu baa, ‘Ru ka ri te wu baa, ame na jab risaen tishe, ame na u ru kaa baen wu. Ri te unde ti kununn-fu baa, awu na ye utob.’

¹⁹ Urwan-wu ti ifaen ri baa, ‘Ame jab indag rijwe ti ku tom ritom, ame ku ru tine ti m ka myae yi.’

²⁰ Uriki ri ana-wu baa, ‘Ame mbe unda tishe, ame u ba fob-m be.’

²¹ Unde ti atom kafe ba u ba ri te unde ti kununn-wu meme iken ti a ri te wu. Rinae tso wu. Awu ri te upyi-wu baa, ‘Ru ti ritsen yi fengo ukum ti fengo ti afxen, ka kunn na m ande ti rikaen ti ande ti kwar kyi ijwe ti aba ti mbub ayib fa ti aba ti cwu afxen.’

²² A paji kpang upyi-wu ka kafe ba ri te wu baa, ‘Itsekuru, ame nde pu m iken ti afu ri, amaa uwog ti som tsitsi ti atang.’

²³ Unde wu ri te upyi-wu baa, ‘Ru yi fengo ti ka si yi ufang ti uwog ti ande ku funn atang meme ti ka shir ande atang ba. Ri te ba ti a na sang ba kang, ikyaen ti uwog ā munn kyikyi ti ande.

²⁴ Kubenti ti ame ku ri te fu, uwae ande ti ame yae ba a shaen u ba-ba be, ko unde kinjo uwae-ba u sa unju mbwa-wu wuci ti ame nde tsi ne be.’ ”

Iken ti Unde u Nde Titawe Awu u Si Unde ti ku Putsa Yesu

²⁵ Usir iki ti itub ande putsa Yesu ku ru, awu kafe uwe tag ba u ri te ba baa,

²⁶ “Asiti unde iki uwae-ni a ku sha ti wu na u putsa me, asiti wu a pyir-wu ite-wu ti iya-wu ti uwa-wu ti anyisu-wu, ti ameinja-wu ti ambakaya-wu be, u pyir-wu risu-wu be ama, awu u si-wu unde ti u putsa-m be.

²⁷ Unde ti a su-wu kutuku ti ta cice-wu u putsa-wu ame be, awu nde tu-wu ti wu u fa uwae ande ti putsa-m be.

²⁸ Asiti unde iki uwae-ni a ku sha ti wu u mbye kusog tiyang, awu u som-wu riben titawe u kab iken ti kusog wu u wen, ko aser-wu u ko ti wu mbye cwunn kusog wu be a.

²⁹ Asiti awu a nde-wu ayine be, isim ti awu a ta mam umbyi kusog-wu, u mbye cwunn-wu kusog-wu be, meme ande ti nung ira yi u skaen wu ikyaen.

³⁰ A u ri baa, ‘Unde wune ye wande kusog wune ama awu mam-wu wande yi be.’

³¹ “Asiti ukwe iki a site akyirten kumbub rijwe u ku pwen ti wu na u ru ka ta rika te ukwe iki ti site akyirten kumbub rikom, awu u tawe som riben u kab u nung baa, ko awu na site kpakang ti wu u ta rika te ukwe wune bara.

³² Asiti awu a nung baa, awu na u ci-wu rika yi be, ti ti unde ti rika-wu ta fengo ti rwen, awu u ka jwam wu ti a na ye urwan tetso.”

³³ Ricwunnkyi-yi Yesu ri te ba baa, “Ti mbwe-yi ama, unde iki uwae-ni u si tu-wu atugbug-m be, se ti awu a ya iken ti awu site yi meme ta pu wu titawe!

Ira ti Myae Risu Rinwaen

³⁴ “Rinwaen si iken ti tinyang, amaa asiti ayi a ya utug-yi ta, iken iki ti afu u nde ti ayi u nyang utug ti atang ta-yi be.

³⁵ Ayi u nyang-yi cwucwo be. A u sa yi sur yaen mbub, ikyaen ti, ayi nyang-yi cwucwo be, ko ti a u pu si ijwe wuci uwae rukong, ko ti a u nde tāki te yi. Unde titini ti site atong, awu ā fxen!”