Kucangtsi 9 - Kutsingken Ira Rimam ti Saen Kyag

Rimam Nde Nuhu ti Ishikununn-wu Itinyang

¹ Rimam nde Nuhu ti anyisu-wu itinyang, u ri te ba baa, “Ni mbae jwunn, ti ni jwunn kyife utense meme.

² Ikyenricwu-fu u ye meme ibye, ti inung ti apupwen, ti meme iken ti ku kun riben, fa ti iwag uwae uyinn. Ame pu yi meme na pu m afu kujwo.

³ Meme iken ti site unyang ti ku kyang riben, u si wuci-ni. Pangma ti ame nda ni atsing utong, tine ame nda pu m ani meme iken ti ayi ā si wuci-ni.

⁴ Ibye ti ani u kub-ni be, si nyáng ibye ti a yerwen-ba wu wen be, ikyaen ti anying si unyang.

⁵ Anying ti si unyang ana ni. Kubenti, ame u rang anying unde kujwo unde ti a yaen mbub anying unde iki. Ibye anyi ti a wen unde, ame u pwen wu rikwen iticwu ama.”

⁶ “Unde ti a yaen mbub anying unde, si sí unde ama ti u yaen mbub anying-wu. Ikyaen ti, Rimam kyae unde rukwer ijwe-wu.

⁷ Ana-fu, mbae yag yag, ti fu mbae jwunn utense.”

⁸ Ama Rimam ri te Nuhu ti anyisu-wu baa,

⁹ “Nung, ame ku yer unju te ni, ti anyisu-ni, ti itso-ni ti ku ba uwe,

¹⁰ ti meme iken ti site unyang, ti inung, ti asinn ti ibye anyi, ti meme iken ti site unyang ti ruye uwae kuyae.

¹¹ Unju ti yer ti ame ku yer te ni ta re: Tsi yaka ru fife yi uwe, ame u twenji-m utense fa ti meme iken ti ku nyang unyang ti ambyi cwucwo be.”

¹² Ama awu ri kyi baa, “Iken ti u tatso unju ti yer kutampwa-m te fu, ti meme iken ti ku nyang unyang fa ti ande ti ku ba uwe ta re.

¹³ Ame sa usirwowo tso uwae kubyi. Ayine u tatso unju ti yer kutampwa-m ti utense.

¹⁴ Ko kiye titini ti upwen a jwom, ama usirwowo a tso,

¹⁵ ame u tangsom te unju ti yer kutampwa-m te fu, ti meme iken ti ku nyang unyang ti tsitsi. Ambyi u munn-yi ti u wen tag iken ti ku nyang unyang uwae utense cwucwo be.

¹⁶ Ko kiye titini ti usirwowo a tso, ame u sae u tangsom ti unju ti yer-m ti tsi kukunn kutampwa-m Rimam ti meme itso iken ti site unyang uwae utense.”

¹⁷ Ama Rimam ri te Nuhu baa, “Usirwowo wu ti si iken ti ku tatso unju ti yer ti ame yer kutampwa-m, ti meme iken ti site unyang ti ta uwae utense.”

Nuhu te Ishikununn-wu

¹⁸ Anyisu Nuhu ti ruye uwae kuyae si Shem, ti Ham, ti Jafeti (Ham si itse na Kanana).

¹⁹ Ru ye uwog anyisu Nuhu ita bane, ti ande mbae shag kyife utense.

²⁰ Ama Nuhu bag ku tom ritom, u yen ituku anam uwae risaen-wu.

²¹ Usir iki, awu kwaen awaen-yi u ngwa kyaen ambyi yi ti nununn. Ayi ye wu, awu nae ribam uwae kufug-wu.

²² Ham, itse na Kanana, nung itse-wu nae ribam, u ruye ka tsag te ameinja-wu ise.

²³ Ama Shem ti Jafeti pu atupwa cwutsa ukwae-ba, u ru ti isim ti isim ka burkyi ribam na itse-ba. Ayib-ba sae-yi ribam itse-ba be.

²⁴ Kiye ti ayib Nuhu tan, ti awu fxen iken ti umbae ricwunnkyi-wu nde te wu,

²⁵ awu ri baa, “Kufwag ā ta risu Kanana! Awu u si upyi na apyi ameinja-wu.”

²⁶ Nuhu ri kyi baa, “Itinyang ā si ana Yaweh, Rimam na Shem! Kanana ā si upyi Shem.

²⁷ Rimam ā nda Jafeti ujwunn ande! Rishi na Jafeti ti ana Shem ā som usom tetso. Kanana ama ā si upyi na Jafeti.”

²⁸ Isim ti ambyi munnkyi utense, Nuhu som asang ukob ita ti mae ifaen mbe rijwe (350).

²⁹ Meme asang na Nuhu ka ukob itsongnje ti mae ifaen mbe rijwe (950), ama awu cwu-wu.