Kucangtsi 7 - Kutsingken Ira Rimam ti Saen Kyag

Rimam Twenji Utense te Ambyi

¹ Yaweh ri te Nuhu baa, “Sang uwae kuyae, afu ti ishikununn-fu, ikyaen imi, ame nung, afu amam ti si unde ti kubenti uwae ande ti ta utense tine.

² Pu ibye ti sisaen ifaen-ifaen atsepu itsongfaen, tishir ti tiyae. Ye ayi ti ajib ifaen-ifaen, ti urom te ti unda.

³ Ye inung ifaen-ifaen, ka atsepu itsongfaen ama, itishir ti itiyae, ikyaen ti ayi ā ba mbae jwunn uwae utense.

⁴ Isim usir itsongfaen ti ku ba uwe ne, ame u sa upwen tsa usir mae ifaen ti utitang mae ifaen, u twenji meme iken ti site unyang ti ame kyae.”

⁵ Ama, Nuhu nde meme iken ti Yaweh ri.

⁶ Nuhu site asang ukob itsongnjo kiye ti ambyi munnkyi utense.

⁷ Nuhu ti uwa-wu, ti anyisu-wu ti awa-ba, sang uwae kuyae, ti a u ter nwang ambyi ti u ba munnkyi utense wune.

⁸ Itso ibye, itisaen, ti iti ajib, ti inung, ti meme iken ti ku kun riben, ti meme iken ti Rimam kyae, ti ku kyang riben meme,

⁹ tí ifaen tí ifaen, itishir ti itiyae, ba tu Nuhu. Awu pu yi sang uwae kuyae pangma ti Rimam ri te wu.

¹⁰ Ti usir itsongfaen nde pu yi, upwen tsa tsa tsa, ambyi munnkyi utense.

¹¹ Uwae asang ti fa ti ukob itsongnjo (600) na Nuhu, usir ti rijwe asu itsongfaen na ishaen ti ifaen, usir wune si usir ti isatsub kyeb tsoye ko aka, ufu ambyi ti apupwen patag mbubta.

¹² Upwen kum kum kum, usir mae ifaen ti utitang mae ifaen.

¹³ Tí usir wu, Nuhu ti anyisu-wu, Shem ti Ham ti Jafeti ti uwa-wu fa ti awa anyisu-wu, sang uwae kuyae.

¹⁴ Ibye kutur ti itso-yi, asinn ti itso-yi, iken ti ku kun riben ti itso-yi, inung ti apupwen ti itso-yi, aba pu yi sang tag te ijwe-ba uwae kuyae atang.

¹⁵ Patag itso iken ti site unyang ba ti ifaen-ifaen, ama Nuhu pu yi sang uwae kuyae.

¹⁶ Ayi ti sang si itishir ti itiyae ti itsotso ti site unyang, pangma ti Rimam ri te Nuhu. Ama Yaweh cwunnkyi ufu kuyae wu.

¹⁷ Ambyi munnkyi utense ka usir mae ifaen. Ayi munn ku tso, munn ku tso ama u su ra kuyae wu tso fife yi apupwen.

¹⁸ Ambyi munn, u kyebkyi utense, kuyae ku kyang yinn yinn risu ambyi.

¹⁹ Ambyi yi munnkyi kwer ti meme rikwen ti tso siskeb uwae utense.

²⁰ Rurong na ambyi ti munn nyatsa utaen rikwen yi si kutun-kujwo rijwe asu itsong.

²¹ Meme iken ti site unyang ti ta uwae utense cwu tag, inung, asinn, ibye kutur, ti akako iken ti site unyang meme, fa ti ande, cwu tag.

²² Patag iken ti ku kyang riben, ti ku nyang unyang ruwen, cwu tag.

²³ Rimam fen tag meme iken ti site unyang ti ku kyang riben uwae utense, ibye ti ande, fa ti inung ti apupwen meme. Nuhu amam ti tsi ti unyang, ti aba ti ta te wu uwae kuyae.

²⁴ Ambyi munnkyi utense ka usir ukob kinjo ti mae ifaen mbe rijwe (150).