Kucangtsi 6 - Kutsingken Ira Rimam ti Saen Kyag

Anyisu Ande Ndembeb ku Fufa Uwae Utense

¹ Ti ande jwunn ku fufa uwae utense, ama aba mbae anyisu ti anda,

² anyisu Rimam ti arom nung anda ti tinyang ti ande ku mbae, aba tsab ati waen timambe uwae-ba, u pu ba mbe.

³ Tiri Yaweh ri baa, “Kusung-m, ti ku nda unyang, u som kunn-wu te ande ru fife yi uwe cwucwo be, ikyaen ti, aba si anying ti ibye ijwe. Bag tine ru yi uwe, asang-ba u yafe-yi asang ukob mbe rikom (120) be.”

⁴ Kiye wu ti anyisu Rimam ti arom ba nae te anyisu ande ti anda, aba mbae ukam ande ti rinyi-ba pu iten. Aba som utense uwae kiye wu, ti uwae kiye iki kpang isim-yi.

⁵ Yaweh nung itibi ande ko ku fufa uwae utense, meme ira ti kab ande munn te ira titibi.

⁶ Ayi ndembeb Yaweh utob ti awu kyae unde uwae utense. Utob-wu ndembeb si-yi ti ti ri be.

⁷ Ikyaen yine, Yaweh ri baa, “Ande ti ame kyae, ame u twenji ba uwae utense – aba ti ibye ti rimang meme. Iken ti ku kyang riben, ti inung ti apupwen meme, ayi nyangskeb ti ame ú kyae-m ayi be.”

⁸ Amaa Nuhu tu kutxuwe titinyang uwe Yaweh.

Nuhu Tu Kutxuwe Tinyang Uwe Rimam

⁹ Ayine si kuci na Nuhu. Nuhu si unde ti kubenti, ti som usom ti pang atang uwae ande ti tsitsi kiye-wu. Awu kyang ikyin te Rimam.

¹⁰ Nuhu site anyisu ti arom ita, Shem ti Ham ti Jafeti.

¹¹ Rimam nung baa, meme ande na ndembeb pu ba, u munn te ikentitibi fa ti utob ti byag.

¹² Rimam sae utense ndembeb pu wu, ikyaen ti ande ti ta uwae utense ye usom ti som-ba ndembeb pu ba.

¹³ Tiri Rimam ri te Nuhu baa, “Ame sa tsi pu m ti m u wenji tag ande ti utense, ikyaen ti kubyagkwa ti ira titibi munnkyi tag utense ikyaen-ba. Ame u fen pu ba ru ye utense.

¹⁴ Ikyaen yine, kyae na ijwe-fu kuyae na kutuku titinyang, ti kpakang. Kata wu kusog-kusog, ti fu fxebkyi wu, uwae ti ise meme, ti kindob koltai.

¹⁵ Fengo ti afu u kyae kuyae wu ta re. Rikob-wu ti risang u si afxen ukob inje ti mae ifaen mbe rijwe (450), riyaen-wu ama u si afxen mae ita mbe rijwe asu itsong (75), rikob-wu ti ritsen ama u si kutun kujwo rijweta (30).

¹⁶ Kyae rukub risu kuyae wu, ti fu kyae riye ti ka afxen kinjo ti ripye yi rikob-wu tirisang ti ti ritsen meme. Kata uwae kuyae wu ita, tī riben, tí tī kutampwa, tí tī apupwen. Sa ufu kinjo tsi iyen kyab kuyae wu.

¹⁷ Nung! Ame u nda ambyi u munnkyi utense, u twenji meme iken ti site unyang. Meme iken ti site unyang uwae utense ne u twenji tag.

¹⁸ Amaa, ame u yer unju te fu, afu ti uwa-fu, ti anyisu-fu, ti awa-ba, u sang uwae kuyae wu.

¹⁹ Pu meme itso iken ti site unyang ifaen-ifaen, tī urom tí ti unda, sang fa uwae kuyae atang, ti itso-yi ā twenji-yi be.

²⁰ Ye itso inung, ti itso ibye, ti itso iken ti ku kun riben, ifaen-ifaen sang uwae kuyae, ikyaen ti ayi ā twenji-yi be.

²¹ Pu wuci ti itsotso yang-yi sang uwae kuyae atang ikyaen ti ayi u si wuci-ni ti wuci ana ibye yi.”

²² Nuhu nde putsa meme iken ti Rimam ri te wu.