Kucangtsi 50 - Kutsingken Ira Rimam ti Saen Kyag

Yusufu Jwub Ricwu Itse-wu

¹ Yusufu jwunnsi ka wong shi rukom itse-wu, u jwub u ye wu bur utob.

² Yusufu ri te apyi-wu, ande ti ku ter acaeb baa, a na jwo rukom itse-wu ti a na shi wu kindob rukom. Ama a shi Isirela kindob rukom.

³ Wande kindob ti shi yine ku sa usir mae ifaen ti rimunn. Ande ti Ejib jwub ricwu-wu usir mae ita mbe rijwe.

⁴ Ti usir ricwu ti jwub nyatsa pu yi, Yusufu ri te ande ti uwe kusog Ukwe baa, “Asiti ame a tu kutxuwe tinyang uwe-ni, ni ri ira te Ukwe kutunn unju-m. Ni te wu baa,

⁵ Kiye ti itse-m na kyang ku yaen pu wu ti awu na u cwu, awu nda m ame na ben uben baa, ame na u sa wu kaa nji uwae kuskab ti awu na mum tsi ka ijwe-wu yi uten ti Kanana. Tine ame ku jwam ni, ni nda m riyae ti m ru kaa nji itse-m ti m kafe ba.”

⁶ Ukwe cwe baa, “Ru ka nji itse-fu, pangma ti awu nda fu ben uben ne.”

⁷ Ikyaen ayine, Yusufu nwunn tso ti wu kaa nji itse-wu. Meme apyi ukwe, ti ande ndufu ti ishikununn-wu, ti ande ndufu uten Ejib putsa wu,

⁸ kwer ti ande ti ta ishikununn Yusufu, ti ameinja-wu, ti ishikununn itse-wu. Si nyáng anyisu ti asinn amam ti a yata ti Goshen.

⁹ Itaen ti ku tso kuskus ti kya fa kakum ti ande ti ku tso kakum meme putsa ba ru. Kucwug ande ti ru ko timambe.

¹⁰ Ti aba ru ka sang utae Atadi, ukunn unyim ti Yordan, aba jwub ira ti utob ti byir atang. Yusufu jwub ricwu itse-wu ka usir itsongfaen.

¹¹ Ti ande ti Kanana ti nae atang nung itijwub ricwu yine yi utae Atadi, aba ri baa, “Ricwu yine si kang ricwu unde ti rurob ti ande ti Ejib ku jwub.” Nee iken ti nde uwog atang ti ta fer Jordan, aba ku kunn wu baa, Abila Mizirayim.

¹² Ama anyisu Yakubu nde iken ti itse-ba ri te ba baa, a na nde.

¹³ Aba su rukom-wu ru yi uten ti Kanana u ru ka nji wu risaen ufang ana Makpela, fer Mamre. Riben wu si ti Ibrahim jab kujwo Efiron unde ti Hiti, ti aba na a u ku nji ande atang.

¹⁴ Isim ti Yusufu nji mam pu wu itse-wu, Yusufu ti ameinja-wu ti meme ande ti putsa wu ru ka nji itse-wu, kafe ru yi Ejib.

Yusufu Ri Kpag Ameinja-wu Utob

¹⁵ Isim iticwu itse-ba, ameinja Yusufu ri tetso baa, “Iki be Yusufu si te utob ti byir te ti, u pwen ti wu u pae na ti itibi ti ati nde wu re.”

¹⁶ Ikyaen yine, aba tsa kutsa ka tu Yusufu u ri te wu baa, “Itse-fu ri ira iki te ti kiye ti awu cwu-wu khika be.

¹⁷ ‘Awu ri baa, ri te Yusufu, ame ku jwam fu, yata na ameinja-fu meme riraen ti ikentitibi-ba ti aba nde te fu ti beb timambe.’ Tine ati ku jwam fu, yata na ti riraen ti ati raen fu, ati apyi Rimam ana itse-fu.” Ti Yusufu fxen ira-ba yine, awu jwub ira.

¹⁸ Ameinja-wu ama ba ku riben uwe-wu u ri baa, “Ati si apyi-fu.”

¹⁹ Amaa Yusufu ri te ba baa, “Ni kyen-ni ikyenricwu be. Ame si-m Rimam be.

²⁰ Ani kab ti ni na nde m titibi, amaa Rimam sa yi kafe titinyang ikyaen ti, ande yang-ba na tu itinwangru.

²¹ Ikyaen yine, ni kyen-ni ikyenricwu be. Ame u sha na ni iken ti ani ku sha ti anyisu-ni meme.” Awu ri kpag ba utob, u nda utob-ba nae riben.

Iticwu Yusufu

²² Yusufu ti ishikununn itse-wu som Ejib. Awu nde asang mae itsong mbe rijwe.

²³ Yusufu som u nung anyisu ana anyisu Efiremu ti ita, ti anyisu Makir umbae Manase. A mbae ba meme kufxen Yusufu.

²⁴ Yusufu ri te ameinja-wu baa, “Ame kyang ku yaen pu m ti m u cwu, amaa Rimam u ba uwog-ni ti wu ba pu ni ruye uten wune, ru yi uten ti awu yer unju ti uben ti ben ti awu na u nda Ibrahim ti Ishaku ti Yakubu.”

²⁵ Yusufu nda anyisu Isirela yer unju te wu baa, “Rimam u ba uwog-ni, ama ani u su akub-m ru te yi.”

²⁶ Isim ayine, Yusufu cwu. Awu site asang mae itsong mbe rijwe. Isim ti aba shi wu kindob rukom, aba sa wu nae si akpati rukom yi Ejib.