Kucangtsi 49 - Kutsingken Ira Rimam ti Saen Kyag

Yakubu Wae Ira na Anyisu-wu

¹ Yakubu kunn funn anyisu-wu u ri baa, “Ni funn atso ti m u ri te ni iken ti u ba tu ni uwe ike.

² Ni ba funn, ti ni fxen, ani anyisu Yakubu. Ni fxen itse-ni Isirela.

³ Roben, afu ti si umbae rifen-m, u si kpakang-m. Itimbae-fu tatso baa, ame na si urom. Afu ti skeb ti rurob, u skeb ti ribom.

⁴ Afu ku som-fu skirr be, ku yaen ka yaen ba pangma ambyi. Afu u si-fu ti rurob cwucwo be, ikyaen ti, afu nae te uwa itse-fu, u pu ajib tso uwaen itse-fu.

⁵ Simeyon ti Lawi si inja atso, a pu isu rika-ba ku sha ira atang.

⁶ Ame u ta-me uwae itifunn-ba be, ame u putsa-m kumbub-ba be. Ikyaen ti, uwae rinae, aba wen ande. Uwae ira ti nghaen-ba, a yer tsen indub afxen indag.

⁷ Kufwag ā ta risu-ni, ikyaen ti rinae-ni ku tso fuuu. Ani byag utob, u si-ni te ayibrisi be. Ame u kashag ba uwae uten Yakubu, u pu ba byinn shag uwae Isirela.

⁸ “Yawuda, ameinja-fu u ku teb fu. Kujwo-fu u baen ye su ande rika-fu ti ukwae. Anyisu na itse-fu u ku riben na fu.

⁹ Yawuda si umbae itumu ti ru ka wen ibye kafe ba ti uwae uwáe-wu, u ba ndab ijwe-wu nae. Aye ti kpag tu utob ti wu u ba shwu wu?

¹⁰ Kutxomkwe u ta kunn ti ishikununn Yawuda. Ukum Ukwe ama u si kunn ana anyisu Yawuda, se kiye ti unde wu ti ukum wu si ana-wu a ba mbe pu wu awu uwog-wu. Ambukwen ande u ba nae risu riben na wu.

¹¹ Awu ku kya umbae ikyinnsu-wu ijwe kutuku anam, kutuku anam ti nyang siskeb. Awu ku jwo atupwa-wu ti ambyi anam, ambyi anam ti byaen pangma anying.

¹² Ayib-wu u byaen pangma ambyi anam, anyi-wu u tsen pangma akang abyaen.

¹³ “Zebulun u nae unju uyinn, u kafe uwog tititsi ana kuyae. Ice riben-wu u ka ti Sidon.

¹⁴ “Isakar si ikyinnsu ti kpakang, ti nae ti isu-wu isim.

¹⁵ Ti awu nung baa, uwog unyang ti pu-wu na nyang, riben wu ti awu nae atang ama na nyang pu wu, awu sa ukwae faesang, ti wu u nde wande ma upyi.

¹⁶ “Dan u pwen rikwén ti kubenti na ande-wu, pangma ti ande ti uwe Isirela ti tsitsi ku nde.

¹⁷ Awu u si ikentibi ti nae fengo, kujwae ti nae ukur fengo. Awu ku pye kakum ti ikyig kufxen ama unde ti ku tso wu kaen si.

¹⁸ “Yaweh, ame som kuji itinwangru-fu.

¹⁹ “Gad, ande rika u pu rika kunn wu, amaa, awu u rwae tsa ba u ci ba rika.

²⁰ “Asher u ci wuci titinyang, ayi u si itso wuci ti a ku pu na abikwe.

²¹ “Nafitali si indxob tiyae ti a ye tu-ba wu be, awu ku mbae umbae titinyang.

²² “Yusufu si kutuku anam ti ku waen awaen, ituku anam ti ku waen awaen ti tsi fer isatsub. Ajwo-wu taen kyife risu ukoh ti pakob risaen ufang.

²³ Uwae rinae, ande rika-wu ba purug wu, aba ba kunn wu ti kubyagkwa, u ta wu.

²⁴ Amaa, kokuta-wu tsi ti kpakang, kujwo-wu ama tsi ti ribom, ikyaen kuko Rimam ti ku kong wu, Rimam Yakubu, Rimam ti ku kyir Isirela, awu ti si kutxú.

²⁵ Rimam itse-fu ti u ndeya fu, Rimam ti skeb titag ti u nde fu tinyang, titinyang ti apupwen, ti titinyang ti ta uwae riben, ti titinyang itimbae na ande ti ana asinn.

²⁶ Itinyang ti itse-fu nda fu skeb pu yi itinyang ti ta risu abab rikwen ti tsi kukunn. Rimam ā pu yi ta risu Yusufu, awu ti a kata wu ti ameinja-wu.

²⁷ “Benjamin si mbuku ti rimenn. Kiskinn awu ku pu ibye ti awu ye kub tag, ureb awu ku ka iken ti awu shir mbe mbe.”

²⁸ Meme bane ti si kukang rijwe asu ifaen na Isirela ba. Ayine si ira ti itse-ba ri te ba kiye ti awu ku wae ira na ba. Ira ti wae yi rukwer ti utso unde ti umbae wu si.

Iticwu Yakubu

²⁹ Ama, awu nda ba ira unju-wu baa, “Kiye kyang ku yaen pu wu ti ame kaa tu ande-m. Ni sa m ka nji te abitse-m yi fifae ti ta ufang Efiron ande ti Hiti.

³⁰ Fifae wu ti ta riben na Makpela, fer Mamre yi Kanana ti nee Ibrahim jab kujwo Efiron unde ti Hiti, ikyaen ti a naa ku nji ande atang.

³¹ Ayi si atang ti aba nji Ibrahim ti uwa-wu Saratu, ti Ishaku ti uwa-wu Rebeka, ayi si atang ti ame nji uwa-m Leyatu.

³² Riben wu, tí fifae wu meme, aba jab wu kujwo ande ti Hiti.”

³³ Ti Yakubu tsag mam ira yi te anyisu-wu, awu pu afxen-wu tso risu uwaen-wu, ama cwu ka tu ande-wu tiri.