Kucangtsi 46 - Kutsingken Ira Rimam ti Saen Kyag

Yakubu ti Ande Kununn-wu Nwunn Ru yi Ejib

¹ Yakubu byir tag isu-wu ti meme iken ti awu site u ye ikyin. Ti awu ru ka sang Beyersheba, awu twen ikentitwen atang na Rimam na itse-wu Ishaku.

² Uwae utitang wu, Rimam kunn Yakubu ira uwae kurwa baa, “Yakubu! Yakubu!” Yakubu cwe ira, baa, “Eén!”

³ Ama Rimam ri baa, “Ame si Rimam, Rimam na itse-fu. Kyen-fu ikyenricwu ti fu ru yi Ejib be. Ame u nda fu kafe mbukwen ande tiyang atang.

⁴ Ame te fu u ru yi Ejib tetso, u kaa pu fu kafe ba ti ike. Afu u cwu fa Yusufu ajwo.”

⁵ Tiri Yakubu nwunn Beyersheba. Anyisu-wu pu wu, fa ti anyisu-ba titinying ti awa-ba sang kuskus ti kya fa kakum yi ti Ukwe ti Ejib nda ba ti a na ka su Yakubu atang.

⁶ Aba pu asinn-ba ti isu-ba ti rifunn ti aba tu uwae Kanana ba te yi yi uten Ejib. Yakubu nwunn ti rishi-wu meme ru yi Ejib.

⁷ Awu nwunn ti anyisu-wu ti arom ti anyisu-ba, ti anyisu-wu ti anda ti anyisu-ba. Awu ti rishi-wu meme ru tetso yi uten Ejib.

Rishi Yakubu

⁸ Rinyi anyisu Isirela ti ru yi uten Ejib ta re. Roben umbae titawe Yakubu

⁹ ti anyisu-wu ti arom. Aba si Hanoki ti Palu ti Heziron ti Karimi.

¹⁰ Anyisu Simeyon ti arom si Jemuwel ti Jamin ti Ohadi, ti Jakin, ti Zohar, ti Shawul ti iya-wu si unda ti Kanana.

¹¹ Anyisu Lawi ti arom si Gershon, ti Kohati ti Merari.

¹² Anyisu Yawuda ti arom si Er, ti Onan, ti Shela, ti Perezi, ti Zera (amaa Er, ti Onan cwu pu ba ti Kanana). Anyisu Perezi ti arom si Heziron, ti Hamul.

¹³ Anyisu Isakar ti arom si Tola ti Puwa ti Yob ti Jashub ti Shimron.

¹⁴ Anyisu Zebulun ti arom si Seredi ti Elon ti Jaleyel.

¹⁵ Abane ti si anyisu ti arom ti Leyatu mbae na Yakubu yi Padan-aram fa ti umbae-wu ti unda Dina. Anyisu-wu ti arom ti ti anda meme-ba si rijweta mbe ita.

¹⁶ Anyisu Gad ti arom si Zefon ti Hagi ti Shuni ti Ezibon ti Eri ti Arodi ti Areli.

¹⁷ Anyisu Asher ti arom si Imna ti Ishiva ti Ishivi ti Beriya ti mbiya-ba Sera. Anyisu Beriya si Heber ti Malikiyel.

¹⁸ Abane si anyisu ti Zilipa, upyi Leyatu ti Laban pu na wu, mbae na Yakubu. Aba ka rijwe asu itsongnjo.

¹⁹ Anyisu ti arom ti Rahel uwa Yakubu mbae si Yusufu ti Benjamin.

²⁰ Yi uten Ejib ama, Asenati umbae Potifera kukwen na Onn, mbae Manase ti Efiremu na Yusufu.

²¹ Anyisu Benjamin ti arom ama si Bela ti Beker ti Ashibel ti Gerar ti Naaman ti Ehi ti Roshi ti Mupim, ti Hupim ti Ardi.

²² Abane si anyisu ti arom ti Rahel mbae na Yakubu. Meme-ba si rijwe asu inje.

²³ Umbae Dan si Hushim.

²⁴ Anyisu Nafitali ti arom si Jazeyel ti Guni ti Jezer ti Shilem.

²⁵ Abane si anyisu ti Biliha, upyi Rahel ti Laban pu na wu, mbae na Yakubu. Aba ka itsongfaen.

²⁶ Meme ujwunn ande ti te Yakubu ru yi uten Ejib si mae ita mbe itsongnjo. A pwen awa anyisu-wu fa-ba atang be.

²⁷ Anyisu Yusufu ti awu mbae yi Ejib si ifaen. Ujwunn ande ti ishikununn Yakubu ti ru Ejib ka mae ita mbe rijwe.

Yakubu Ru yi Ejib

²⁸ Yakubu tom Yawuda ka tu Yusufu ti wu na ba tu ba yi Goshen. Ti aba ka sang Goshen,

²⁹ Yusufu nwunn ti kuskus ti kya fa kakum-wu ti wu ka tu itse-wu Isirela yi Goshen. Ti Yusufu ba uwe itse-wu, awu tso risu-wu uwe itse-wu ama u ye wu bur utob u jwub ira jwujwujwub.

³⁰ Isirela ri te Yusufu baa, “Tine ti ame nung pu m afu ti ayib-m baa, afu na ta ti unyang, ame u cwu-m tiri.”

³¹ Ama Yusufu ri te ameinja-wu ti ishikununn itse-wu baa, “Ame u ru kaa ri ira ti Ukwe baa, ‘Ameinja-m ti ishikununn itse-m ti ta Kanana ba pu ba uwog-m.

³² Ande ba si ande ti ku shi iken. Aba ku nungkyi asinn. Aba pu asinn-ba ayi ti meme iken ti aba site ba te yi.’

³³ Kiye ti Ukwe a kunn ni ira, ku rang kujwo wande-ni,

³⁴ ni ri te wu baa, ani na si ande ti ku shi asinn ti kiye ti ani na si anyisu tinying ba ku kwer tine, ikyaen ti, ayi na si kujwo wande abitse-ni. Ayine u nda wu, awu u nda ni som Goshen, ikyaen ti, ande ti Ejib ku cwe-ba ira ande ti ku shi asinn be.”