Kucangtsi 45 - Kutsingken Ira Rimam ti Saen Kyag

Yusufu Tsó Risu-wu te Ameinja-wu

¹ Ama Yusufu ye fob-wu utob-wu uwe apyi-wu cwucwo be. Awu nda ba ruye tag kusog atang meme. Unde iki ta te-wu awu atang kiye ti awu tsó risu-wu te ameinja-wu be.

² Awu jwub ira tso ise, ka fob ti ande ti Ejib fxen wu. Iten ira ti jwub-wu ayi ka sang ishikununn ukwe.

³ Yusufu ri te ameinja-wu baa, “Ame ti si Yusufu wu. Itse-m ta ti unyang ara?” Unyang kunn ba. Aba ri tu-ba ira cwucwo be. Ijwe-ba ku fufwer.

⁴ Ikyaen yine Yusufu ri te ameinja-wu baa, “Ni ko ba fer m ike.” Ti aba ko ba, awu ri te ba baa, “Ame si inja-ni Yusufu ti nee ani sa jabci na ande ti Ejib.

⁵ Tine ni yer-ni anying utob be, ti ni ndembeb-ni utob tetso ikyaen ti ani sa m jabci ba ike be. Rimam tom m ba ike uwe-ni ti m na ba nwangru unyang ande.

⁶ Rimenn pu uten ka pu yi asang ifaen tine. Asang itsong ti tsitsi uwe, ande u tom-ba ritom be, u bunn-ba wuci be ama.

⁷ Rimam tom m ru uwe-ni, ti m na ba nwangru utso-ni uwae utense, u nwangru unyang ande yang-ba.

⁸ Ikyaen yine, ayi si-yi ani ti tom m ba ike be, ayi si Rimam. Awu nda m ta risu ande kununn-wu ama u si unde ti uwe yi meme uten Ejib.

⁹ Tine ni kafe ru uwog itse-m, ti ni ka ri te wu baa, ‘Ira ti umbae-fu Yusufu ri ta re: Rimam nda m ta risu meme uten Ejib. Ci-fu kiye be, ba tu m ike.

¹⁰ Afu u ba som yi Goshen fer te m, afu ti anyisu-fu, ti anyisu na anyisu-fu, ti asinn-fu, ti ikentishi-fu, ti meme iken ti afu site.

¹¹ Atang, ame u sha na fu, ti ishikununn-fu wuci, ikyaen ti, ani ā cwu-ni rimènn be. Rimenn ti pù uten ne, u nde ka kyi asang itsong.’

¹² Tine ani sae pu ni ti ayib-ni, Benjamin ama sae pu wu baa, ame Yusufu ti na ku ri ira yine ti unju-m te ni.

¹³ Ni ri te itse-m itso rurob ti ame site yi Ejib, ti meme iken ti ayib-ni sae. Ni ru ti kufe ti ni ka pu itse-m ba tu m ike.”

¹⁴ Isim ayine, awu ye Benjamin bur utob u jwub ira, Benjamin ama jwub ira.

¹⁵ Awu ye ameinja-wu meme bur utob u jwub ira. Isim-yi ameinja-wu te wu tsag akaen.

¹⁶ Ti iten ira yi ka sang kununn Ukwe ti Ejib baa, ameinja Yusufu na ba pu ba, Ukwe ti ande imbyi-wu meme tsen utob.

¹⁷ Ama Ukwe ri te Yusufu baa, “Ri te ameinja-fu, ‘Iken ti ani u nde ta re. Ni pu isu-ni baen ikyinnsu-ni ti ni kafe ru ti Kanana,

¹⁸ ti ni ka pu itse-ni ti ande-wu meme ba tu m ike. Ame u sana ni riben ti nyang siskeb patag uwae uten Ejib ike. Ani u ci ti tinyang riben wu.’

¹⁹ Ri te ba ti a pu kuskus iki yi Ejib ike ru, ti a ka su anyisu-ba, ti awa-ba, ti a pu itse-ba ba.

²⁰ Ni kab-ni ira risu iken ti ani site be, ikyaen ti iken ti nyang siskeb uwae uten Ejib si pu yi ana ni.”

²¹ Ama anyisu Yakubu (Isirela) nde iken yi ti a ri te ba. Yusufu pu na ba kuskus ti kya fa kakum pangma ti Ukwe ri, u nda ba iken ti a u ci fengo.

²² Yusufu pu na meme ameinja-wu atupwa titishe, amaa ana Benjamin, awu pu na wu ayaen azurfa ukob ita ti atupwa tishe itsong.

²³ Iken ti awu pu na ba ti a na pu ka na itse-wu si ikyinnsu tishir rijwe ti su iken titinyang na Ejib, ti ikyinnsu tiyae rijwe ti su ayaen alikama, ti buredi, ti wuci ti itse-wu u ci fengo, kiye ti aba a kafe ku ba.

²⁴ Tiri awu tē ameinja-wu, u fa ba kusen baa, “Ni sha-ni usum fengo be.”

²⁵ Aba nwunn u ya Ejib ta u ka tu itse-ba Yakubu uten Kanana.

²⁶ Aba ri te wu baa, “Yusufu ta ti unyang. Awu ta risu uten Ejib meme.” Ayib fur Yakubu. Awu ru-wu kubenti ira-ba ayi be.

²⁷ Amaa, ti aba ri tag te wu ira ti Yusufu ri te ba, ama ti awu sae kuskus ti kya fa kakum yi ti Yusufu tom ba ti a na ba su wu kafe ru, utob itse-ba Yakubu si fa.

²⁸ Ama Isirela (Yakubu) ri baa, “Tine, ame ru kubenti baa, umbae-m Yusufu na ta ti unyang. Ame u ru ka nung wu titawe ame u cwu.”