Kucangtsi 44 - Kutsingken Ira Rimam ti Saen Kyag

Yusufu Txae Ameinja-wu Kutxae

¹ Yusufu nda unju na upyi-wu baa, “Pu wuci si ba uwae ibae kpang ti ukwae-ba, ti fu sa aser unde titini si ti uwae usu-wu.

² Sa kitu ambyi azurfa-m ne si fa uwae usu umbae ti tinying uwae-ba, ti aser awum-wu meme.” Ama awu nde ti bara-yi ti Yusufu ri te wu.

³ Ti ucwefam ku yae, awu tē ameinja-wu. Ama aba ti ikyinnsu-ba nwunn ru ba tiri.

⁴ Ti ti aba ru-ba rurwen khika be, Yusufu ri te upyi-wu baa, rwae tsa ande bane ti kufe. Afu a rwae ye pu fu aba, rang ba baa, “Imi ti nde ani pae titinyang-m ti itibi? Imi ti nde ani yib ra kitu ambyi azurfa-m?

⁵ Awune si-wu kitu ambyi unde ti kununn-m, ti awu ku ngwa iken atang, u ku caen ira te wu be a. Iken ti ani nde ne, si riraen ti beb timambe.”

⁶ Kiye ti upyi wu rwae ye pu wu aba, awu ri ira yine te ba.

⁷ Aba ri te wu baa, “Itsekuru-m, imi ti nde afu ku ri itso ira yine? Apyi-fu u nde-ba itso iken yine be!

⁸ Nung, aser ti ati ka tu uwae ibae-ti kiye ti ati nwunn ike ku ru yi Kanana, ati sa kafe ba na-ti ani be a. Ikyaen imi ti ati u yib azurfa ko zinariya uwae kusog unde ti kununn-fu?

⁹ Asiti afu a tu kitu ambyi azurfa wu kujwo upyi-fu iki uwae-ti ike, wen-fu awu, ati ama u kafe apyi-fu.”

¹⁰ Unde wu cwe baa, “Ayi ā si pangma ti ani ri. Unde ti a tu kitu wu kujwo-wu, awu amam ti u kafe upyi-m, ani ande ti tsitsi u ru-ni.”

¹¹ Ti ritsen, meme-ba ye isu-ba si riben u saen yi.

¹² Ama unde wu bag itisha isu yi ti ti undufu ba cwunnkyi usu ana umbae titinying. Ama awu ka tu kitu wu uwae usu Benjamin.

¹³ Ama unyang kunn ba, aba ye atupwa-ba shiryaen, Unde titini ye usu-wu baen ikyinnsu-wu ama aba kafe sang ti uwae uten.

¹⁴ Kiye ti Yawuda ti ameinja-wu kafe ba kununn Yusufu, awu ta ti kusog. Aba ba kaen nae riben uwe-wu.

¹⁵ Yusufu rang ba baa, “Ayine si imi ti ani nde? Ani nung-ni ti utso unde ma ame u caen ira be a.”

¹⁶ Yawuda ri baa, “Ira imi ti ati u ri te itsekuru-ti? Ati u ri baa imi? Ati u nde rimang u txen unju-ti? Rimam shaen imbyi apyi-fu nae pu wu ise. Ati ti risu-ti, fa ti awu ti aba tu kitu wu uwog-wu meme, kafe pu ti apyi-fu.”

¹⁷ Yusufu ri baa, “Ame u nde-m itso iken yine be, si nyáng unde wu ti a tu kitu ambyi wu uwog wu amam ti u si upyi-m. Ani ande ti tsitsi u kafe ru-ni uwog itse-ni uwae kujimshwur.”

Yawuda Jwam Yusufu Ikyaen Benjamin

¹⁸ Yawuda nwunn u jwam Yusufu baa, “Itsekuru-m, ndembeb-fu utob be, ti ame upyi-fu u tsag ira pang te fu, ikyaen ti afu pangma Ukwe ti Ejib ti risu-wu.

¹⁹ Itsekuru-m, afu rang ti apyi-fu baa, ati na site itse ko inja bara.

²⁰ Ati cwe baa, itse-ti na ta ti unyang, u kyáen tag pu wu, ama inja-ti titinying ti a mbae na wu kiye ti awu kyáen pu wu ne, te wu ta tetso. Inja-wu ti uwae rishwu iya-wu cwu pu wu. Awu amam ti tsitsi, itse-wu ama site ure te wu timambe.

²¹ “Itsekuru, afu ri te ti baa, ati na pu wu si ba ti afu u sae wu ti ayib-fu.

²² Ati ri te fu baa, umbae wu na u ya itse-wu ta-wu be. Asiti awu a ya itse-wu ta, itse-wu na u cwu.

²³ Afu ri te apyi-fu baa, ‘Se inja-ni ti ricwunnkyi wu a te ni ba te tso titawe ani u nung uwe-m.’

²⁴ Ama kiye ti ati kafe ru uwog itse-ti, ati ri tag te wu ira ti afu ri.

²⁵ “Isim yine itse-ti ri te ti baa, ati na ka jab wuci pang na ba kyi.

²⁶ Ati ri te wu baa, ‘Ati u ka-ti be, asiti inja-ti ti ricwunnkyi a u te ti ru-wu tetso be. Ikyaen ti, awu a putsa-wu ati be, ati u nung-ti uwe unde wu be.’

²⁷ “Tiri upyi-fu, itse-m, ri te ti baa, ‘Ani nung pu ni ti uwa-m mbae na nyáng ame anyisu ifaen amam.

²⁸ Kinjo ya ti ta pu wu, ama ame ri baa, kubenti ibye inyi wen pu wu awu. Ti kiye wu ba ku kwer tine, ame nung-m ayib-wu cwucwo be.

²⁹ Asiti ani a pu wune ru kyi, ira titibi a ka tu wu, ani u nda m ame u cwu ti utob tibyir.’

³⁰ “Ikyaen yine, asiti ame a ka uwog upyi-fu, itse-m, umbae wune a putsa-wu ati be, ti awu site ure ti umbae wu timambe ne,

³¹ awu a nung baa, umbae wu na ba-wu te ti be, itse-m u cwu fae. Ama itsekuru, ati shir iticwu na pu ti unde ti ijwu risu wu ne.

³² Ikyaen ti ame yer unju te itse-m baa, ‘Asiti ame a pu umbae wu ba-m be, itse-m ā sa riraen ana iken ti tu umbae wu sī m risu!’

³³ “Tine Itsekuru-m, ame ku jwam fu, asiti afu a cwe, ame u som te fu ti ike ti ame u si upyi-fu, ti umbae wune ā te ameinja-wu kafe ru uwog itse-wu.

³⁴ Ame u nde rimang kafe kaa tu itse-m, asiti umbae wu a te ti ru-wu ama be? Ayi u caeb m timambe ti m u sae ira titibi ti u tu itse-m.”