Kucangtsi 42 - Kutsingken Ira Rimam ti Saen Kyag

Anyisu Yakubu Ru Ka Jab Wuci yi Ejib

¹ Ti Yakubu fxen baa, wuci na ta Ejib, awu ri te anyisu-wu baa, “Imi ti nde ani som ku sae atso piin?

² Ame fxen baa, wuci na ta Ejib. Ni si yi atang ti ni ka jab wuci ba be, ati u cwu rimenn.”

³ Ama ande rijwe uwae ameinja Yusufu si ti a kaa jab wuci yi Ejib.

⁴ Amaa Yakubu ya Benjamin, inja Yusufu, ta ti kununn, ikyaen ikyenricwu, iki be ira titibi na u tu wu.

⁵ Ikyaen yine anyisu Isirela fa uwae ande ti ka jab wuci yi Ejib, ikyaen ti, rimenn ta uten ti Kanana ama.

⁶ Kiye wune Yusufu ti si Gwamna na uten Ejib. Awu ti ku jabci wuci na ande meme. Ti ameinja Yusufu ka sang, aba kú riben, u fur risu riben uwe-wu.

⁷ Ti Yusufu pu ayib sae ameinja-wu, awu nungye ba, amaa awu nde te ba pangma awu na nung-wu aba usir iki be, u nde ira tí kubyag tí kubyag te ba. Awu rang ba baa, “Ani ru aka ba?” Aba ri baa, “Ati ru Kanana ba ku jab wuci.”

⁸ Yusufu nungye ameinja-wu, amaa, aba nungye-ba awu be.

⁹ Ama Yusufu tangsom ti kurwa ti awu sunn risu-ba, ama u ri te ba baa, “Ani si ricwu tam riben! Ani ba ti ni u baen u sae uwog ti uten ti nam sisi atang.”

¹⁰ Aba ri baa, “Iyee, itsekuru-ti, apyi-fu ba ku jab wuci.”

¹¹ Meme-ti si anyisu unde kinjo. Apyi-fu si ande ti kubenti, si-ba ricwu tam riben be.

¹² Awu ri te ba baa, “Iyee, ani ba ku baen uwog ti uten wune nam sisi atang.”

¹³ Amaa aba ri baa, “Ati apyi-fu si rijwe asu ifaen uwae rishwu itse-ti. Ati som uten ti Kanana. Tine, umbae ricwunnkyi-ti ta te itse-ti ti kununn, kinjo ama ta-wu cwucwo be.”

¹⁴ Yusufu ri te ba baa, “Ayine si ira yi ti ame ku ri te ni, ani si ricwu tam riben!

¹⁵ Fengo ti ati u myae ni ta re. Ame ben uben ti rinyi Ukwe ti Ejib baa, ani u nwunn-ni ike be se inja-ni ti ricwunnkyi wu a ba pu wu titawe.

¹⁶ Ni tom kinjo uwae-ni ka pu inja-ni ba. Aba ti tsitsi ne u nae uwae pursuna, ti ti u nung ko ira-ni si kubenti. Ayi a si-yi ahan be, ame ku ben uben ti rinyi Ukwe ti Ejib, baa, ani na si ricwu tam riben!”

¹⁷ Ama awu ye ba meme cwunn. Aba nde usir ita uwae pursuna atang.

¹⁸ Usir ti ita, Yusufu ri te ba baa, “Ame si unde ti ku kyen ikyenricwu Rimam. Iken ti ani u nde u nwangru ta re.

¹⁹ Asiti ani a site kubenti, kinjo uwae-ni ā som ti pursuna ike ti aba ti tsitsi ama ā su wuci ka na ande-ni ti ku cwu rimenn.

²⁰ Ni ka pu inja-ni ti ricwunnkyi wu ba kang ti m u nung baa, ani na ku ri kubenti, ama ani u cwu-ni be.” Aba cwe.

²¹ Aba ri tetso baa, “Kubenti, tine ati ku ngwa rikaen ikyaen iken ti ati nde te inja-ti. Ati nung itso rikaen ti ati nde wu. Awu jwam ti, ti ti na ya wu ta, ati cwe-ti be, nee iken ti shir rikaen ne ba risu-ti.”

²² Roben ama ri baa, “Mbaa ame ri te ni baa, ati na nde-ti umbae wu ira titibi be, ani shaen-ni re! Tine ati ku ngwa rikaen ikyaen iticwu-wu.”

²³ Aba nung-ba ti Yusufu ku fxen ira yi ti aba ku ri be, ikyaen ti, awu ku ri ira te ba, unde iki ti ku kafe ira yi na ba.

²⁴ Yusufu nwunn u ya ba ta u ka jwub ira, u kafe ba ku ri ira te ba cwucwo. Awu ye Simeyon cwunnkyi ti ayib-ba.

Ameinja Yusufu Kafe Ru ti yi Kanana

²⁵ Yusufu nda unju baa, a na pu wuci si munn meme ibae-ba, ti a na pu aser unde titini na si fa ti uwae usu-wu, ti a na sha na ba wuci ti a ci fengo. Ama apyi ba nde ti mbwe-yi.

²⁶ Tiri aba ye isu yi baen ikyinnsu-ba, ama u ru-ba.

²⁷ Ti aba ka sang uwog ti aba u cwag atang utitang wu, kinjo uwae-ba mbub ibae-wu ti wu u pu wuci na ikyinnsu-wu, awu sae, aser-wu ta ti uwae ibae-wu!

²⁸ Awu ri te ameinja-wu baa, “Aba sa aser-m kafe si-ba ame ti uwae ibae-m! Nung! Ayi ta re!” Anying yer ba utob, ijwe-ba fwer mbeb, aba ku rang atso baa, “Ayine si imi ti Rimam nde te ti ne?”

²⁹ Ti aba ba tu itse-ba Yakubu yi Kanana, aba tsag te wu meme iken ti nde. Aba ri baa,

³⁰ “Unde ti uwe uten wu ri ira te ti tí kubyag tí kubyag ku tso baa, ati na si ricwu tam riben ti na ba ku baen uten wu.

³¹ Ama ati ri te wu baa, ati na si-ti ricwu tam riben be, ati na si ande ti kubenti.

³² Ati na si rijwe asu ifaen uwae rishwu itse-ti, amaa kinjo na ta-wu cwucwo be. Umbae ricwunnkyi-ti ama na ta te itse-ti ti kununn yi kanana akwen.

³³ Tiri unde ti uwe uten wu ri te ti baa, ‘Iken ti ani u nde ti m u nung kubenti-ni ta re. Ni ya kinjo uwae-ni ta te m ti ike, ti ni su wuci ka na ande-ni ti ku cwu rimenn.

³⁴ Amaa ni pu inja-ni ti ricwunnkyi ba ti m u nung baa, ani na si ande ti kubenti, ani na si-ni ricwu tam riben be. Ama ame u pu inja-ni kafe na ni ti atang, ama ani u jab wuci uwae uten ike.’ ”

³⁵ Ti aba yaen ru wuci uwae ibae-ba, aba sae, aser unde titini ta ti uwae ibae-wu. Ti aba ti itse-ba sae aser yine, ikyenricwu ye ba timambe.

³⁶ Itse-ba Yakubu ri te ba baa, “Imi ti ani ku sha ti ni u nde te m? Yusufu ti Simeyon ta-ba cwucwo be, tine ani ku sha ti ni u pu Benjamin kaa bē fa ba. Kayi! Ira ti tu m ne, ame u nde rimang!”

³⁷ Ama Roben ri te itse-wu baa, “Itse, wen tag anyisu-m ifaen bane asiti ame a pu umbae-fu kafe ba na-m afu ti atang be. Pu wu na m kujwo, ame u pu wu kafe ba na fu.”

³⁸ Yakubu ri baa, “Umbae-m u te ni ru-wu tetso be. Inja-wu cwu pu wu, awu amam ti tsitsi. Ira titibi iki a tu wu uwae ikyin ti ani ku ru ne, ani u nda m ti m u cwu fae.”