Kucangtsi 41 - Kutsingken Ira Rimam ti Saen Kyag

Kurwa Ukwe ti Ejib

¹ Isim asang ifaen, Ukwe ama sunn kurwa ti awu na tsi unju uyinn ti Nel.

² Ti awu u nunung, indag itsongfaen ti kim u tsaen fxer-fxer tsoye uwae uyinn atang ba tsi ku kub irum.

³ Isim ayine, indag itsongfaen ti skam u wur tag tsoye uwae uyinn atang ama, u ba tsi fer ayi ti rikem ne unju uyinn wu.

⁴ Ama indag yi ti skam u wur tag ne ye pu indag ti rikem yine kub tag. Tiri Ukwe wu tae shwu kicwag.

⁵ Ama awu si kyi kicwag u sunn kyi kurwa ti apu-ifaen. Uwae kurwa-wu, awu sae kakong awum kinjo waen acwung awum itsongfaen titinyang, ti waen sib sib.

⁶ Isim ayine, acwung awum itsongfaen ti usir fxab yi, ayi cwu foo tsoye.

⁷ Ayi ti cwu foo ne ba ye pu ayi titinyang itsongfaen ayine mennsi tag. Ama Ukwe shwu kicwag. Ti awu u nung, ayi si-yi kurwa.

⁸ Ti awu shwu kiskinn, ikyenricwu ye wu, awu kunn funn tag ande ti ku caen upwen, ti ande ti ben-ayib ti ta Ejib meme. Ukwe tsag kurwa-wu ayi te ba, ama unde iki ta-wu ti wu u ri imbyi kurwa yi te wu be.

⁹ Ama awu unde ti uwe itaen ti ku txi ambyi na Ukwe ri te wu baa, “Ame tangsom pu m ti riraen-m yaka ne.

¹⁰ Kiye ti afu ndembeb utob ti apyi-fu, afu ye m ti unde ti uwe itaen ti ku nde wuci Ukwe sang pursuna.

¹¹ Meme ifaen-ti sunn kurwa uwae utitang iki ti ko kurwa titini site imbyi yi.

¹² Mbaibrane iki ta te ti atang, upyi unde ti uwe ande ti ku kyir ukwe. Ati tsag kurwa-ti te wu, awu ri te ti imbyi kurwa yi.

¹³ Ama meme iken yi nde ti bara-yi ti awu ri te ti. Aba sa m kafe ba ti unju wande-m, u ye unde ti ifaen-m tso iji risu kutuku.”

¹⁴ Tiri Ukwe tsa kutsa ru uwog Yusufu ti kufe. Aba pu wu ruye uwae pursuna atang. Ama awu kob icee-wu u fin atupwa-wu, u ba uwog ukwe.

¹⁵ Ukwe ri te Yusufu baa, “Ame sunn kurwa, ama unde iki ta-wu ti u ri tu imbyi kurwa yi te m be. Ama a ri te m ira risu-fu baa, asiti afu a fxen kurwa unde, afu na u ri tu imbyi yi.”

¹⁶ Yusufu ri te Ukwe baa, “Ame ku tsag tu-m imbyi kurwa be, amaa Rimam ti u tsag tan imbyi kurwa Ukwe na wu.”

¹⁷ Ukwe ri te Yusufu baa, “Ame sunn kurwa ti ame tsi unju uyinn ti Nel.

¹⁸ Ama ti ame u nunung, indag itsongfaen ti rikem tsoye ba tsi ku kub irum.

¹⁹ Ti m nunung cwucwo, indag itsongfaen iki ti skam u wur tag ti ame nungji-m itso-yi uwae uten Ejib be tsoye,

²⁰ ama u ye pu ayi ti rikem itsongfaen ti tawe ne kub tag.

²¹ Ko ti ayi pu ti rikem ne kub tag, ayi tsi pangma ayi na ci-yi iken iki be, u beb ti mbwe-yi ti kucang. Ama ame tae shwu.

²² Ame sunn kyi kurwa ti ame sae kakong awum kinjo waen acwung awum titinyang itsongfaen.

²³ Isim-yi, acwung awum itsongfaen iki shab tsoye, ti usir ti fxab yi ayi cwu foo.

²⁴ Ayi ti cwu foo itsongfaen yine ye pu titinyang itsongfaen yine mennsi tag. Ame pwen kurwa-m ne te ande ti upwen, ko unde iki ri fob-wu imbyi-yi te m be.”

²⁵ Ama Yusufu ri te Ukwe baa, “Kurwa Ukwe yine ku ri sí ira kinjo. Rimam tatso pu wu Ukwe iken ti awu Rimam ku sha ti awu u nde.

²⁶ Indag itsongfaen yi ti rikem ne si asang itsongfaen, acwung awum itsongfaen titinyang ne ama si asang itsongfaen. Kurwa-fu yi ku ri sí ira kinjo.

²⁷ Ayi indag itsongfaen ti skam u wur tag ti tsoye isim ne si asang itsongfaen, ayi acwung awum itsongfaen ti usir ti kiskinn fxab yi, ayi cwu foo né, ku tatso asang itsongfaen ama.

²⁸ Ayi si pangma ti ame ri te fu, ukwe. Rimam tatso pu wu Ukwe iken ti awu Rimam ku sha ti wu u nde.

²⁹ Asang itsongfaen ti ku ba, wuci u shag ko aka uwae uten Ejib.

³⁰ Amaa asang itsongfaen ti u putsa, rimenn u pu uten Ejib, ama ande u munnji ti asang yi ti wuci shag yi Ejib.

³¹ Aba u tangsom-ba te asang na rikyaen uwae uten ike be. Ikyaen imi rimenn wu ti u putsa, u beb timambe.

³² Iken ti nde Ukwe sunn kurwa atsepu ifaen si ikyaen ti Rimam sa tsi pu wu ti wu u nde kang iken ayine. Ayi u tsi-yi tsi be u nde.

³³ “Tine Ukwe ā tsab unde ti nung iken u site itsab, ti awu ā ta risu uten Ejib.

³⁴ Ukwe ā tsab kyi ande ti uwe ti aba ā ta risu uten, ti a mbe kinjo uwae iken itsong kiye asang itsongfaen na rikyaen.

³⁵ Aba ā byir meme wuci ana asang titinyang ti ku ba ne, u pu yi tsi kujwokwe ti awu ā kyir yi, ti wuci ā ta uwae uten.

³⁶ Wuci ayine, a u byir yi tsi ikyaen asang itsongfaen na rimenn ti ku ba, ti unde iki ā cwu-wu yi rimenn uwae uten Ejib be.”

Yusufu Kafe Gwamna Uten ti Ejib

³⁷ Kumyae ayine nyang uwae Ukwe ti ande-wu.

³⁸ Ama Ukwe rang ba baa, “Ati u tu unde iki ti site kusung Rimam pangma unde wune a.”

³⁹ Ukwe ri te Yusufu baa, “Ti Rimam tatso tag pu wu afu iken yine, ayi tatso baa, unde iki ta-wu ti nung iken u site itsab pangma afu be.

⁴⁰ Afu u ta risu ishikununn-m, ama meme ande-m u nae risu riben te patag ira ti afu a ri. Ame u skeb ra fu yi kutxom ukwe-m amam.”

⁴¹ Ikyaen yine, Ukwe ri te Yusufu baa, “Nung, ame sa fu ta risu uten Ejib.”

⁴² Ukwe nwaen kunya ti fwa kujwo-wu, u sa fwa kujwo Yusufu. Awu pu atupwa ti aser si Yusufu, u sa asuwa zinariya ta wu ukwae.

⁴³ Awu sa Yusufu kafe unde ti kotub-wu, u nda Yusufu kuskus ti kya fa kakum-wu ti ifaen ti awu na tso. Ti awu kyang ku ru, ande ku ya iskin baa, “Ni ya fengo ta! Ni ya fengo ta.” Ayi si fengo ayine ti Ukwe sa Yusufu ta risu uten Ejib.

⁴⁴ Ama Ukwe ri te Yusufu baa, “Ame si ukwe, amaa, afu a cwe-fu be, unde iki u kyi-wu kujwo ko afxen yi Ejib ike be.”

⁴⁵ Ukwe fa Yusufu rinyi baa, Zafenati-Paneya, u pu Asenati, umbae Potifera, kukwen Onn, na Yusufu ti awu na mbe. Ama Yusufu kyang pakob uten Ejib.

⁴⁶ Yusufu site asang rijweta kiye ti awu bag wande ti nde na Ukwe ti Ejib. Yusufu nwunn uwe Ukwe u kyang kyife uten Ejib.

⁴⁷ Kiye asang itsongfaen ana rikyaen, uten atang tu wuci timambe.

⁴⁸ Yusufu mbe tag wuci ti aba tu yi Ejib uwae asang itsongfaen ana rikyaen u pu yi tsi uwae uten uten. Awu pu wuci ayine tsi ko uten ti tine fer ti uwog ti aba tu yi atang.

⁴⁹ Yusufu byir wuci tsi yang-yi pangma isa ti uyinn. Wuci yi ko sha pu yi, si-yi ti a u myae yi myae cwucwo be.

⁵⁰ Ti ti kiye rimenn ba-wu khika be, Asenati, umbae Potifera ti unda, kukwen ana Onn, mbae anyisu ti arom ifaen na Yusufu.

⁵¹ Yusufu fa rinyi umbae rifen-wu baa, Manase, awu ku ri baa, “Rimam nda m, ame munnji ti rikaen-m ti ishikununn itse-m.”

⁵² Umbae ti ifaen ama awu kunn wu baa, Efiremu u ri baa, “Rimam nda pu wu ame rifunn uwae uten ana rikaen ti ame ta uwae-yi.”

⁵³ Asang itsongfaen ana rikyaen uten Ejib mam pu yi,

⁵⁴ asang itsongfaen na rimenn yi pù pu yi pangma ti Yusufu ri. Rimenn pù kyife uten ise meme, amaa uwae uten Ejib, wuci tsi atang.

⁵⁵ Ti ande ti Ejib mbagta ku fxen ti rimenn, aba jwub ira tu Ukwe ikyaen wuci. Ama Ukwe ri te meme ande ti Ejib baa, “Ni ka tu Yusufu. Ira ti awu a ri te ni, ni nde.”

⁵⁶ Ti rimenn pu kyife uten meme, Yusufu mbubta arug wuci u jabci wuci na ande ti Ejib, ikyaen ti, rimenn wu sang beb timambe ko aka meme uwae Ejib.

⁵⁷ Ande ku nwunn ko aka ba yi Ejib ti a u ba jab wuci kujwo Yusufu, ikyaen ti, rimenn wu beb timambe ko aka meme uwae utense.