Kucangtsi 40 - Kutsingken Ira Rimam ti Saen Kyag

Yusufu Tsag Imbyi Kurwa na Ande Ifaen

¹ Isim ayine, unde ti ku txi ambyi ti ngwa na Ukwe ti unde ti ku nde wuci na Ukwe ti Ejib ndembeb Ukwe wu utob.

² Ukwe ti Ejib wu tso rinae te ande wande-wu ifaen bane, unde ti uwe itaen ti ku txi ambyi ti ngwa na Ukwe ti unde ti uwe itaen ti ku nde wuci na ukwe.

³ Awu pu ba cwunn pursuna, kusog unde ti uwe na itaen ti ku kyir Ukwe ti Ejib, ti si uwog ti a cwunn Yusufu atang ama.

⁴ Unde ti uwe pursuna wu pu ande ifaen bane faesi Yusufu kujwo ti wu na nungkyi ba uwae kiye wu ti aba ta uwae pursuna atang.

⁵ Uwae utitang iki, meme ande ifaen bane sunn kurwa. Kurwa-ba yi site imbyi ira txitxi.

⁶ Ucwe fam kiskinn ti Yusufu ba ti wu u ba nung ba, awu sae aba som sunng.

⁷ Ikyaen yine, awu rang ande ba baa, “Imi ti nde ani som sunng?”

⁸ Aba ri te wu baa, “Ati sunn kurwa meme-ti, ama unde iki ta-wu ti u ri te ti imbyi kurwa yi be.” Yusufu rang ba baa, “Imbyi kurwa ku ru ye-yi uwog Rimam ba be a. Ni pwen kurwa-ni ayi te m ti m fxen.”

⁹ Ikyaen yine unde ti uwe itaen ti ku txi ambyi ti ngwa na Ukwe tsag te Yusufu kurwa wu baa, “Uwae kurwa-m, ame nung kutuku anam tsi uwe-m.

¹⁰ Kutuku anam wu site akyikya ita. Ti awu bag atsing ti ti shab, awu mbub ajwug u waen awaen.

¹¹ Kitu Ukwe ta kujwo-m, ama ame kwaen awaen anam, u kam yi si uwae kitu wu, ama u ye na ukwe.”

¹² Yusufu ri te wu baa, “Imbyi kurwa-fu ta re. Ajwo kutuku ita ayi ku tso usir ita.

¹³ Uwae usir ita, Ukwe u sa fu kafe ru ti unju wande-fu. Afu u ka kam ambyi anam na wu pangma ti afu ku nde kucang.

¹⁴ Kiye ti iken a nyang pu yi afu, tangsom te m, ame ku jwam fu. Nde ya m, ti fu ri ira titinyang risu-m te Ukwe ti awu ā sa ruye m uwae pursuna ike, be ame u nde rimang.

¹⁵ Ikyaen ti, kubenti, ame raen-m ira iki be. A ye ra m ti kpakang nwunn uten Mbaibrane. Ike cwucwo, ame raen-m ira iki ti a u ya m ba cwunn pursuna ike be.”

¹⁶ Ti unde ti uwe itaen ti ku nde wuci fxen ti Yusufu ku tsag imbyi kurwa nyang timambe, awu ri baa, “Ame sunn kurwa. Uwae kurwa yi ame txir atyika buredi ita risu-m.

¹⁷ Tyika ti txir ti ricwunnkyi apupwen munn ti wuci ti tsotso ikyaen Ukwe, amaa inung ba ku ci wuci yi ti ta uwae atyika yi risu-m.”

¹⁸ Yusufu ri te wu baa, “Ayine ti si imbyi kurwa-fu. Atyika ita yi si usir ita.

¹⁹ Uwae usir ita, Ukwe u pye ra risu-fu ru, u sa kupyirkum rimenn-fu kaa faesi ituku, ama inung u ba sag tag ibye rimenn-fu.”

²⁰ Uwae usir ti ita, ti si usir itimbae ukwe, awu nde ukwab na meme ande wande-wu. Awu sa ruye unde ti uwe itaen ti ku txi ambyi na wu, ti unde ti uwe itaen ti ku nde na wu wuci.

²¹ Awu sa unde ti uwe itaen ti ku txi na wu ambyi kafe ru ti unju wande-wu.

²² Amaa ana unde ti uwe itaen ti ku nde wuci, a ye wu tso iji pangma ti Yusufu ri.

²³ Amaa unde ti uwe itaen ti ku txi ambyi tangsom-wu te Yusufu cwucwo be.