Kucangtsi 4 - Kutsingken Ira Rimam ti Saen Kyag

Kayinu Wen ra Inja-wu Abila

¹ Adamu nae te uwa-wu Awa, ama awu tu rishwu u mbae umbae ti urom u fa rinyi-wu baa, “Kayinu.” Imbyi rinyi wu baa “Tí itindeya Yaweh, ame mbae urom.”

² Isim-yi, awu mbae inja-wu Abila. Abila si unde ti ku shi asinn, Kayinu ama si unde ti ku tom ritom.

³ Isim kiye iki, Kayinu pu wuci ti awu tu risaen ufang ba nda Yaweh rinyangwae.

⁴ Abila ama tsab uwae iken ti shi-wu ti rikem, ayi ti a mbae yi tawe, u pu yi ba na Rimam. Ama Yaweh kyangte Abila ti rinyangwae-wu,

⁵ amaa, awu kyangte-wu ana Kayinu be. Ikyaen yine Kayinu tso rinae, utob-wu ndembeb.

⁶ Yaweh rang Kayinu baa, “Imi ti nde afu ku ndembeb utob? Imi ti nde afu yir kyi uwe-fu?

⁷ Á baa afu na nde iken ti pang atang, ame ú paembe-m rinyangwae-fu be a. Nung nyinyang, be ikentitibi tsi ku nwan fu, ti wu u ndembeb fu. Kwab ti fu ci rika risu-wu.”

⁸ Ama Kayinu ri te inja-wu Abila baa, “Ba ti ti ru ka utab umae akwen.” Ama ti aba ka sang utabmae atang, Kayinu ye Abila byinn wen.

⁹ Ama Yaweh rang Kayinu baa, “Inja-fu Abila ta aka?” Kayinu ri baa, “Ame nung-m be, ame ti si unde ti ku nungkyi inja-m a.”

¹⁰ Yaweh rang wu baa, “Imi ti nde nee afu nde ira beb ahan? Fxen! Anying inja-fu ti yaen sur riben ku kunn rikwen uwe-m ta re.

¹¹ Tine, kufwag ta risu-fu. Riben u nyang-wu wuci cwucwo be, ayi riben wu ti mbubta unju, u ngwa anying inja-fu ne.

¹² Afu a tom riben, awu u waen-wu wuci na fu cwucwo be. Afu u kafe unde ti ku kyangfa kyangfa ku wumm, u si-fu ti uwog ti som utense be.”

¹³ Kayinu ri te Yaweh baa, “Kimbab ti byinn-fu ne skeb pu yi ame risu!

¹⁴ Tine afu rwae sha pu fu ame riben wu, ame u sae-m kutxuwe-fu cwucwo be. Ame si te-m uwog ti som utense cwucwo be. Unde ti a tu m, awu u wen ra m.”

¹⁵ Ama Yaweh ri baa, “Iyee, ikyaen ti unde titini ti a wen Kayinu, awu u ngwa rikaen ti skeb ana wu atsepu itsongfaen.” Ama Rimam sur awaen rimenn Kayinu ikyaen ti unde ti a tu wu, unde wu ā wen-wu awu be.

¹⁶ Ama Kayinu nwunn kutxuwe Yaweh atang, u ru ka som uten iki ti rinyi-wu si, “Nod” uwe usir ti kiskinn na Eden.

Rishi na Kayinu ka Sang ana Lameki

¹⁷ Kayinu nae te uwa-wu ama awu kyaen rishwu u mbae umbae ti urom u kunn wu baa, Enoki. Kayinu mbye uten iki, u fa rinyi-wu rukwer ana umbae-wu Enoki.

¹⁸ Enoki ama mbae umbae u kunn wu baa, Iradi. Iradi si itse na Mehujayel, Mehujayel ama si itse na Metushayel, Metushayel si itse na Lameki.

¹⁹ Lameki mbe anda ifaen, rinyi kinjo si Ada, ti ifaen ama si Zila.

²⁰ Ada mbae Jabal. Awu ti si itse ande ti ku nae afug u ku shi asinn.

²¹ Rinyi inja-wu si Jubal. Awu ti si itse na ande ti ku byinn kufwa u ku kunn ripwaa.

²² Zila ama mbae umbae ti urom, rinyi-wu si Tubal-Kayinu. Awu ti si kwenkufang ti ku kwen iken te bronzi ti ikyab kiser. Mbiya Tubal-Kayinu si Naama.

²³ Lameki kunn awa-wu, u ri baa, “Ada ti Zila, ni fxen! Ani awa-m, ni fxen ira ti ame u ri. Ame wen pu m unde iki ti nde iken beb m uwae, umbae ti utaen ti kyae ribang nae m.

²⁴ Asiti aba a pae ande itsongfaen ikyaen Kayinu, upae ana unde ti a wen Lameki u si ande mae ita mbe rijwe asu itsongfaen.”

Seti ti Enoshi

²⁵ Adamu ti uwa-wu mbae kyi umbae ti urom. Uwa-wu fa rinyi umbae wu baa, Seti, ama ri baa, “Rimam nda pu wu ame umbae ti fikyi Abila ti Kayinu wen.”

²⁶ Seti ama mbae umbae, u fa rinyi-wu baa, Enoshi. Kiye wune, ande mbagta ku fen Yaweh ti rinyi ti ana-wu.