Kucangtsi 39 - Kutsingken Ira Rimam ti Saen Kyag

A Ye Yusufu Jabci na Potifar

¹ Anyisu Ishimayel pu Yusufu si yi Ejib, ka jabci na Potifar, kinjo uwae ande ti uwe kusog Ukwe ti Ejib. Unde wu si unde ti uwe na itaen ti ku kyir kusog ukwe.

² Yaweh ti Yusufu ta tetso, awu ru risu. Awu ta kusog unde ti kununn-wu.

³ Unde ti uwe-wu nung baa, Yaweh na te Yusufu na ta tetso, ama na ku nda wu, awu na ku tu iti ru yi uwe uwae meme iken ti awu ku nde.

⁴ Ikyaen yine Yusufu tu kutxuwe titinyang uwe Potifar, ama Potifar sa wu kafe unde ti ku ndeya wu. Potifar sa wu ta risu ishikusog-wu ti meme iken ti awu site.

⁵ Ti kiye ti awu sa Yusufu ta risu ishikusog-wu ti meme iken ti awu site, Yaweh waefa ishikusog unde wu ikyaen Yusufu. Itinyang na Yaweh ta risu Potifar yi iken ti awu site kusog-wu ti risaen ufang-wu meme.

⁶ Ikyaen ayine awu ya meme iken ti awu site ta kujwo Yusufu, u kab wu uwae risu iken kyi be, se itici-wu amam. Yusufu saen urom, u nyang ti sae timambe.

⁷ Kiye iki tiri uwa unde ti kununn Yusufu site ijaen risu Yusufu, ama u ri te Yusufu baa, “Ba nae te m!”

⁸ Amaa Yusufu pyir u ri baa, “Unde ti kununn-m sa m tsi risu kusog-wu ne ti meme iken ti awu site.

⁹ Rurob unde iki skeb-yi ana-m kusog ike be. Unde ti kununn-m byang-wu ame iken iki be, se afu amam ikyaen ti, afu si uwa-wu. Ame u nde rimang u nde itso ikentitibi yine u raen Rimam ira?”

¹⁰ Ko ti unda wu ku ri ira ti Yusufu ti usir usir, awu pyir kunn ti wu u nae te wu, ko ti awu u som fer te unda wu.

¹¹ Usir iki Yusufu sang uwae kusog ti awu kaa nde wande-wu. Unde iki, ko anyisu kununn atang iki ta-ba atang be.

¹² Unda wu ye Yusufu ti atupwa u ri baa, “Ba nae te m.” Amaa Yusufu tunn pu kutupwa-wu fa unda wu ti ajwo u sa inyae ter ruye uwae kusog atang.

¹³ Ti unda wu nung baa, Yusufu na ter ya kutupwa-wu na ta fa pu wu awu kujwo, ama na u ruye pu wu uwae kusog atang,

¹⁴ awu kunn anyisu kusog-wu ti tsitsi u ri te ba baa, “Ni nung! Mbaibrane wune ti ubaen-m jab ba, awu ba ti wu nde ti uru ijwe! Awu sang ba ike ti wu na u nae te m ama ame tso ukunn.

¹⁵ Ti awu fxen ukunn ti ame tso ku sha itindeya, awu ter ru, u ya kutupwa-wu ta fa m ti ajwo.”

¹⁶ Awu pu kutupwa Yusufu cwu te ijwe-wu ba kwar kiye ti unde ti kununn-wu kafe ba kusog.

¹⁷ Ama unda wu pwen ira yine te wu baa, “Upyi-fu Mbaibrane ti afu pu ba ne, awu ba ti wu na u nde m uru ijwe.

¹⁸ Ama ti ame tso ukunn ku sha itindeya, awu ter ruye u ya kutupwa-wu ta fa m ti kujwo.”

¹⁹ Ti ti Potifar fxen ira yi ti uwa-wu ri te wu risu iken yi ti Yusufu na nde ne, awu tso rinae si-yi ti ti ri be.

²⁰ Awu ye ra Yusufu ka cwunnkyi pursuna uwog ti a ku pu ande ti raen Ukwe ira cwunnkyi atang. Ama kiye ti Yusufu ta pursuna atang,

²¹ Yaweh te wu ta tetso, u tatso Yusufu ayib risi ti kutxuwe titinyang uwe unde ti ku kyir pursuna atang.

²² Ikyaen ayine unde wu nda Yusufu rurob ti wu na si risu ande ba ti ta pursuna atang meme. Patag iken ti aba ku nde atang ta kujwo Yusufu.

²³ Unde ti ku kyir pursuna wu sa uwae tsi-wu risu iken iki ti ta kujwo Yusufu be, ikyaen ti Yaweh ti Yusufu ta tetso, u ku nda wu iti ru yi uwe uwae meme iken ti awu ku nde.