Kucangtsi 38 - Kutsingken Ira Rimam ti Saen Kyag

Ira Kutampwa Yawuda ti Tamar

¹ Kiye wu Yawuda ya ameinja-wu ta, u ru ka som te unde ti Adulam iki ti rinyi-wu si Hira.

² Atang Yawuda tu wandab iki ti rinyi itse-wu si Shuwa, unde ti Kanana. Awu mbe wu u nae te wu.

³ Wandab wu kyaen rishwu u mbae umbae ti urom, awu fa rinyi-wu baa, Er.

⁴ Awu kyaen kyi rishwu u mbae umbae ti urom ama u fa rinyi-wu baa, Onan.

⁵ Awu mbae kyi umbae ti urom ama u fa rinyi-wu baa, Shela. Awu mbae umbae wune yi Kezib.

⁶ Yawuda pu unda na Er umbae-wu titawe, rinyi unda wu si Tamar.

⁷ Ama Er, umbae titawe Yawuda, nde iken ti beb timambe uwe Yaweh. Ikyaen ayine, Yaweh wen ra wu.

⁸ Yawuda ri te Onan baa, “Ti inja-fu cwu-wu ne, ru ka yaen uwa inja-fu, ti fu mbae umbae ti rinyi inja-fu ā kunn atang.”

⁹ Ti Onan nung baa, umbae wu na u si-wu ana wu be, ko kiye ti tine ti awu a ku nae te uwa inja-wu, awu ku sa usur yaensi riben ti wu na u mbae-wu umbae iki na inja-wu be.

¹⁰ Iken yi ti awu ku nde ne, nyang-yi uwae Yaweh be, ama Yaweh wen ra wu.

¹¹ Yawuda ri te uwabyib-wu Tamar baa, “Kafe ru ti kununn ande-fu, ti ka som usom uwa-icwu atang. Baen-fu unde iki be, se kiye ti umbae-m Shela a ser ben pu wu.” Awu ku kab baa, Shela na u cwu pangma ameinja-wu. Tiri Tamar kafe ru-wu ti yi kununn ande-wu.

¹² Isim kiye yang-yi, uwa Yawuda, umbae Shuwa ti unda, sa cwu. Ti Yawuda som tag ricwu uwa-wu, awu ru yi Timina uwog ti a ku pwén asing iwentam-wu atang. Urwan-wu Hira, unde ti Adulam te wu ru tetso.

¹³ A ri te Tamar baa, “Itse ubaen-fu ta fengo ku ru yi Timina ti awu kaa pwén asing iwentam-wu.”

¹⁴ Ti Tamar nung baa, Shela na ko ben pu wu, ama na u ka yaen-wu awu be, awu tunn pu atupwa uwa-icwu tso, u pu atupwa titinyang si, u pu iki burkyi risu-wu, u ka som fengo ti ku ru yi Timina, uwog ti fengo Enayim kata atang.

¹⁵ Kiye ti Yawuda sae wu, awu kab baa, iki be awu na si iyaen, ikyaen ti awu pu atupwa kukyi uwe-wu.

¹⁶ Yawuda kya tsi, u ka tu wu iyen fengo u ri te wu baa, “Ba ti m nae te fu.” Ikyaen ti awu nung-wu ti unda wu na si uwabyib-wu be. Tamar rang wu baa, “Imi ti afu u nda m titawe afu u nae te m?”

¹⁷ Awu ri baa, “Ame u tom na fu imbae iwenten kinjo uwae asinn-m.” Tamar ri baa, “Afu u nda m iken iki ti m u ye su kujwo-m ba sang kiye ti afu u tom iwen wu ba a.”

¹⁸ Yawuda rang baa, “Imi ti ame u nda fu ti u tatso unju ti yer-ti?” Awu ri baa, “Pu na m sitami te uji-wu, fa ti ukum ti afu ye su ne.” Ikyaen ayine Yawuda pu iken yine na wu ama u nae te wu, ama unda awu kyaen rishwu.

¹⁹ Isim ti awu nwunn atang, awu tunn pu atupwa titinyang-wu yi cwu kae, u pu ana uwa icwu si ti atang.

²⁰ Yawuda sa iwen wu tom urwan-wu unde ti Adulam ti wu na sa ka na unda wu, ti wu na mbe isu unju ti yer-ba kujwo unda wu na kafe ba na wu ti atang. Ama urwan-wu kafe ka tu-wu unda wu be.

²¹ Awu rang ande ti ta atang baa, “Iyaen wu ti ku som kob fengo ti ku ru yi Timina, uwog ti fengo Enayim kata atang ta-wu aka?” Aba ri te wu baa, “Iyaen iki ku som-wu ike be.”

²² Ikyaen ayine, awu kafe ka tu Yawuda u ri te wu baa, “Ame tu-m unda wu be. Cwucwo ande ba ti ta atang ri te m baa, iyaen iki na ku som-wu atang be.”

²³ Yawuda ri baa, “Awu ā pu iken yi ru-wu bē ande u skaen ti ikyaen. Ame kwab pu m. Ame tom fu te mbawen-m ti fu na sa ka na wu, amaa, afu tu-fu awu be.”

²⁴ Isim ishaen ita, Yawuda fxen baa, “Uwa byib-fu Tamar, nde iyag ama u kyaen pu wu rishwu.” Yawuda ri baa, “Ni ye wu ruye ti a twen wen wu.”

²⁵ Ti aba pu wu ruye pu ba, awu tsa kutsa ru uwog itse ubaen-wu baa, “Ame kyaen rishwu ti unde ti isu yine. Sae, ko iki be afu u nung unde wu ti sitami ti iji ti ukum wune si ana wu.”

²⁶ Ama Yawuda nungye yi ama u ri baa, “Kubenti-wu skeb pu yi ana-m, ikyaen ti, ame pu wu na-m umbae-m Shela be.” Ama Yawuda nae te kyi-wu unda wu cwucwo be.

²⁷ Ti kiye itimbae-wu nde, anyisu ishe ta rishwu-wu.

²⁸ Ama ti awu ku pwe umbae, kinjo sa kujwo ruye. Nyakam ti ku mbe umbae sa itub tibyaen kya fa wu kujwo, u ri baa, “Awune ti ruye uwe.”

²⁹ Amaa umbae wu sa kujwo-wu kafe sang ti uwae, ama inja-wu ru ye-wu. Unda wu ri baa, “Ah! Ne fengo ti fu yaen ru ye a.” Ama a fa rinyi-wu baa, Perezi.

³⁰ Isim-yi inja-wu ti itub tibyaen kya fa wu kujwo ne ruye, aba fa rinyi-wu ama baa, Zera.