Kucangtsi 37 - Kutsingken Ira Rimam ti Saen Kyag

Yusufu ti Ameinja-wu

¹ Yakubu nae ti riben uwog ti itse-wu som atang yi Kanana.

² Ayine si kuci Yakubu ti ishikununn-wu. Yusufu si umbae ti utaen ti site asang rijwe asu itsongfaen. Awu ti ameinja-wu anyisu Biliha, ti Zilipa, awa itse-wu, ku nungkyi asinn itse-ba. Yusufu ba tsag ira titibi ti ameinja-wu ku nde, te itse-wu.

Kurwa Yusufu

³ Kiye wune, Yakubu (Isirela) ye ure te Yusufu skeb pu wu meme anyisu-wu ti tsitsi, ikyaen ti, aba mbae Yusufu na wu kiye ti awu kyáen tag pu wu. Awu kob kutupwa titinyang si Yusufu.

⁴ Ti ameinja-wu nung ti itse-ba ye ure te Yusufu skeb pu wu aba meme, aba sa wu kuka, u ri-ba ira ti jimshwur te wu ama be.

⁵ Usir iki Yusufu sunn kurwa, u tsag kurwa yi te ameinja-wu, ama aba sa wu kuka ko kufufa.

⁶ Awu ri te ba baa, “Ni fxen kurwa ti ame sunn:

⁷ Ati ku fwa awum ufang, ama ana-m sunwunn ritsen, ana-ni ama funn pakob wu, u ku riben na wu.”

⁸ Ameinja-wu ri baa, “Afu ku kab ti afu u ta risu-ti a. Ko afu u nae Ukwe risu-ti a.” Ama aba sa wu kuka ko kufufa ikyaen kurwa-wu, ti ira yi ti awu ri.

⁹ Ama Yusufu sunn kyi kurwa, u tsag yi te kyi ameinja-wu baa, “Ni fxen! Ame sunn kyi kurwa baa, usir ti ishaen ti aswer rijwe asu kinjo na ku riben na m.”

¹⁰ Awu pwen kyi kurwa wu te itse-wu ti ameinja-wu, ama itse-wu fwan wu kubyag u rang wu baa, “Kurwa-fu ne ku tso imi? Ayi si kubenti ti ame, ti iya-fu, ti ameinja-fu, u ba ku riben na fu a.”

¹¹ Ameinja-wu sa kitsinn tsi te wu, ama itse-wu sa ira yi tsi utob-wu.

Ameinja Yusufu Sa Wu Jabci na Ande ti Ejib

¹² Usir iki ti ameinja-wu pu asinn itse-ba ru yi kutur fer ti Shekem,

¹³ Isirela (Yakubu) ri te Yusufu baa, “Ameinja-fu pu asinn kaa kub irum fer Shekem. Ba, ti m tom fu atom ru uwog-ba.” Awu cwe.

¹⁴ Ama Isirela ri te wu baa, “Ru ka nung ko ameinja-fu ti asinn som nyang pu ba, ti fu ba ri te m.” Ama itse-wu tom wu nwunn kubxab Hebiron, ama awu ru ka sang Shekem.

¹⁵ Unde iki tu wu ti awu yaen ku kyang uwae kutur atang. Unde wu rang wu baa, “Afu yaen ku sha-fu imi?”

¹⁶ Awu ri baa, “Ame ku sha rifab ameinja-m. Ame ku jwam fu, ri te m uwog ti aba pu asinn ka ku kub irum atang.”

¹⁷ Unde wu ri baa, “Aba nwunn pu ba ike. Ame fxen aba ku myae ti a na ku ru yi Dotan.” Ama Yusufu rwae rifab ameinja-wu ka tu ba yi Dotan.

¹⁸ Ama ti aba nung Yusufu ku ba ti fengo ti rwen, aba myae ti a na u wen wu.

¹⁹ Aba ri tetso, baa, “Nung, Ukwe kurwa wu ti ku ba ti.”

²⁰ Ti wen wu, ti ti sa wu jwunnsi kukwae ike, ti ti ka ri baa, ibye anyi na kub wen pu yi awu, ti ati u nung ira kurwa-wu ayi.

²¹ Ti Roben fxen kumyae yine, awu kwab ti wu u nwangru Yusufu kujwo-ba. Awu ri baa, “Ti wen-ti awu be.”

²² “Ti sa wu jwunnsi uwae ukwae wune ike, ikyaen ti, ati ā yaenmbub-ti anying be.” Roben ri ahan ikyaen ti, awu ku sha ti wu u nwangru wu, u pu wu kafe kaa na itse-wu.

²³ Kiye ti Yusufu ba sang, ameinja-wu ye wu u tunn pu kutupwa-wu titinyang tsoye ijwe-wu.

²⁴ Ama aba ye wu jwunnsi uwae kukwae iki ti ambyi ta-yi atang be.

²⁵ Ti aba som ku ci wuci, aba txaen pu ayib tso u nung, kumbub ande Ishimayel ti nwunn Gileyadi ba ku ru yi Ejib. Ikyinnsu ti kumunn isim-ba su acin ti umung iken ti ku nung kuyang ti tsotso.

²⁶ Yawuda ri baa, “Imi ti ati u tu asiti ati a wen inja-ti, ama u tamkyi yi?

²⁷ Ti sa wu jabci na anyisu Ishimayel, ti ayi ā si-yi ati ti u wen wu be, ikyaen ti, awu si inja-ti u si anying-ti.” Ameinja-wu cwe.

²⁸ Ama ti ande ti Mediyan ti ku jab iken ba ku ru, aba ka shir Yusufu tsoye uwae kukwae atang, u sa wu jabci na anyisu Ishimayel ba uwae zinariya rikom, ama aba ye pu Yusufu ru yi Ejib.

²⁹ Kiye ti Roben kafe ba kukwae atang u sae, Yusufu ta-wu atang cwucwo be, awu ndembeb utob si-yi ti ti ri be.

³⁰ Awu kafe ka tu ameinja-wu u rang baa, “Yusufu ta-wu uwae ukwae atang be, ame u nde rimang tine?”

³¹ Aba ye iwen yerwen, u pu atupwa Yusufu kam uwae anying-yi.

³² Aba pu kutupwa Yusufu kafe ka na itse-ba, u ri te wu baa, “Ati kya kutupwa wune. Sae ko awu si ana umbae-fu ahoo?”

³³ Awu sae u nungye, u ri baa, “Awu si kutupwa umbae-m, yiii! Ibye anyi ye umbae-m shir yae pu wu roo.”

³⁴ Yakubu ndembeb utob si-yi ti ti ri be, u pu atupwa tibyir si, u som ricwu umbae-wu usir yang-yi.

³⁵ Meme anyisu-wu ti arom te ti anda ba nwunn ba ri jim itse-ba utob, amaa awu pyir-wu. Awu ri baa, “Iyee, ayi nyangskeb ti m u cwu putsa umbae-m ru yi kinjag.” Ikyaen yine awu jwub ricwu umbae-wu jwub, jwub, jwub.

³⁶ Ti ande ti kujab ba ka sang Ejib, aba ye Yusufu jabci na Potifar, kinjo uwae ande ti uwe na ande ti ku kyir Ukwe ti Ejib.