Kucangtsi 35 - Kutsingken Ira Rimam ti Saen Kyag

Yakubu te Ande-wu Ru yi Betel

¹ Rimam ri te Yakubu baa, “Nwunn ti ru yi Betel ti ka som atang, ti mbye na m kuta atang, ame Rimam ti tu fu kiye ti afu ku ter inja-fu Esuwa.”

² Ikyaen yine Yakubu ri te ishikununn-wu ti meme ande ti ta te wu baa, “Ni pu meme apxin ti ani site yi ajwo-ni jwunn tika, ti ni jwo saen ijwe-ni ti ni fin atupwa-ni.

³ Isim yine, ni ba ti ti tso yi Betel, ti m kaa mbye kuta na Rimam, awu ti fxen m kiye ti ame ta uwae rikaen. Ba kwar tine, ko aka ti ame a ru, awu te m ta tetso.”

⁴ Tiri aba byir meme apxin ti aba site, ti iken atong-ba, u pu yi na Yakubu. Awu pu yi nji imbyi kutuku Terebinti ti ta fer Shekem.

⁵ Ti aba nwunn kyang ku ru, Rimam nda meme ande ti nae pakob ba ikyenricwu. Ko unde kinjo rwae tsa-wu anyisu Yakubu be.

⁶ Ama Yakubu ti ande-wu ka sang Luzi, ti si Betel tine, ti ta uten ti Kanana.

⁷ Atang awu mbye kuta u kunn rinyi uwog wu baa El Betel, ikyaen ti, atang ti Rimam tso risu-wu uwog-wu kiye ti awu ku ter inja-wu Esuwa.

⁸ Isim yine Debora, nyakam Rebeka, cwu, ama a sa wu nji imbyi kutuku Owak ti ta fer Betel. Ikyaen ayine aba kunn uwog atang baa, Alon-Bakuti ti imbyi-yi si ira ti jwub.

⁹ Kiye ti Yakubu nwunn Padan-aram kafe ba, Rimam tu kyi wu ama u wae ira na wu.

¹⁰ Rimam ri te wu baa, “Rinyi-fu si Yakubu, ama aba u kunn-ba fu baa, Yakubu cwucwo be, a u kunn fu baa, Isirela tiri.” Ne iken ti nde Rimam fa wu rinyi tishe baa, Isirela.

¹¹ Ama Rimam ri te wu baa, “Ame si Rimam ti site kuko patag. Mbae jwunn! Mbukwen mbukwen ande u ru ye utso-fu. Abikwe u ruye rimenn ijwe-fu.

¹² Riben wu ti ame nda Ibrahim ti Ishaku, ame u sa wu na fu. Ame u sa riben wune na anyisu-fu ti putsa isim-fu.”

¹³ Tiri Rimam nwunn u tso, u ya wu ta ti uwog ti awu ri ira te wu atang.

¹⁴ Ama Yakubu sim kutxom ititangsom uwog ti Rimam ri ira te wu yi Betel. Awu sa rinyangwae iken ti ngwa, ti kindob, yaensi risu kutxom wu, u yerkob wu.

¹⁵ Ama awu fa rinyi uwog wu ti Rimam ri ira te wu atang baa Betel, (ti imbyi-yi baa, kusog Rimam).

Iticwu Rahel

¹⁶ Yakubu ti ande-wu nwunn Betel. Kiye ti a ta rurwen ti Efirati, Rahel ta umbae ti pwe, ayi caeb wu timambe.

¹⁷ Ti umbae ti pwe ku caeb wu, nyakam ri te wu baa, “Kyen-fu ikyenricwu be, afu u mbae kyi umbae ti urom.”

¹⁸ Ama ti awu si ku jim, awu fa rinyi umbae wu baa, Benoni, ubaen-wu ama fa ana wu baa, Benjamin.

¹⁹ Ama Rahel cwu, a sa wu nji fengo ti ku ru yi Efirati, ti si Betilami tine.

²⁰ Ama Yakubu sa kutxom ta kuskwab Rahel. Awu ti si kutxom ti ta kuskwab Rahel ba ku sang ti yaka ne.

²¹ Isirela ru yi uwe ti ikyin ti kyang u ka sim afug-wu fer ti kitaen-kujwén Eder.

Anyisu Yakubu ti Arom

²² Ti Isirela nae ti uten atang, Roben ka nae te Biliha, upyi Rahel ti Yakubu mbe ama Isirela (Yakubu) fxen ira risu-yi. Yakubu site anyisu rijwe asu ifaen.

²³ Anyisu Leyatu si Roben, umbae titawe Yakubu, ti Simeyon, ti Lawi, ti Yawuda, ti Isakar ti Zebulun.

²⁴ Anyisu Rahel ama si Yusufu ti Benjamin.

²⁵ Anyisu na Biliha, upyi Rahel ti unda si Dan ti Nafitali.

²⁶ Anyisu na Zilipa, upyi Leyatu ti unda si Gad ti Asher. Abane ti si anyisu ti a mbae na Yakubu kiye ti aba ta Padan-aram.

Iticwu Ishaku

²⁷ Yakubu ru yi kununn itse-wu yi Mamre, fifer ti Kiriyati Arba ti si Hebiron tine, kuru tikyi Ibrahim ti Ishaku.

²⁸ Kiye wu Ishaku site asang ukob kinjo ti mae inje (180).

²⁹ Ishaku cwu kiye ti awu kyáen tag pu wu. Ama anyisu-wu Esuwa ti Yakubu sa wu nji.