Kucangtsi 34 - Kutsingken Ira Rimam ti Saen Kyag

Shekem Nae te Dina Uwae Kpakang

¹ Dina, umbae ti unda ti Leyatu mbae na Yakubu, nwunn kaa kunnji anda ba iki ti uten atang ira.

² Ti Shekem umbae Hamor urae Hivi, ti si Ukwe na uten wu, nungye Dina, awu ye Dina, u nae te wu, u nda wu rukwae.

³ Shekem sae Dina nyang uwae-wu timambe, ama awu tsag akaen te wu skuu,

⁴ ama u ka ri te itse-wu Hamor baa, “Ka pu wandab wune na m ti m mbe.”

⁵ Yakubu fxen baa, a na ye unda-wu Dina na ndembeb pu ba, amaa, anyisu-wu ti arom ta-ba atang be. Aba ta kutur ku nungkyi iken ti shi-wu atang. Ikyaen yine, awu bwe-wu u som ku sae itiba anyisu-wu.

⁶ Ama Hamor, itse Shekem, ru ti awu kaa tsag akaen ti Yakubu risu umbae-wu ti unda.

⁷ Ti anyisu Yakubu kafe ba kununn, u fxen iken ti a nde te mbiya-ba, utob-ba ndembeb si-yi ti ti ri be, ikyaen ti, Shekem nde iken ti ku wae rukwae yi Isirela ti awu nae te Dina, umbae Yakubu ti unda. Iken yine kpang-yi atang be.

⁸ Amaa Hamor ri te ba baa, “Umbae-fu Dina nyang uwae umbae-m Shekem timambe. Ame ku jwam fu, pu wu na umbae-m ti awu ā mbe,

⁹ ti ti yeb uyeb tetso. Pu anyisu-fu ti anda baen ti, ti ati u pu anyisu-ti ti anda baen ni ama.

¹⁰ Ani u som te ti ike. Nung riben ti nae ru ne. Ni nae, ti ni tom, ti ni nde rifunn atang.”

¹¹ Shekem ama ri te itse Dina ti ameinja-wu baa, “Ame u pu na ni meme iken ti ani ku sha, asiti ame a tu kutxuwe titinyang uwog-ni.

¹² Ni pu na m wandab wune ti m mbe ti ni kyéb na m iken uyeb ti ame u pae na ni ko ayi a si imwa.”

¹³ Ama anyisu Yakubu cwe na Shekem ti itse-wu Hamor uwae kukyaefa, ikyaen ti, Shekem ye Dina ndembeb pu wu.

¹⁴ Anyisu Yakubu ri te ba baa, “Ati ku nde-ti itso iken yine be. Ati u pu mbiya-ti baen-ti unde ti tsen-wu kutxin be. Ayine si iken ti ku wae rukwae uwog-ti.

¹⁵ Amaa ati u cwe, asiti ani a tsen na anyisu-ni ti arom kutxin pangma ti ati ku tsen titawe.

¹⁶ Asiti ani a nde ayine, ati u pu anyisu-ti ti anda baen ni, ama u mbe ana-ni. Ati u som tetso u kafe iken kinjo.

¹⁷ Asiti ani a cwe-ni ti ni u tsen kutxin be, ati u pu mbiya-ti na-ti ani be.”

¹⁸ Ira ti ri-ba ayi nyang uwae Hamor ti umbae-wu Shekem.

¹⁹ Ikyaen ayine, umbae ti utaen wune ci-wu kiye ti awu u nde iken ti aba ri te wu be, ikyaen ti, Dina umbae Yakubu nyang uwae-wu timambe. Shekem site rurob timambe yi ishikununn itse-wu.

²⁰ Ikyaen yine, Hamor ti umbae-wu Shekem ru yi rishen ti ta ufu ti ku sang uwae uten, u ka ri te ande ti uten-ba baa,

²¹ “Ande bane site ure te ti, ikyaen yine, ati cwe na ba ti a som uten-ti u tom wuci, u nde rifunn, ikyaen ti riben wune ko pu wu. Ati u mbe anyisu-ba ti anda, aba ama u mbe anyisu-ti ti anda.

²² Ne ti si nyáng fengo ti ande ba u cwe u som te ti u kafe ande-ti, asiti ati a cwe ti ti tsen na anyisu-ti ti arom kutxin pangma ti aba tsen.

²³ Asiti ati a nde ayine, asinn-ba, ti rifunn-ba, ti ikentishi-ba meme u si ana-ti. Ikyaen yine, ati cwe te ba ti a som kutampwa-ti.”

²⁴ Ama meme ande ba ti funn rishen ufu ti ku sang uten wu, fxen ira Hamor ti umbae-wu Shekem ama cwe ira yi. Ama ko urom titini, a tsen na wu kutxin.

²⁵ Isim usir ita, kiye ti meme-ba ku fxen iticaeb ribang kutxin-ba, anyisu Yakubu ifaen, Simeyon ti Lawi ameinja Dina, nwunn u pu kisum wen-ba ka purug ande ti uten atang ama u ye meme arom ti uten atang yer wen tag.

²⁶ A ye Hamor ti umbae-wu Shekem u wen ba ti kisum wen, u pu ra Dina nwunn kununn Shekem.

²⁷ Anyisu Yakubu ti tsitsi sang ka su pu rifunn uwae uten atang ru ikyaen mbiya-ba ti Shekem nae te.

²⁸ Aba pu tag asinn-ba ti meme iken ti aba site uwae uten atang ru, fa ti ayi ti ta uwae risaen afang-ba meme ru.

²⁹ Aba su tag meme rifunn-ba, ti awa-ba, ti anyisu-ba, ti meme iken ti ta ishikununn-ba.

³⁰ Yakubu ri te Simeyon ti Lawi baa, “Ani shir ira na pu ni ame. Tine ande ti Kanana ti Perizi ti nae uwae uten ike u sa m kuka. Ati jwunn-ti be. Asiti aba a ren risu u pu rika ba kunn ti tine, ame ti ishikununn-m meme u cwu tag.”

³¹ Amaa aba rang itse-ba baa, “Ti awu nde te mbiya-ti pangma iyaen ama re?”