Kucangtsi 31 - Kutsingken Ira Rimam ti Saen Kyag

Ititer-nwunn Yakubu Uwog Laban

¹ Yakubu fxen ti anyisu Laban ku pwen unju baa, Yakubu na pu tag pu wu meme iken ti itse-ba na site, ama na tu rifunn ko timambe.

² Cwucwo awu nungye baa, Laban na ku nde-wu iken nyinyang te wu pangma ti kucang be.

³ Ama Yaweh ri te wu baa, “Kafe ru ti yi uten abitse-fu ti ande-fu. Ame u te fu ta tetso.”

⁴ Ikyaen yine, Yakubu tsa kutsa kunn Rahel ti Leyatu ba tu wu uwae risaen ufang uwog ti awu ku shi asinn atang.

⁵ Awu ri te ba baa, “Ame nungye pu m baa, iken ti itse-ni ku nde te m si-yi pangma ti kucang be, amaa Rimam na itse-m te m ta tetso.

⁶ Ani nung pu ni ti ame nde wande na itse-ni ti kpakang-m meme.

⁷ Amaa, itse-ni ci m timambe. Awu nde kufúm yi kujwofwa-m atsepu rijwe. Amaa, Rimam cwe-wu ti wu na nde m ira beb skeb ayine be.

⁸ Kiye ti awu a ri baa, ‘Asinn ti ta ribae ā si kujwojang-fu.’ Asinn yi ku mbae imbae ti ta ribae ta ribae. Kiye ti awu a ri baa, ‘Itibyir ā si kujwojang-fu.’ Ayi ku mbae itibyir tibyir.

⁹ Ikyaen yine Rimam pu ra asinn itse-ni na pu wu ame.

¹⁰ “Kiye itso ti tso iwen, ame sunn kurwa ti iwenten tishir ku tso nyáng ayi ti ta ribae ta ribae amam.

¹¹ Atom Rimam kunn m ira uwae kurwa baa, ‘Yakubu.’ Ame cwe ira.

¹² Ama awu ri baa, ‘Sae meme iwen yi tishir ti ku tso ayi ti ta ribae ti titibyir akwen ne. Ame nde yine ikyaen ti, ame nung pu m iken ti Laban ku nde te fu.

¹³ Ame si Rimam ti tso risu-m uwog-fu yi Betel, uwog ti afu sim kutxom u yaen kindob si risu-wu, ama u yer unju te m atang. Tine, nwunn uten wune. Kafe ru ti riben uwog ti a mbae fu atang.’ ”

¹⁴ Ama Rahel ti Leyatu cwe na wu baa, “Ati site-ti kutunn iki uwae rifunn itse-ti cwucwo be.

¹⁵ Awu ku nde te ti pangma ati na si rikyen uwog-wu. Awu pu ti jabci u pu aser ti risu-ti ci tag pu wu.

¹⁶ Meme rifunn ti Rimam pu uwog itse-ti kafe pu yi ana-ti, ti ana anyisu-ti. Ikyaen yine, nde iken ti Rimam ri te fu.”

¹⁷ Ama Yakubu nwunn u pu anyisu-wu ti awa-wu som tsa ikyinnsu ti kumunn isim.

¹⁸ Amaa, awu fe meme asinn-wu ti awu tu uwae uten ti Padan-aram ta uwe, u pu rifunn-wu ti tsitsi meme kafe kaa tu itse-wu Ishaku yi uten Kanana.

¹⁹ Kiye ti Laban ru pu wu ti wu kaa pwén asing iwen tam-wu, Rahel yib ra apxin itse-wu ti ta uwae kusog.

²⁰ Yakubu njwug Laban, urae Aram wune, yi fengo ti awu tē-wu awu tē be, u tam ru ru amam.

²¹ Awu ter nwunn ti meme iken ti awu site kujwo-wu ama ka yen uyinn ti Yufiretis u ndabta ku ru yi Gileyadi.

²² Uwae usir ti fa ti ita, Laban fxen baa, Yakubu na ter nwunn pu wu.

²³ Tiri Laban pu ande-wu rwae putsa Yakubu nde usir itsongfaen, m ka ye wu yi rikwèn ti Gileyadi.

²⁴ Amaa, Rimam ba uwog Laban uwae kurwa, u fa wu kusen baa, “Ri-fu ira iki, ko ti tinyang ko titibi te Yakubu be.”

²⁵ Kiye wune, Yakubu sim afug-wu yi rikwen ti Gileyadi, Laban ti ande-wu ama rwae ye wu u ka sim ana-ba yi rikwèn iki yi Gileyadi atang ama.

²⁶ Ama Laban rang Yakubu baa, “Imi ti afu nde te m ne, ti afu kyafa m, u ye pu anyisu-m ti anda ter ru pangma a na ye ba upyi uwog rika?”

²⁷ Imi ti nde afu kyafa m, u ter nwunn uwae kitam? A baa, afu na tsag te m te, ame ú tē fu ti ashwu ti shwu ti akyang ti yang, ti atàng ti byinn, ti kufwa.

²⁸ Imi ti nde afu nda-fu ame riyae ti m u ye anyisu anyisu-m bur utob, u tē ba be? Ayine si ira ti kuskwab ti afu nde.

²⁹ Ame si te kpakang ti ame u nde fu itibi, amaa, utitang ire, Rimam na itse-fu fa m kusen baa, ame na ri-m ira iki titinyang ko titibi na te fu be.

³⁰ Tine afu ter nwunn ikyaen ti utob-fu tsi ti fu kafe ru uwae kununn itse-fu. Amaa, imi ti nde afu yib ra apxin-m fa te atang?

³¹ Yakubu ri te Laban baa, “Ikyaen ti, ame ku kyen ikyenricwu baa, iki be afu na u shir pu anyisu-fu kujwo-m ti kpakang ahoo.

³² Ama asiti afu a tu unde iki uwae-ti ti apxin-fu, unde wu u tu iticwu te ayib ande-ti bane. Sha, asiti afu a tu iken-fu iki, sa-fu.” Yakubu nung-wu ti ayi na si Rahel ti na yib apxin yi be.

³³ Tiri Laban sang ka fxae tag afug Yakubu, u ba sang ana Leyatu ti ana apyi-ba ti anda meme, ama awu tu-wu iken iki be. Awu ruye afug Leyatu u ka sang afug na Rahel.

³⁴ Kiye wu Rahel sa apxin itse-wu tam mam pu wu uwae iken ti som ti a ku sa tā isim ikyinnsu ti kumunn isim, ama u ka som tsa atang. Laban sha sha u shanum.

³⁵ Ama Rahel ri te itse-wu baa, “Ndembeb-fu utob be itse-m, ame u nwunn-m risu iken ti som ne be, ikyaen ti ame ta ise.” Ama Laban sha uwae ufug atang shisha, awu tu-wu apxin-wu atang be.

³⁶ Ama Yakubu ndembeb utob u rang Laban baa, “Ame raen fu ira imi? Ame nyatsa icwe titini ti nda fu ti afu rwae putsa m ahan?

³⁷ Ti afu sha tag pu fu meme isu-m ne, pu iken yi ti afu tu uwae isu yi ti afu fxae ne, ti si ana-fu ba cwu uwe ike ti ande-fu, ti ande-m ā taen rikwén kutampwa-m te fu.

³⁸ “Ame te fu ta tetso ka asang rikom tine. Iwentam ti iwenten-fu wab-yi imbae be, ame ye-m iwentam-fu iki uwae asinn-fu wen kub be.

³⁹ Ame pu akom asinn-fu iki ti ibye anyi wen ba na-m afu be, ame pae tag yi fa ti ayi ti yag byibyinn meme ti ajwo-m. Afu ye m, ame pae tag na fu, ayi ti riyib yib yi utitang ko usirtaen.

⁴⁰ Usir fxab m pu usir sunn, rijwen kwar m utitang pu ucwefam, ame ku cwag-m be.

⁴¹ Ame nde rikaen yine ka asang rikom kununn-fu. Ame nde na fu wande uyeb asang rijwe asu inje ikyaen anyisu-fu ti anda ifaen. Ame nde na kyi fu asang itsongnjo ikyaen asinn-fu, amaa, afu nde kufúm yi kujwofwa-m.

⁴² A baa, Rimam na Ibrahim, Rimam ti itse-m Ishaku ku kyen ikyenricwu-wu, na te m ta-wu tetso be, afu ú tē m ru ajwo ukaen. Amaa Rimam nung rikaen ti ame ngwa, ti wande ti ame nde na fu nee awu fa-fu kusen utitang ire.”

⁴³ Tiri Laban ri te Yakubu baa, “Anda ba si anyisu-m, anyisu-ba si anyisu-m, asinn yi si asinn-m. Meme iken ti afu ku sae ne si ana-m. Imi ti ame u nde kyi te anyisu-m ti anda bane ti anyisu-ba ti aba mbae ne?

⁴⁴ Ba ti ti yer unju tetso kutampwa-m te fu tine.”

⁴⁵ Ikyaen yine, Yakubu sa kutxom sim ikyaen ititangsom.

⁴⁶ Ama Yakubu ri te ande-wu baa, a na byir atxom. Ama aba byir atxom tsi kurr pangma kumunn. Ama aba som u ci u ngwa tetso uwog kumunn atang.

⁴⁷ Laban kunn uwog wu ti unju Aram baa, Jegar-Sahaduta. Amaa Yakubu kunn ana-wu ti unju Mbaibrane baa, Galeyedi.

⁴⁸ Laban ri baa, “Atxom yi ti tsi kurr ne si unju ti yer-m te fu yaka ne.” Nee iken ti nde a kunn uwog wu baa, Galeyedi.

⁴⁹ Rinyi uwog wu iki si Mizipa, ikyaen ti awu ri baa, “Yaweh ā sae kutampwa-m te fu kiye ti ati a ta rurwen tetso.

⁵⁰ Asiti afu a nde anyisu-m iyib ko afu a mbe anda tishe fa ba, ko ti unde iki ta te-wu ati be, tangsom baa, Rimam na ta kutampwa-m te fu.”

⁵¹ Laban ri te kyi Yakubu baa, “Sae atxom yi ti tsi kurr ne, ti kutxom na ititangsom wu ti ame sa sim kutampwa-m te fu ne.

⁵² Atxom yi ti tsi kurr ti kutxom na ititangsom ne, ame pu yi tsi ti yi u sae kutampwa-m te fu baa, ame na u yafe-m ayi ka uwog-fu be, afu ama na u yafe-fu ayi ba uwog-m ikyaen ira titibi be.

⁵³ Rimam na Ibrahim ti Rimam na Nahor ti Rimam na itse-ba ā pwen rikwén kutampwa-ti.” Yakubu ama ben uben yi Rimam ti itse-wu Ishaku ku kyen ikyenricwu-wu.

⁵⁴ Yakubu twen ikentitwen utaen rikwen atang, ama u kunn ande-wu ba ti a na ba ci ukwab. Isim ti aba ci tag wuci yi, aba som ti utaen rikwen atang pu ucwefam.

⁵⁵ Ucwe fam kiskinn, Laban ye anyisu na anyisu-wu bur utob ti anyisu-wu ti anda ba ti baen Yakubu, ama u wae na ba ira. Isim ayine, awu nwunn u kafe ru-wu ti kununn-wu.