Kucangtsi 30 - Kutsingken Ira Rimam ti Saen Kyag

Kitsinn Kutampwa Rahel ti Leyatu

¹ Ti Rahel nung ti awu mbae na-wu Yakubu umbae be, awu sa kitsinn tsi ti mbiya-wu. Awu ri te Yakubu baa, “Nda m umbae, ko ame u cwu.”

² Utob Yakubu ndembeb. Awu ri baa, “Ame si Rimam ti yir kyi rishwu-fu ti afu na mbae-fu umbae be a.”

³ Ama Rahel ri baa, “Nung, Biliha upyi-m ta re. Nae te wu ti awu ā mbae umbae na m, ti ikyaen-wu, rinyi-m u kunn atang.”

⁴ Ikyaen yine, awu pu Biliha, upyi-wu ti unda, na Yakubu ti awu na mbe. Yakubu nae te wu,

⁵ ama awu kyaen rishwu u mbae na wu umbae ti urom.

⁶ Ama Rahel ri baa, “Rimam nung baa, ame na si-m ti riraen be. Awu fxen itijwam-m ama u nda pu wu ame umbae.” Ikyaen yine awu kunn rinyi umbae wu baa, Dan.

⁷ Biliha kyaen kyi rishwu u mbae na kyi Yakubu umbae ti urom ti ifaen.

⁸ Rahel ri baa, “Ame kwab ukwab ti mbiya-m, ama u ci pu m awu.” Ama awu kunn rinyi umbae wu baa, Nafitali.

⁹ Ti Leyatu nung baa, iki be awu na u mbae-wu umbae cwucwo be, awu pu Zilipa, upyi-wu, na Yakubu ti awu na mbe.

¹⁰ Zilipa, upyi Leyatu mbae umbae ti urom na Yakubu.

¹¹ Leyatu ri baa, “Ame tu pu m itinyang!” Ama awu fa rinyi-wu baa, Gad.

¹² Zilipa, upyi Leyatu, mbae kyi umbae ti urom ti ifaen na Yakubu.

¹³ Ama Leyatu ri baa, “Ame tsen utob ikyaen ti, tine, anda u kunn m baa, Tsentob.” Ikyaen yine awu fa rinyi umbae wu baa, Asher.

¹⁴ Usir iki kiye ti a ku bunn alikama, Roben ru yi ufang u ka tu afub mandareki, u mum ipab-wu ba na iya-wu Leyatu. Rahel jwam Leyatu baa, “Si na m ipab mandareki umbae-fu ti m u to ngwa.”

¹⁵ Ama Leyatu ri te wu baa, “Ubaen-m ti afu sikyi ne, ayi pang-yi afu be ti afu ku sha kyi ipab mandareki umbae-m a.” Rahel ri baa, “Asiti afu a si na m ipab mandareki umbae-fu, ame u cwe na wu ti wu nae te fu utitang ne.”

¹⁶ Kiye ti Yakubu ru ufang ku ba ureb, Leyatu ter ka kyang tag wu fengo u ri te wu baa, “Afu u nae te kang m utitang ne, ikyaen ti ame jab pu m afu ti ipab mandareki umbae-m.” Ama Yakubu nae te wu utitang wu.

¹⁷ Rimam fxen itijwam Leyatu, awu kyaen rishwu u mbae na Yakubu umbae ti itsong.

¹⁸ Tiri Leyatu ri baa, “Rimam pae pu wu ame kujwojang ikyaen upyi-m ti unda ti m sa baen ubaen-m.” Ikyaen yine awu fa rinyi umbae wu baa, Isakar.

¹⁹ Leyatu kyaen kyi rishwu u mbae umbae ti urom ti itsongnjo na Yakubu.

²⁰ Ama awu ri baa, “Rimam nda pu wu ame rinda ti tinyang. Kiye wune ubaen-m u nda m rurob ikyaen ti ame mbae na pu m awu anyisu arom itsongnjo.” Ama awu fa rinyi umbae wu baa, Zebulun.

²¹ Kiye iki cwucwo awu mbae umbae ti unda ama u fa rinyi-wu baa Dina.

²² Ama Rimam tangsom ti Rahel. Awu fxen itijwam Rahel ama u mbubta wu rishwu umbae ti mbae.

²³ Awu kyaen rishwu u mbae umbae ti urom u ri baa, “Rimam sa ru pu wu ame rukwae.”

²⁴ Awu fa rinyi-wu baa, Yusufu, ama u ri baa, “Yaweh ā nda kyi m umbae ti urom.”

²⁵ Isim ti Rahel mbae Yusufu, Yakubu ri te Laban baa, “Nda m riyae ti m u kafe ru ti uten-m.

²⁶ Pu na m awa-m ti anyisu-m, ti ame nde wande na fu risu-ba ti m u kafe ru ti uten-m. Afu nung pu fu wande ti ame nde na fu.”

²⁷ Laban jwam wu baa, “Asiti ame a tu kutxuwe titinyang uwe-fu, som te ra m ka uwe. Ikyaen imi ame caen ye pu m baa, ayi si ikyaen-fu ti Yaweh nde m ti tinyang ayine.

²⁸ Afu ku putsa m imwa ti ame u pae na fu?”

²⁹ Yakubu ri baa, “Afu nung pu fu wande ti ame nde na fu, ti ame shi asinn-fu nyinyang na fu.

³⁰ Kiye ti ame ba tu fu, afu site iken pang kujwo-fu. Ama tine, afu ba site iken yang-yi tiri, meme iken ti ame ku nde na fu, titinyang Yaweh ku ta atang. Amaa, isinn ti ame u ba nde-m ti risu-m?”

³¹ Laban rang wu baa, “Imi ti ame u nda fu?” Yakubu ri baa, “Ame ku sha-m iken iki kujwo-fu be. Asiti afu a cwe itijwam ti ame u jwam fu ne, ame u shi na kyi fu asinn-fu cwucwo.

³² Nda m ti m sang uwae asinn-fu yine yaka ne, ti m pu ruye meme iwen ti ta ribae ti iwen titibyir, ti ayi ā si kujwofwa-m.

³³ Ikyaen ayine, kubenti-m u ba ta tso uwe ike, kiye ti afu a ba ku baen asinn-m ti ana-fu. Asiti ayi ti ta-yi ribae ko titibyir be iki a ta fa uwae ana-m, afu u nung baa, ame na si umbae ti riyib.”

³⁴ Laban ri baa, “Ame cwe pu m. Ati nde pangma ti afu ri.”

³⁵ Tí usir wu Laban tsab ruye tag meme iwenten tishir ti ta ribae, ti iwenten tiyae ti ta ribae ti meme iwentam itibyir. Awu pu yi na anyisu-wu ti aba na nungkyi yi.

³⁶ Tiri awu ru ikyin na usir ita, u ya ayi ti tsitsi ta Yakubu ti isim ti wu na shi.

³⁷ Yakubu ka pye ajwo ituku popula ti alimon ti pilen, ama u bwong iyen ikyab iyen ikyab-yi, u ya yi ta foong.

³⁸ Awu pu yi ka sim kyife uwog ti asinn yine ku ngwa ambyi atang meme.

³⁹ Ajwo ituku ayi tsi asinn yi ti uwe kiye ti ayi ba ku ngwa ambyi, ama ku tso utso. Tiri ayi mbae imbae ti ta ribae ko titibyir.

⁴⁰ Yakubu tsab imbae asinn yine tsi ikyab, ama ti tsitsi awu pu yi tsi te ayi ti ta ribae ko itibyir ana Laban. Ikyaen yine awu tsab asinn iki na ijwe-wu. Ayi tsi txi ti ana Laban.

⁴¹ Kiye ti asinn ti kpakang a sha ti ayi u tso utso, Yakubu u sa ajwo ituku yine ka sim uwe asinn yi uwog ti ayi ku ci wuci atang, ti ayi na tso itso yi uwog wu fer ajwo ituku yine.

⁴² Amaa ayi a si-yi asinn ti ninam, awu nde-wu ahan be. Ikyaen yine asinn ti ninam si ana Laban, ti kpakang ama si ana Yakubu.

⁴³ Fengo wune, Yakubu tu rifunn yang-yi u tu itiru uwe timambe, u site asinn ti apyi ti arom ti ti anda ti ikyinnsu ti kumunn isim ti ikyinnsu meme.