Kucangtsi 3 - Kutsingken Ira Rimam ti Saen Kyag

Itijwunnsi Unde

¹ Uwae ibye kutur ti Yaweh Rimam kyae meme, ikentibi site itsab tí kufur ti skeb titag. Awu rang unda wu baa, “Kubenti ti Rimam fa ni kusen baa, ani na ci-ni awaen ituku iki ufang ike be né?”

² Unda wu ri te ikentibi baa, “Iyee, ati u ci awaen ituku ti ta ufang ike ne,

³ amaa, Rimam fa ti kusen risu awaen kutuku ti ta kutampwa ufang wune baa, ati na ci-ti ayi be, ati na sa kujwo tekunn-ti ayi be, be ati na u cwu.”

⁴ Ikentibi ri te unda wu baa, “Ani u cwu-ni be.

⁵ Rimam nung ti ani a ci, ayib-ni u mbubta, ani u te wu pang atso, u nungye itinyang ti itibi.”

⁶ Ti unda wu nung baa, awaen kutuku wu na nyang ti ci, u nyang ti sae, ama na ku nda ande itinungye tí ben-ayib, awu kwaen u ci, u pu ariki ba na ubaen-wu, ubaen-wu pu ci.

⁷ Tiri ayib-ba mbubta, aba nungye ti aba tsi ribam. Ikyaen yine aba kyaeb atsing kutuku skaen.

⁸ Adamu ti uwa-wu fxen akyae ikyin ti Yaweh Rimam ku kyang uwae risaen ufang atang ti usir sunn ku pu wu. Aba sha imbyi kufub, u ka tam atang ti Rimam na nungye-wu aba be.

⁹ Ama Yaweh Rimam kunn unde wu, u rang wu baa, “Afu ta-fu aka?”

¹⁰ Awu cwe ira u ri baa, “Ame fxen ikyae afxen-fu ti ku ba uwae ufang ike, ama ikyenricwu ye m, ikyaen ti ame tsi ribam, nee iken ti nde ame ba titam.”

¹¹ Rimam rang wu baa, “Aye ti ri te fu baa afu na tsi ribam? Awaen kutuku ti ame fa fu kusen baa, afu na ci-fu be né, afu ci pu fu awu be a.”

¹² Adamu ri baa, “Unda wu ti afu pu na m ti wu na som te m né, awu ti kwaen na m awaen kutuku wu, ama ame ci.”

¹³ Yaweh rang unda wu baa, “Imi ti afu nde ne?” Unda wu ri baa, “Mbaa ikentibi ti kyaefa m, nee ame ci awaen kutuku wu re.”

¹⁴ Yaweh Rimam ri te ikentibi wu baa, “Ikyaen iken ti afu nde ne, kufwag ta risu-fu skeb ana iken ti shi ti ibye kutur ti tsitsi meme! Uwae unyang-fu, afu u ten ti rishwu u ci isa.

¹⁵ Ame u sa kuka tsi kutampwa-fu, ti unda wu, kutampwa utso-fu, ti utso unda wu. Afu u pye wu ti ukyig kufxen, awu ama u jwog mbub risu-fu.”

¹⁶ Unda wu ama, Rimam ri te wu baa, “Ayi u si fu ti kicaeb timambe kiye umbae ti mbae. Ijaen-fu ama u tsi kunn rimenn ubaen-fu, awu u ta risu-fu.”

¹⁷ Adamu ama, Rimam ri te wu baa, “Afu fxen uwa-fu, u ci awaen kutuku ti ame fa fu kusen risu-wu, ti afu na ci-fu be. Ikyaen yine, ame faen riben kufaen ikyaen-fu. Afu u tóm, u nde rikaen titawe afu u ci u ngwa kaa sang usir ti afu u cwu.

¹⁸ Irum ti acwong ti ikajwo u shab tsoye riben ikyaen-fu.

¹⁹ Tí atsam-fu, afu u ci wuci-fu kaa kwer ti usir ti afu u kafe si ti yi riben, ikyaen ti afu tsoye riben. A kyae fu ru ye riben, afu u kafe si ti riben.”

²⁰ Adamu fa rinyi uwa-wu baa, “Awa” ti ku tso baa, awu na si iya ande ti site unyang meme.

²¹ Yaweh Rimam pu apwa ibye na Adamu ti uwa-wu ti a na cwun kyi ribam-ba.

²² Ama Yaweh Rimam ri baa, “Tine, unde kafe pu wu pangma kinjo uwae-ti, awu nung pu wu itinyang ti itibi. Ti byangkyi wu, be, awu kaa kwaen awaen kutuku na unyang ci, ama u cwu-wu cwucwo be.”

²³ Ikyaen yine, Yaweh Rimam rwae unde ru ye uwae ufang Eden, ti wu na ka tom riben uwog ti a kyae wu tsoye atang.

²⁴ Isim ti awu rwae unde wu ru ye pu wu, awu pu kerubi iki tsi kyi uwe usir ti kiskinn, fengo ti ku sang yi uwog kutuku na unyang ti ta ufang Eden. Ayi ye su kisum wen ti ku jae mang mang atang ti aba na kong kutuku unyang wu.