Kucangtsi 28 - Kutsingken Ira Rimam ti Saen Kyag

Yakubu Sha Unda ti Awu u Mbe

¹ Ikyaen yine Ishaku kunn Yakubu u nde wu itinyang u ri te wu baa, “Umbae-m, mbe-fu unda ti Kanana be.

² Ru yi Padan-aram, yi kununn Betuwel, itse iya-fu. Ru yi atang ti fu ka mbe kinjo uwae anyisu ti anda uye-fu, Laban.

³ Rimam ti site kuko patag ā nde fu itinyang, ti fu mbae jwunn, u jwunn ama u kafe mbukwen ande.

⁴ Awu ā nde fu ti rishi-fu itinyang pangma ti awu nde na Ibrahim, ti fu ba somkyi riben wu ti ati si rikyen atang ne, riben wu ti Rimam nda Ibrahim.”

⁵ Isim yine, Ishaku tē Yakubu ru yi Padan-aram uwog Laban umbae Betuwel urae Aram, inja Rebeka, iya Yakubu ti Esuwa.

Esuwa Mbe Kyi Unda Tishe

⁶ Esuwa fxen baa, Ishaku na wae na pu wu Yakubu ira, na u tē wu ru pu wu yi Padan-aram, ti awu na ka mbe unda atang, ama fa wu kusen baa, awu na mbe-wu unda yi Kanana be.

⁷ Ama Yakubu na nae risu riben te ira itse-wu ti iya-wu, ama na ru pu wu yi Padan-aram.

⁸ Tiri Esuwa nungye ti unda ti Kanana ti awu mbe na nyang-yi uwae itse-wu Ishaku be.

⁹ Ikyaen yine Esuwa ru ka mbe umbae Ishimayel ti unda fa kyi awa-wu ti kununn. Rinyi unda wu si Mahalati, mbiya Nebayoti umbae Ishimayel ti si umbae Ibrahim.

Yakubu Sunn Kurwa yi Betel

¹⁰ Yakubu ama, isim ti awu nwunn Beyersheba u ye ikyin ku ru yi Haran.

¹¹ Ti awu ka sang uwog iki ama usir te pu wu, awu sa kutxom ta, u sa risu-wu naetsa atang ku cwag kicwag.

¹² Atang awu sunn kurwa baa, awu na sae kufwá iki ti tsi riben u tso ka sang ti apupwen, ama atom Rimam ti apupwen ku tsutso ku sisi atang.

¹³ Yaweh ama tsitsa risu kufwá wu u ri baa, “Ame ti si Yaweh, Rimam na abitse-fu Ibrahim, ti Ishaku. Ame u nda fu ti rishi-fu riben wu ti afu nae atang ne.

¹⁴ Rishi-fu u jwunn pangma isa riben. Afu u ka ru usir ti kiskinn ti ti ureb, ti isi ti isku meme. Ande utense u tu itinyang ru uwog-fu ti rishi-fu.

¹⁵ Nung! Ame te fu ta tetso, ame u kyir fu ko aka ti afu a ru, ame u pu fu kafe ba ti riben wune. Ame u ya fu ta-m be, se ame a nde pu m meme iken ti ame yer unju te fu.”

¹⁶ Ti Yakubu shwu kicwag, awu ri baa, “Kubenti, Yaweh ta uwog wune, ama ame nung-m be ara.”

¹⁷ Ikyenricwu ye wu, awu ri baa “Uwog wune site riyinn, awu si kang kusog Rimam, u si ufu ti ku tso yi apupwen.”

¹⁸ Ucwe fam-yi ti kiskinn fifae, Yakubu sa kutxom wu ti awu sa ta risu-wu utitang wu, u sa sim riben ti u si kutxom na ititangsom, ama u yaen kindob si risu-wu.

¹⁹ Awu kunn rinyi uwog wu baa, Betel, ti imbyi-yi si “kusog Rimam”, amaa, kucang, a ku kunn rinyi uwog wu baa, Luzi.

²⁰ Atang Yakubu yer unju te Yaweh baa, “Asiti Rimam a te m ta tetso, u kyir m uwae ikyin-m ti ame ku ru ne, ama u nda m wuci ti atupwa ti ame u si,

²¹ ti ame a ru, u ka kafe ba ti kusog itse-m uwae kujimshwur, Yaweh u si Rimam-m,

²² ama kutxom wu ti ame sa sim tsi ne u si kusog Rimam. Meme iken ti afu a nda m, ame u sa iken kinjo uwae rijwe na fu.”