Kucangtsi 27 - Kutsingken Ira Rimam ti Saen Kyag

Yakubu Kyaefa Ishaku u Mbe ra Itinyang

¹ Kiye ti Ishaku kyáen tag pu wu, ama ku sae ben-wu iken nyinyang cwucwo be, awu kunn Esuwa umbae kucang-wu, u ri te wu baa, “Umbae-m.” Esuwa cwe ira baa, “Eén.”

² Ishaku ri baa, “Fxen, ame kyáen tag pu m, ame nung-m usir ti ame u cwu be.

³ Tine pu isu kutur-fu ru ka sha ibye ba na m.

⁴ Nde itso wuci ti nyangtug, ti nyang uwae-m timambe ba na m ti m ci u wae ira na fu titawe ti ame u cwu.”

⁵ Rebeka ama tsi ku fxen ira ti Ishaku ku ri te umbae-wu Esuwa. Ti Esuwa nwunn ru pu wu yi kutur ti wu u kaa sha ibye ba,

⁶ Rebeka ri te umbae-wu Yakubu baa, “Nung, ame fxen itse-fu, ku ri te inja-fu Esuwa baa,

⁷ awu na ka sha ibye na ba nde na wu wuci titinyang, ti awu na u wae na wu ira uwe Yaweh titawe ti awu na u cwu.

⁸ Tine umbae-m, fxen m nyinyang. Nde iken ti ame u ri te fu ne.

⁹ Ru ka tsab iwenten titinyang ifaen uwae rukug ba na m ike. Ame u nde wuci titinyang, itso ti itse-fu ku sha,

¹⁰ ti fu ye ru ka na itse-fu. Awu u ci ama u nde fu titinyang titawe ti awu u cwu.”

¹¹ Yakubu ri te iya-wu Rebeka baa, “Inja-m Esuwa si unde ti site asing, ame ama si-m te asing be.

¹² Asiti itse-m a sa kujwo ku bwo m re? Ayi u tso ma ame na ku kyaefa wu fa. Ayine u shir na m kufaen, ayi u si yi titinyang cwucwo be.”

¹³ Rebeka ri te wu baa, “Umbae-m, kufaen yi ā si-yi risu-m! Nde iken ti ame ri te fu.”

¹⁴ Ikyaen yine awu ru ka ye iwen yi ba na iya-wu, ama iya-wu nde wuci titinyang, itso ti Ishaku ku sha,

¹⁵ u pu atupwa titinyang ana Esuwa umbae kucang-wu, ti awu site kusog, u pu si Yakubu.

¹⁶ Awu pu apwa iwen yine, fxeb ajwo ti rukog Yakubu

¹⁷ ama u ye wuci ti buredi ti awu nde, na Yakubu, umbae-wu.

¹⁸ Yakubu ye wuci ru uwe itse-wu, u ka ri baa, “Itse-m.” Ishaku cwe baa, “Eén, umbae-m, afu si-fu aye?”

¹⁹ Yakubu ri te itse-wu baa, “Ame si Esuwa, umbae kucang-fu. Ame nde pu m iken ti afu ri te m. Ibye yi ta re, nwunn ti fu kub, ti fu nde m itinyang tiri.”

²⁰ Ishaku rang wu baa, “Umbae-m, afu tu pu fu ibye yi tine a.” Awu ri baa, “Yaweh, Rimam-fu ti ndeya m, ame tu ibye yi ti kufe.”

²¹ Ama Ishaku ri te Yakubu baa, “Ko ba, ti m bwo ijwe-fu umbae-m, ti m nung ko afu si Esuwa.”

²² Yakubu ko ru ka tu itse-wu Ishaku, Ishaku bwo wu u ri baa, “Ujwin si ana Yakubu, amaa ajwo si ana Esuwa.”

²³ Ishaku nungye-wu Yakubu be, ikyaen ti, ajwo-wu kum asing-asing pangma ana inja-wu Esuwa. Ikyaen yine awu wae ira na wu.

²⁴ Ishaku rang kyi wu baa, “Afu si umbae-m Esuwa ara kubenti a.” Awu cwe baa, “Eēn, ame si umbae-fu Esuwa.”

²⁵ Ama Ishaku ri baa, “Umbae-m, ye ibye-fu yi ba ti fu to ba ti m kub, u wae ira na fu.” Yakubu ye wuci ti ambyi anam yi ba na wu, awu ci u ngwa.

²⁶ Ama Ishaku ri te kyi wu baa, “Ko ba, umbae-m, ti fu ye m bur utob.”

²⁷ Ama Yakubu ko ba u ye itse-wu bur utob. Ti Ishaku fxen ishing atupwa-wu, awu wae ira na wu u ri baa, “Ishing umbae-m si ishing tatu ti Yaweh wae fufa!

²⁸ Rimam ā sa upwen tsa uwae risaen-fu. Awu ā nda fu riben ti ajib, ti ku nyang wuci timambe, Awu ā nda ituku anam-fu waen shag.

²⁹ Ande ā si apyi-fu, ambukwen ande ā ba ku riben na fu. Afu u ta risu ameinja-fu, anyisu iya-fu u ku riben na fu. Meme ande ti a ri ndembeb fu, a u tu itibi. Ande ti a ri itinyang risu-fu, a u tu itinyang.”

³⁰ Isim ti Ishaku wae na tag pu wu Yakubu ira, ti awu ru ku yiye uwe itse-wu, inja-wu Esuwa ru kutur ba sang pu wu.

³¹ Awu ba to ibye yi ti awu wen u ye ba uwe itse-wu, u ri baa, “Itse-m, nwunn ti fu kub ibye yi ti ame to ba ne, ti fu wae na-fu ame ira tiri.”

³² Itse-wu Ishaku rang wu baa, “Afu si-fu aye?” Awu cwe baa, “Ame si umbae kucang-fu Esuwa.”

³³ Ishaku fwer ndembeb, ijwe-wu ku kukunn, ama awu rang baa, “Aye ti wen ibye u nde wuci ba na m nee ame ci kucang? Ame ci tag, u wae na pu m awu ira, titawe afu sang ku ba ne. Kubenti, itinyang si kunn pu yi ana-wu.”

³⁴ Ti Esuwa fxen ira itse-wu ayine, awu jwub ira jwub jwub jwub, u ri baa, “Itse-m, wae na kang m ira ama bē ame u nde rimang?”

³⁵ Ishaku ri baa, “Inja-fu ba kyaefa pu wu ame, ama u mbe ra pu wu itinyang-fu.”

³⁶ Esuwa ri baa, “Ayine fa pu yi ti apu-ifaen ti awu nde kufúm te m! Nee iken ti nde rinyi-wu si Yakubu. Awu fxae mbe ra ndufu-m, u ba fxae mbe ra kyi pu wu titinyang-m.” Ama Esuwa ri kyi te itse-wu baa, “Itinyang iki ta kyi-yi ti afu u nda m be a.”

³⁷ Ishaku ri te Esuwa baa, “Ame nda pu m Yakubu ti awu na si unde ti uwe-fu, fa ti ameinja-wu ti tsitsi meme. Ame wae na pu m awu ira baa, wuci-wu ti ituku anam-wu risaen afang na u nyang timambe. Ikyaen ayine, imi ti tsitsi kyi kujwo-m ti ame u nda fu, umbae-m?”

³⁸ Esuwa rang kyi itse-wu baa, “Afu site nyáng itinyang kinjo amam a, itse-m? Wae na m ira ama re, itse-m.” Isim ayine Esuwa mbub ukunn ricwu ta.

³⁹ Ishaku ri te wu baa, Uwae usom ti som-fu utense ike, afu u tu-fu riben ti ajib be, upwen ama u tsa-wu nyinyang uwae risaen-fu be.

⁴⁰ Uwae usom ti som-fu, afu u ci ti ribom usu rika-fu, ama u si upyi inja-fu. Amaa, asiti afu a kukwab, u ndub sha wu, afu u nwaen ukwae-fu ruye rijwaen-wu.

⁴¹ Isim ayine, Esuwa sa Yakubu kuka ikyaen itinyang ti itse-wu wae na wu. Awu ri te ijwe-wu baa, “Iticwu itse-m fer ku pu yi. Isim ti ame a jwub mam pu m icwu itse-m, ame u wen inja-m, Yakubu.”

Yakubu Ter Ru yi Uwog Iye-wu Laban

⁴² Ti Rebeka fxen kumyae Esuwa, awu kunn Yakubu u ri te wu baa, “Nung, inja-fu Esuwa ku myae ti awu u wen fu.

⁴³ Tine, uyin-m, nde ira ti ame u ri te fu. Nwunn ti kufe, ti fu ru uwog inja-m Laban yi uten Haran.

⁴⁴ Ru ka som ra atang te wu, se kiye ti rinae inja-fu a jim pu yi.

⁴⁵ Kiye ti inja-fu a munnji pu wu ti iken ti afu nde te wu, u si-wu ti rinae te fu cwucwo be, ame u tsa kutsa kaa kunn fu kafe ba. Ikyaen imi ti ame u shanum anyisu-m meme ifaen-ba ti usir kinjo?”

⁴⁶ Isim kiye iki, Rebeka ri te Ishaku baa, “Ame num pu m ijwe ti anda ti Hiti ba ti Esuwa mbe ne. Asiti Yakubu a mbe kyi unda Hiti iki, ayi nyangskeb ti ame u cwu-m.”