Kucangtsi 25 - Kutsingken Ira Rimam ti Saen Kyag

Ibrahim Mbe Kyi Unda Titawe M Cwu

¹ Ibrahim mbe kyi unda iki ti rinyi-wu si Ketura.

² Unda wu mbae na wu Zimran ti Jokishan ti Medan ti Midiyan ti Ishabak ti Shuwa.

³ Jokishan si itse na Sheba ti Dedan. Rishi na Dedan ti si ande ti Ashur ti ande Letushi ti ande Lewumi.

⁴ Anyisu Midiyan si Efa, ti Efer ti Hanoki ti Abida ti Eldaa. Abane meme si anyisu Ketura.

⁵ Ibrahim pu meme iken ti awu site na Ishaku.

⁶ Ti kiye ti Ibrahim ta ti unyang, awu pu rinyangwae na meme anyisu uwa-wu ketura ti tsitsi, u tē ba ru uten ti ta uwe usir ti kiskinn ikyaen ti a som rurwen te umbae-wu Ishaku.

⁷ Meme asang Ibrahim ka ukob kinjo ti mae ita mbe rijwe asu itsong (175).

⁸ Ama Ibrahim ci mae ukum-wu, u cwu putsa abitse-wu.

⁹ Anyisu-wu, Ishaku ti Ishimayel, sa wu nji fifae na Makpela fer ti Mamre, uwae risaen na Efiron umbae Zohar urae Hiti.

¹⁰ Riben wu si riben ti Ibrahim jab mbe kujwo ande ti Hiti. Ayi si atang ti a nji Ibrahim ti uwa-wu Saratu.

¹¹ Isim iticwu Ibrahim, Rimam nde umbae-wu Ishaku itinyang. Ishaku nae fer Ribung Lahai Royi.

Rishi na Ishimayel

¹² Abane si rishi Ishimayel umbae Ibrahim, ti Hagar unda Ejib, upyi Saratu, mbae na Ibrahim.

¹³ Rinyi anyisu Ishimayel bag ti umbae ti kucang ba sang umbae ti ricwunnkyi ta re. Umbae ti tawe si Nebayoti, utiputsa-wu si Kedar, ti Adibeyel, ti Mibisam,

¹⁴ ti Mishima, ti Duma, ti Masa,

¹⁵ ti Hadad, ti Tema, utiputsa-wu si Jetur, ti Nafishi, ti Kedema.

¹⁶ Abane ti si anyisu ti arom Ishimayel ti si abikwe risu uten-ba, ti uwog ti som-ba.

¹⁷ Ishimayel nde asang ukob kinjo ti rijweta mbe itsongfaen (137), ama u ci mae ukum-wu u cwu, u cwu putsa abitse-wu.

¹⁸ Rishi-wu nae nwunn ti Havila ka sang ti Shur, fifer ti uten Ejib, asiti afu a putsa Asiriya. Aba nae txi ra ti uwog ti ameinja-ba nae atang.

Itimbae Esuwa ti Yakubu

¹⁹ Rishi Ishaku, umbae Ibrahim ta re. Ibrahim si itse na Ishaku.

²⁰ Ishaku site asang mae ifaen kiye ti awu mbe Rebeka, unda Betuwel unde ti Aram, ti ta Padan-aram. Rebeka wu si mbiya Laban, unde ti Aram.

²¹ Ishaku jwam Rimam risu uwa-wu, ikyaen ti awu kunn utsob. Yaweh fxen itijwam-wu, ama uwa-wu Rebeka kyaen rishwu.

²² Anyisu ishe ba ku kwab atso ikwab uwae rishwu iya-ba, ama awu ri baa, “Ayine si imi ti ku nde uwae rishwu-m ne?” Ikyaen yine awu ka rang imbyi yi uwog Yaweh.

²³ Yaweh ri te wu baa, “Anyisu ishe ba ti ta rishwu-fu ne u kafe mbukwen ande ifaen. Aba u cwe-ba ira atso be. Kinjo u kpag skeb ti ifaen, ti ndufu u ta imbyi ti itinying.”

²⁴ Kiye ti rishwu Rebeka ben pu wu ti ti mbae, awu mbae anyisu ishe.

²⁵ Umbae titawe ruye, u si itibyaen, ijwe-wu meme kum asing. Ikyaen yine aba fa rinyi-wu baa, Esuwa.

²⁶ Isim ayine, inja-wu ruye, kujwo-wu ye shi Esuwa kufxen. Ikyaen yine, aba kunn wu baa, Yakubu. Ishaku site asang mae ita kiye ti Rebeka mbae anyisu bane.

Esuwa sa Ndufu-wu Jabci

²⁷ Anyisu ba ser ben. Esuwa kafe tatu, ku kyang kutur. Yakubu ama ku ri-wu ira ti kufe be, u ku som ti kununn.

²⁸ Ishaku site ure ti Esuwa timambe, ikyaen ibye kutur ti awu ku wen ba. Rebeka ama site ure ti Yakubu.

²⁹ Kiye iki tiri Yakubu ku to wuci, ama Esuwa ru kutur ba, awu pù rikòb.

³⁰ Awu ri te Yakubu baa, “Si na m wuci tibyaen-fu ayine ti ame u ci, bē ame pù pu m rikòb.” Ne si iken ti nde aba ku kunn wu baa Edom.

³¹ Yakubu ri te wu baa, “Sa ndufu-fu jabci na m titawe.”

³² Esuwa ri baa, “Nung, rimenn ti ku wen m wen ne, imi ti ndufu u nde na m?”

³³ Ama Yakubu ri baa, “Ben uben titawe.” Ama awu cwe, u ben uben, u sa ndufu-wu jabci na Yakubu.

³⁴ Tiri, Yakubu pu wuci na Esuwa, awu ci u ngwa, ama u nwunn ru-wu. Ayine si fengo ti Esuwa saeru rurob ndufu-wu.