Kucangtsi 22 - Kutsingken Ira Rimam ti Saen Kyag

Rimam Myae Uwae Kinjo Ibrahim

¹ Isim yine, Rimam myae Ibrahim kumyae. Awu kunn wu baa, “Ibrahim.” Ibrahim cwe baa, “Eén.”

² Ama Rimam ri baa, “Sa umbae-fu, ti urom ti si kum awu kinjo-wu amam, awu Ishaku, ti afu site ure te wu timambe. Ru yi uten Moriya, u ka sa wu twen ikentitwen atang na m, utaen rikwen ti ame u tso fu.”

³ Ucwe fam kiskinn, Ibrahim yam ituku baen ikyinnsu-wu, u pu Ishaku ti apyi-wu ifaen, aba ye ikyin ku ru yi uwog ti Rimam ri te wu, ti a u ka twen ikentitwen atang na wu.

⁴ Usir ti ita, Ibrahim pu ayib tso u sae ye uwog wu ti fengo ti rwen.

⁵ Awu ri te apyi-wu baa, “Ni ti ikyinnsu wune ā tsi ti ike. Ame ti Ishaku u ru yi uwe akwen. Ati kaa fen Rimam ti ti kafe ba.”

⁶ Ibrahim ye ituku na iken ti twen yi su Ishaku, ama u ye su ana wu urwa ti kisim. Ti meme ifaen-ba kyang ku ru,

⁷ Ishaku kunn itse-wu Ibrahim baa, “Itse.” Ibrahim cwe baa, “Umbae-m.” Ishaku rang baa, “Nung urwa, ti ituku ta re, amaa iwen ikyaen ikentitwen yi ta-wu aka?”

⁸ Ibrahim ri baa, “Umbae-m, Rimam ti risu-wu ti u nda ti iwen ikentitwen yi ti ajwo-wu.” Ama meme ifaen-ba ru yi uwe ti ikyin ti kyang.

⁹ Ti aba ka sang pu ba uwog ti Rimam ri te wu, Ibrahim mbye kuta, u kyae ituku cwutsa atang. Ama u cwong umbae-wu Ishaku, u ye wu naetsa risu ituku yi.

¹⁰ Awu nwaen kisim tso ti wu u yer wen umbae-wu.

¹¹ Ama atom Yaweh kunn ira apupwen baa, “Ibrahim! Ibrahim!” Awu cwe baa, “Eén.”

¹² Atom wu ri baa, “Ya ajwo ta ijwe mbae wune. Nde-fu awu iken iki be. Tine ame nung pu m baa, afu na site ikyenricwu Rimam, ikyaen ti, afu byang-fu ame umbae-fu ti si kum awu amam be.”

¹³ Ibrahim pu ayib tso, u sae iwentam ti ishin-wu faesang ajinn uwae kutur kuka atang. Awu ka ye iwen wu, u twen ikentitwen atang na Rimam kutunn unju Ishaku.

¹⁴ Ikyaen yine, Ibrahim kunn rinyi uwog wu baa, “Yaweh u sa ba.” Ba sang ti yaka, aba ku ri baa, “Yi Rikwen Yaweh, a u sa ba.”

¹⁵ Atom Yaweh kunn kyi Ibrahim ira ti apu-ifaen yi apupwen,

¹⁶ u ri te wu baa, “Ame Yaweh ben uben yi rinyi-m baa, ikyaen iken ti afu nde ne, ti afu byang-fu ame umbae-fu ti si kum awu amam be,

¹⁷ ame u nde kang fu itinyang. Rishi-fu u jwunn pangma aswer ti ta apupwen ti isa riben. Utso-fu u ci mbe ra uten ande rika-ba.

¹⁸ Ikyaen risu ti nae riben-fu, meme mbukwen ande ti utense u tu itinyang ru ye utso-fu.”

¹⁹ Ibrahim kafe ka tu apyi-wu, ama aba ye ikyin ru yi Beyersheba, uwog ti Ibrahim som atang.

Rishi Nahor

²⁰ Kiye iki tiri, Ibrahim fxen baa, Milika uwa inja-wu Nahor na mbae pu wu anyisu ti arom.

²¹ Umbae kucang-wu si Uzi, ti ifaen-wu si Buzi, ti ita-wu si Kemuwel ti si itse Aram.

²² Aba ti tsítsí ama si Kesedi, ti Hazor ti Pildash ti Jidilafi ti Betuwel.

²³ Betuwel si itse Rebeka. Anyisu itsongta bane ti Milika mbae na Nahor, inja Ibrahim.

²⁴ Nahor mbe unda iki tsi ise ti rinyi-wu baa, Rewuma. Unda wu mbae na wu anyisu ti arom ba ne, Teba, ti Gaham, ti Tahashi, ti Maka.