Kucangtsi 21 - Kutsingken Ira Rimam ti Saen Kyag

Saratu Mbae Ishaku

¹ Pangma ti Yaweh yer unju, awu nde Saratu itinyang.

² Saratu kyaen rishwu, u mbae umbae ti urom na Ibrahim kiye ti awu kyáen tag pu wu. Awu ba mbae wu kiye ti Rimam yer unju te wu.

³ Ibrahim fa rinyi umbae wu ti Saratu mbae na wu baa, “Ishaku.”

⁴ Ti Ishaku nde usir itsongta, Ibrahim tsen na wu kutxin pangma ti Rimam ri te wu.

⁵ Ibrahim ta te asang mae itsong kiye ti a mbae Ishaku.

⁶ Saratu ri baa, “Rimam nda pu wu ame utob ti tsen ti akyaen ti skaen. Ko aye ti a fxen, awu u skaen te m.”

⁷ Cwucwo awu rang baa, “Kucang aye ti u ri te Ibrahim baa, Saratu na u mbae umbae? Amaa, ame mbae na pu m awu umbae ti urom kiye ti awu kyáen tag pu wu.”

⁸ Ishaku ser ben, ama usir ti a ter wu kibyaen, Ibrahim nde ukwab tiyang.

Ibrahim Tē Hagar ti Umbae-wu Ishimayel Ru

⁹ Usir iki, Saratu nung umbae wu ti Hagar, unda ti Ejib wu, mbae na Ibrahim. Umbae wu ku txir Ishaku itxir.

¹⁰ Ama Saratu ri te Ibrahim baa, “Tē upyi wune ti umbae-wu ru. Umbae upyi wune u ci-wu rifunn ti uyin-m Ishaku be.”

¹¹ Ira yi caeb Ibrahim utob timambe, ikyaen Ishimayel, umbae-wu.

¹² Ama Rimam ri te Ibrahim baa, “Ndembeb-fu utob ikyaen umbae wune ti iya-wu Hagar be. Fxen ira ti Saratu ri te fu, ikyaen ti ayi si risu Ishaku ti rinyi-fu u kunn.

¹³ Ame u nda umbae upyi-fu ti unda wune mbae jwunn, u kafe mbukwen ande. Ikyaen imi, awu si anying-fu.”

¹⁴ Kiskinn fifae, Ibrahim pu wuci ti ambyi kukwer tswa Hagar ukwae, ama u tē wu ti umbae-wu ru. Unda wu nwunn ka yaen ku kyang uwae kutur kuka ti Beyersheba.

¹⁵ Ti ambyi mamtag uwae kukwer, Hagar ye umbae wu nae sang imbyi kufub iki,

¹⁶ ama u nwunn ka som uwog iki fer ti atang, ku jwub, ku kab baa, “Ame u sae-m umbae wune ti awu u cwu ayib-m be.”

¹⁷ Rimam fxen ira ti jwub umbae wu, ama atom Rimam kunn Hagar ira, u rang wu baa, “Imi ti nde, Hagar? Kyen-fu ikyenricwu be. Rimam fxen pu wu ira ti jwub umbae-fu, uwog ti awu nae atang ne.

¹⁸ Nwunn, ye umbae wu fa kujwo ti fu je wu. Ame u nda wu, awu u kafe mbukwen ande yang-yi.”

¹⁹ Rimam mbubta wu ayib ti wu nung kukwae ambyi, ama awu ka txi ambyi munn kukwer-wu, u nda umbae wu ngwa.

²⁰ Rimam ta te umbae wu, awu ser ben. Awu ku som uwae kutur kuka ama u kafe tatu.

²¹ Kiye ti awu ta uwae kutur kuka ti Paran, iya-wu pu unda Ejib ba baen wu.

Ibrahim ti Abimeleki Yer Unju Tetso

²² Kiye wune, Abimeleki, ti Fikoli Ukwe itaenrika-wu, ru ba ri te Ibrahim baa, “Rimam te fu ta tetso uwae meme iken ti afu ku nde!

²³ Tine, yer unju te m ti uben ti ben uwe Rimam ike baa, afu na u nde-fu tikong te m, ti anyisu-m, ti meme rishi-m be. Pangma ti ame tso fu ure, nde kubenti te m, tí uten wune ti afu si rikyen atang ne.”

²⁴ Ibrahim ri baa, “Ame ben uben.”

²⁵ Isim yine, Ibrahim sa ira ti jwub ba tu Abimeleki risu ribung iki ti apyi Abimeleki wu rwae mbe ra.

²⁶ Abimeleki ri baa, “Ame nung-m unde ti nde iken yine be. Afu ri te-fu ame be, ayi si tine ti ame ku fxen ira yine.”

²⁷ Ama Ibrahim ye iwen ti indag ba na Abimeleki, ama aba meme ifaen-ba cwe unju tetso.

²⁸ Ibrahim tsab iwentam tiyae itsongfaen ruye uwae rukug-wu.

²⁹ Ama Abimeleki rang wu baa, “Imbyi ayine ba imi nee afu tsab iwentam tiyae itsongfaen tsi kum ayi?”

³⁰ Ibrahim ri baa, “Mbe iwen itsongfaen yine kujwo-m, ti ayi ā tso baa, ame ti na mum ribung wune.”

³¹ Nee iken ti nde aba ku kunn uwog atang baa, Beyersheba, ikyaen ti, ayi si uwog wune ti ande ifaen bane yer unju ti uben ti ben.

³² Isim ti aba yer mam pu ba unju yi Beyersheba, Abimeleki ti Fikoli, Ukwe itaenrika-wu, kafe ru ti uten ti Filisti.

³³ Ibrahim yen kutuku tamariski yi Beyersheba atang, u fen Yaweh, Rimam ti tsi kukunn.

³⁴ Ibrahim som rikyen yi uten Filisti ka asang yang-yi.