Kucangtsi 20 - Kutsingken Ira Rimam ti Saen Kyag

Ibrahim Kyaefa Abimeleki

¹ Ibrahim nwunn Mamre u ru uwe ti Negeb, kujwo-isi Kanana, ka nae kutampwa Kadeshi ti Shur. Kiye ti awu som Gerar uwae kiye pang,

² Ibrahim ri te ande ba baa, uwa-wu Saratu na si mbiya-wu. Ikyaen yine, Abimeleki, ukwe Gerar, tsa kutsa ka kunn Saratu, u ye pu wu sang.

³ Utitang wu, Rimam ba uwog Abimeleki uwae kurwa, u ri te wu baa, “Nung! Afu si rukom ti ku kyang, ikyaen unda wu ti afu pu sang ne, si uwa unde.”

⁴ Kiye wu, Abimeleki nae te-wu unda wu khika be. Ikyaen yine awu jwam Rimam baa, “Itsekuru, afu u twenji ande ti raen-ba ira be a.

⁵ Unde wu ti risu-wu ri baa, unda wune na si mbiya-wu, unda wu ama ri-wu baa, unde wune na si inja-wu be a. Ame nde iken yine ti utob titinyang, ajwo-m meme sisaen.”

⁶ Ama Rimam ri te wu uwae kurwa baa, “Een, ame nung, afu nde yi ti utob titinyang, ama ame sha-m ti fu na nde m ikentitibi be. Nee iken ti nde, ame nda-m afu riya ti fu na nae te unda wu be.

⁷ Tine, pu unda wu kafe na Ibrahim ti atang. Awu si unde ti ku ya iskin ira Rimam. Awu u jwam na fu Rimam, ti fu cwu-fu be. Asiti afu a pu unda wu kafe ru-fu be, nung baa, afu ti ishikununn-fu meme na u cwu kang.”

⁸ Abimeleki nwunn ti kiskinn pab, u kunn funn meme afaen-wu, u tsag meme ira yi te ba. Ama ikyenricwu ye ba.

⁹ Ama Abimeleki kunn Ibrahim u rang wu baa, “Imi ti nde afu nde ti ahan? Ame raen fu ira imi nee afu shir ira titibi ti beb timambe ku si m ti ande-m risu? Afu nde pu fu iken ti nyang-yi ti fu u nde te m be.”

¹⁰ Abimeleki rang Ibrahim baa, “Imi ti afu ku kab rishwu-fu, ti afu nde itso ira yine?”

¹¹ Ibrahim ri baa, “Ame nde yi ku kab baa, ikyenricwu Rimam na ta-yi uwog ande ba ti uten ike be, ama aba na u wen m ikyaen uwa-m.

¹² Ti fa atang, kubenti, awu si mbiya-m, umbae itse-m, iya-wu amam ti txi, ama awu si uwa-m.

¹³ Kiye ti Rimam kunn me ruye kusog itse-m, ti ame nwunn ikyin ti kyang, ame ri te uwa-m baa, ‘Ure ti afu u tso m ta re. Meme uwog ti ati a ka, ri te ba baa, ame na si inja-fu.’ ”

¹⁴ Ama Abimeleki pu Saratu kafe na Ibrahim ti atang, ama u pu na wu iwen ti indag ti apyi ti arom ti ti anda meme.

¹⁵ Abimeleki ri te Ibrahim baa, “Nung riben ti nae ru ne. Ko aka ti a nyang fu, som-fu atang.”

¹⁶ Awu ri te Saratu baa, “Nung, ame ku nda inja-fu azurfa kumbub kinjo (1,000), ku tatso ko aye ti ta ike baa, afu na si-fu ti riraen be. Ko aye ama u nung baa, afu na si-fu ti riraen be.”

¹⁷ Ama Ibrahim jwam Rimam, ama Rimam nwangru Abimeleki ti uwa-wu ti apyi-wu ti anda, titawe rishwu-ba mbubta na umbae ti mbae.

¹⁸ Ikyaen ti, ti uwe-yi Yaweh cwunnkyi pu wu rishwu meme anda ti ta kusog Abimeleki, ikyaen Saratu uwa Ibrahim.