Kucangtsi 2 - Kutsingken Ira Rimam ti Saen Kyag

Ricwunnkyi Wande na Apupwen ti Riben

¹ Uwog wune, wande na apupwen ti riben ti iken ti ta uwae-yi meme mamtag.

² Rimam nde tag wande-wu, ama pu unyang uwae usir ti itsongfaen. Awu nde-wu wande iki atang be.

³ Rimam waefa usir ti itsongfaen, u sa wu tsi usir ti kuko, ikyaen ti, usir wu, awu nde-wu wande iki be.

⁴ Ayine si kuci na fengo ti Rimam mam apupwen ti riben. Kiye ti Yaweh Rimam mam apupwen ti riben,

Rimam Kyae Unde

⁵ utense tsi ukaen. Kiye wu, irum ti afub tsoye-yi khika be, ikyaen ti, Yaweh Rimam sa upwen tsa-wu utense khika be, unde iki ama ta-wu ti u tom riben be.

⁶ Amaa, ambyi ku kyeb tso riben, ku nda uwog meme pu iyim.

⁷ Ama Yaweh Rimam pxag ariben, u kyae unde atang. Rimam jwu ufunn ana unyang sang unde wu ruwen, ama unde wu kafe unde ti site unyang.

⁸ Yaweh Rimam kyae risaen kú uwae Eden ti ta uwe usir ti kiskinn, u sa unde ti awu kyae ka som atang.

⁹ Yaweh Rimam nda itso kutuku txitxi mbug tsoye riben atang. Ituku yi nyang ti ti sae, u nyang ti ti ci ama. Yi kutampwa risaen wu, kutuku ana unyang, ti kutuku ana itinungye itinyang ti itibi tsi atang.

¹⁰ Uyinn iki tsoye uwae Eden atang ku jwae risaen wu. Uyinn wu kata akyikya inje.

¹¹ Rinyi ti tawe si Pishon, ti sī tswa Havila uwog ti zinariya ta atang.

¹² Zinariya na uwog wu nyang timambe. Bedola ti onis ti si atxom tinyang ama, ta uwog wune.

¹³ Ti ifaen si Gihon ti sī tswa riben ti Kushi.

¹⁴ Ti ita ama si Tigrisi ti sī tsa usir ti kiskinn na Ashur. Ti inje ama si Yufiretis.

¹⁵ Yaweh Rimam sa unde wu som uwae risaen ti Eden atang, ti awu na tom wu, ama na u nungkyi wu.

¹⁶ Ama Yaweh Rimam nda unde wu unju baa, “Ci-fu awaen ituku ti ta risaen ike meme.

¹⁷ Amaa, kutuku ti ku nda unde nungye itinyang ti itibi ti ta risaen ike, ci-fu awaen-wu be, ikyaen ti, usir ti afu a ci wu, afu u cwucwu.”

¹⁸ Yaweh Rimam ri baa, “Ayi nyang-yi ti unde ā som kum awu amam be, ame u kyae na wu unde ti rukwer wu, ti u ndeya wu.”

¹⁹ Tiri, Yaweh Rimam mam ibye kutur ti inung ti ku pinn apupwen meme te isa riben, u pu yi ba na unde wu ti wu na fa yi rinyi. Rinyi ti unde wu a fa ibye titini, ayi si kunn pu yi rinyi-wu.

²⁰ Ne si fengo ti unde wu fa meme asinn rinyi, tí inung ti apupwen tí ibye kutur meme. Amaa, unde wu ta-wu te unde iki ti rukwer wu, ti u ndeya wu be.

²¹ Ikyaen yine, Yaweh Rimam nda unde wu sī kicwag burrr. Ama kiye ti unde wu ku cwag kicwag, Yaweh Rimam nwaen ra ukub ishi unde wu kinjo, u fxeb kyi uwog wu ti ibye ijwe,

²² ama u sa ukub wu ti awu nwaen ru ye ijwe unde wu kyae unda atang, u pu unda wu ba na unde wu.

²³ Tiri unde wu ri baa, “Awune si ukub na akub-m, ti ibye na ibye rimenn-m. Rinyi-wu u si unda, ikyaen ti, a kyae wu ruye rimenn urom.”

²⁴ Nee iken ti nde unde ku ya itse-wu ti iya-wu ta, ku ba bae fa te uwa-wu, meme ifaen-ba u kafe ijwe rimenn kinjo.

²⁵ Unde wu ti uwa-wu tsi ribam, ama u wae-ba rukwae atso be.