Kucangtsi 18 - Kutsingken Ira Rimam ti Saen Kyag

Ande Ita Sang Rikyen Uwog Ibrahim

¹ Usir iki ti usir ta utaen, Ibrahim som ufu kufug-wu ti ta fer ituku tiyang na Mamre, ama Yaweh tso risu-wu uwog-wu cwucwo.

² Ibrahim pu ayib tso, u sae ande ita tsi uwe-wu. Ti awu sae ande bane, awu fa sunwunn ti ritsen u ter ru ka jwunn ikyig riben uwe-ba.

³ Awu ri baa, “Itsekuru-m, asiti ame a tu kutxuwe titinyang uwe-fu, nyatsa-fu upyi-fu be.

⁴ A txi ra ambyi ba na ni ti ni jwo afxen atang, u pu ra unyang imbyi kutuku ike titawe.

⁵ Tine ti ani ru tsa pu ni uwog-m ike, ame u nde ra wuci na ni ti ni ci, u tu kpakang titawe ti ni ru.” Ande ba cwe u ri baa, “Nde iken ti afu ri.”

⁶ Ibrahim nwunn ti ritsen u sang ka tu Saratu uwae ufug, u ri te wu baa, “Myae umung kitu ita ti nde wuci ti kufe.”

⁷ Awu ama nwunn u sang uwae rukug asinn-wu, u ka ye imbae indag ti rikem na upyi-wu iki ti wu na nde ti kufe.

⁸ Ama awu sa yoguti, ti akang abyaen indag, ti ibye ti a to tag pu ba, ba na ande ba. Ti aba ku ci wuci ne, awu tsi fifer ti imbyi kutuku atang.

Ira Risu Itimbae Ishaku

⁹ Ande ba rang wu baa, “Uwa-fu Saratu ta aka?” Awu ri baa, “Awu ta uwae ufug akwen.”

¹⁰ Ama Yaweh ri baa, “Kubenti, pangma kiye wune uwae usang ti ku ba, ame u kafe ba kyi uwog-fu. Saratu, uwa-fu u mbae umbae ti urom.” Kiye wu, Saratu ta uwae kufug ti ta isim unde wu, ku fxen ira ti aba ku ri.

¹¹ Kiye wune, Ibrahim ti Saratu kyáen tag pu ba, aba site asang yang-yi akwen. Saratu ama nyatsa pu wu kiye ti awu u mbae umbae.

¹² Ti Saratu fxen ira-ba yine, awu skaen ikyaen ama u ri te ijwe-wu baa, “Ti ame kyáen tag pu m, unde ti kununn-m ama kyáen tag pu wu ne, imi ti u nyang kyi cwucwo?”

¹³ Ama Yaweh rang Ibrahim baa, “Imi ti nde Saratu skaen ikyaen u ri baa, ‘Ame u mbae kyi umbae ti ame kyáen tag pu m ne a.’

¹⁴ Iken iki ta atang ti kpag skeb Yaweh skeb a. Ame u kafe ba kiye wune, kusang ti ku ba. Saratu, uwa-fu, u mbae umbae ti urom.”

¹⁵ Ikyenricwu ye Saratu, ama awu yer rifen baa, “Ame skaen-m ikyaen be.” Ama Yaweh ri baa, “Iyee, afu skaen ikyaen.”

¹⁶ Ti ande ba nwunn ku ru, aba ka tsi uwog ti aba u sae Sodom. Ibrahim ama putsa ba ti wu pu ba ru ka tsita.

¹⁷ Yaweh ri baa, “Ame u tam Ibrahim iken ti ame sa tsi ti m u nde njwaa?

¹⁸ Ame nung pu m baa, rishi Ibrahim na u ba jwúnn timambe, ama ambukwen ande utense meme u ba tu itinyang uwog-ba.

¹⁹ Iyee, ame tsab pu m awu ti wu na tae anyisu-wu, ti rishi-wu ti ku ba isim-wu yi fengo-m, u nde iken ti pang atang, ti iken ti kubenti, ikyaen ti, ame Yaweh u kumunn unju ti yer-m te Ibrahim.”

²⁰ Yaweh ri baa, “Ira ti jwub risu itibi Sodom, ti Gomora ko pu yi, ikentitibi-ba ayi beb timambe.

²¹ Ame u si kaa nung, ko ikentitibi uten wu si pangma ti ame fxen. Asiti ande ba a beb pangma ti ame fxen, ame u nung.”

²² Ama ande ba kafe ku ru yi uwog ti Sodom, Ibrahim ama tsi ti uwe Yaweh atang.

²³ Ama Ibrahim ko fer wu, u rang baa, “Itsekuru, afu u fen mbeb ande ti kubenti ren fa ti ande titibi a.

²⁴ Asiti ande mae ifaen mbe rijwe a ta uwae uten atang, afu u twenji uten wu a. Afu u yata na-fu aba ikyaen ande mae ifaen mbe rijwe ti som usom ti kubenti bane be a.

²⁵ Itso itibi yine ā tsi rurwen te fu, ti afu u wenji ande ti som usom ti kubenti fa ti aba ti itibi, ti afu u nde te ande ti som usom ti kubenti pangma ti afu u nde te ande titibi. Ira titibi yine ā tsi rurwen te fu! Afu unde ti ku pwen utense rikwén, afu u nde-fu kubenti be a.”

²⁶ Ama Yaweh ri baa, “Asiti ame a tu ande mae ifaen mbe rijwe ti som usom ti kubenti uwae uten ti Sodom, ame u yata na meme uten wu ikyaen-ba.”

²⁷ Ibrahim ri baa, “Itsekuru, yata na m, ti fu nda kyi m riyae ti m u ri kyi ira te fu, ikyaen ti, ame si-m iken iki be, ame si unde amam.

²⁸ Asiti afu a tu ande mae ifaen mbe itsong atang re, afu u twenji uten wu a.” Awu ri baa, “Iyee, ame a tu ande mae ifaen mbe itsong atang, ame u twenji-m uten wu be.”

²⁹ Cwucwo, Ibrahim rang baa, “Asiti aba a si nyáng ande mae ifaen re?” Awu ri baa, “Ikyaen ande mae ifaen ti som usom ti kubenti, ame u twenji-m uten wu be.”

³⁰ Ibrahim jwam baa, “Itsekuru ā ndembeb-wu utob be, ame u ri kyi ira. Asiti afu a tu ande rijweta amam re.” Awu ri baa, “Ame u twenji-m uten wu be, asiti ame a tu ande rijweta atang.”

³¹ Ibrahim ri baa, “Itsekuru, ame ko-m ti m tsi uwe-fu, u ri ira be. Ama afu a tu ande rikom amam re?” Awu ri baa, “Ikyaen ande rikom ti som usom ti kubenti, ame u twen mbub-m uten wu be.”

³² Ibrahim ri baa, “Itsekuru ā ndembeb-wu utob be. Ame u ri ira ti ricwunnkyi. Afu a tu nyáng ande rijwe atang amam re?” Awu ri baa, “Ikyaen ande rijwe ti som usom ti kubenti, ame u twen mbub-m uten wu be.”

³³ Kiye ti Yaweh tsag tag akaen te Ibrahim, awu ye ikyin ru-wu. Ibrahim ama kafe ru yi kununn.