Kucangtsi 16 - Kutsingken Ira Rimam ti Saen Kyag

Itimbae Ishimayel

¹ Saraya, uwa Ibram mbae-wu umbae be. Awu site upyi-wu ti unda, unda Ejib ti rinyi-wu si Hagar.

² Ikyaen yine, Saraya ri te Ibram baa, “Yaweh nda-wu ame ti m na mbae umbae be. Ru ka nae te upyi-m, iki be ame u tu umbae ruye uwog-wu.” Ibram cwe kumyae Saraya.

³ Isim ti Ibram som Kanana ka pu wu asang rijwe, Saraya pu Hagar, upyi-wu, unda Ejib baen Ibram.

⁴ Awu nae te Hagar, ama awu kyaen rishwu. Ti Hagar nung pu wu ti awu site rishwu, awu saesi Saraya, unda ti kununn-wu.

⁵ Ama Saraya ri te Ibram baa, “Riraen ta risu-fu ikyaen ti, ame pu upyi-m na fu, ama ti awu nung baa, awu na site rishwu, awu saesi m, afu mbub-fu unju be. Yaweh ti u taen rikwén yine kutampwa m te fu.”

Hagar Ter Nwunn Uwog Saraya

⁶ Ibram ri te Saraya baa, “Nung! Upyi-fu ta kujwo-fu. Nde te wu iken ti afu kab baa, ayi na u nyang uwae-fu.” Tiri Saraya nde Hagar ira beb-beb-beb, ama Hagar ter nwunn uwog-wu.

⁷ Atom Yaweh ba tu Hagar uwae kutur kuka ti ta fifer te isatsub iki ti ta fengo ti ku ru yi uten ti Shur.

⁸ Atom wu ri baa, “Hagar, upyi Saraya, afu ru aka ba? Ama afu ku ru-fu yi aka?” Awu ri te atom wu baa, “Ame ku ter Saraya, unda ti kununn-m.”

⁹ Ama Atom Yaweh wu ri te wu baa, “Kafe ru ti uwog unda ti kununn-fu awu, ti fu ka nae risu riben na wu.”

¹⁰ Atom wu ri kyi baa, “Ame u nda rishi-fu u jwunn, unde u pwen tag-wu aba be.”

¹¹ Atom wu ri te kyi wu baa, “Tine afu site rishwu, afu u mbae umbae ti urom. Fa rinyi-wu baa, Ishimayel, ikyaen ti, Yaweh nung pu wu rikaen-fu.

¹² Awu u kyangfa kyangfa pangma ibye kutur. Awu u tsi ukub te ande meme, ande ama u tsi ukub te wu. Awu u tsikunn ira unju ti sha ti ameinja-wu.”

¹³ Ama Hagar fa rinyi Yaweh ti ri ira te wu baa, “El-Royi,” ti imbyi-yi baa, “Rimam ti ku sae m.” Ikyaen ti awu ri baa, “Ame sae Rimam te ayib ama u cwu-m be.”

¹⁴ Sa ti kiye wu ba sang tine, rinyi ribung wu si Ribung Lahai Royi. Ribung wu ta kutampwa Kadeshi ti Bered.

¹⁵ Hagar mbae umbae ti urom na Ibram, ama Ibram fa rinyi wu baa, Ishimayel.

¹⁶ Kiye wu, Ibram site asang mae inje mbe itsongnjo (86).