Kucangtsi 14 - Kutsingken Ira Rimam ti Saen Kyag

Ibram Rwae-mbe Loti Ajwo Abikwe Inje

¹ Kiye na Amrafel Ukwe na Babila, ti Ariyoki Ukwe na Elasar, ti Kedor-lawomer Ukwe na Elam, ti Tidal Ukwe na Goyim,

² akwe inje bane funn atso, u pu rika kunn akwe itsong iki, ti si Bera Ukwe na Sodom, ti Birisha Ukwe na Gomora, ti Shinab Ukwe na Adima, ti Shemeber Ukwe na Zeboyim, ti Ukwe na Bela ti si Zowar tine.

³ Meme akwe itsong bane byir akyirten-ba yi kubxab na Sidim ti si Uyinn Rinwaen tine.

⁴ Asang rijwe asu ifaen ti abikwe itsong bane ta imbyi Kedor-lawomer, ama uwae usang ti rijwe asu ita, aba ndub ndembeb.

⁵ Kusang ti rijwe asu inje, Kedor-lawomer ti akwe ti ta isim-wu, funn atso. Aba ka tā ande ti Refa ti ta uwae uten ti Ashiteroti-karnayim rika ama u ci ra ba, kwer ti ande ti Zuzim ti ta uwae uten ti Ham, ti ande ti Mba-Emi ti ta uwae uten ti Shave-kiriyatayim,

⁶ ti ande ti Hori ti ta rikwen Seyir, ka sang ti El-paran ti ta fifer ti kutur kuka.

⁷ Ama aba kafe ru ka sang En-mispat ti si Kadeshi, u ci tag uten uten na ande ti Amaleki, fa ti ande ti Amor ti nae Hazazon-tamar meme.

⁸ Ama Ukwe Sodom ti Ukwe Gomora ti Ukwe Adima ti Ukwe Zeboyim ti ana Bela ti si Zowar, nwunn ru yi kubxab na Sidim ti a ka ta rika

⁹ te Ukwe Kedor-lawomer ana Elam ti abikwe ti ta te wu, ti si Tidal Ukwe na Goyim, ti Amrafel Ukwe na Shinar (Babila), ti Ariyoki Ukwe Elasar. Abikwe inje bane ti ta rika te abikwe itsong bane.

¹⁰ Kubxab na Sidim munn ti akwae kindob koltai ama ti abikwe Sodom ti Gomora ti akyirten-ba ter ku ru, ariki kaensi uwae atang, aba ti tsitsi ama ter tso yi utaen rikwen.

¹¹ Kedor-lawomer ti akwe ita ti ta te wu su tag rifunn ande ti Sodom ti Gomora ti wuci-ba meme ru.

¹² Aba ye Loti, uyin Ibram ti ta Sodom, ti rifunn-wu meme ru te yi.

¹³ Ama unde iki ter nwang ba ri te Ibram Mbaibrane iken yi ti nde. Kiye wu, Ibram nae fer ituku tiyang na Mamre urae Amor, inja Eshikol ti Aner. Aba ren imbyi ti Ibram.

¹⁴ Kiye ti Ibram fxen ti aba na ye ra pu ba uyin-wu, awu kunn funn arom arom ti ku ta rika ti ta te wu ka ukob ita ti rijwe asu itsongta (318), u rwae tsa abikwe inje bane ka sang ti Dan.

¹⁵ Utitang wu, Ibram kata ande-wu kumbub kumbub, u pu rika kunn tu ba, u rwae tsa ba ka sang ti Hoba ti ta isku Damasiku.

¹⁶ Awu shirmbe tag meme rifunn ti aba pu, ti Loti ti rifunn-wu, ti anda, ti ande ti tsitsi ti aba ye ru meme.

Melkizedeg Wae Ira na Ibram

¹⁷ Isim ti Ibram ci pu wu rika risu Ukwe Kedor-lawomer ti abikwe ti jwùnn imbyi te wu ama u kafe ku ba, Ukwe na Sodom ru ye ba tu Ibram yi Kubxab na Shave ti a ku kunn wu tine baa, Kubxab na ukwe.

¹⁸ Ama Melkizedeg, Ukwe na Salem, ru ye ba ti buredi ti ambyi anam. Awu si kukwen Rimam ti skeb titag.

¹⁹ Awu wae itinyang na Ibram, u ri baa, “Rimam ti skeb titag, ti kyae apupwen ti riben ā nde Ibram itinyang!

²⁰ Itinyang ā si ana Rimam ti skeb titag ti sa ande rika-fu na fu kujwo.” Ama Ibram pu na wu kinjo uwae iken rijwe ana meme iken ti awu ci uwog rika yi.

²¹ Ukwe na Sodom ri te Ibram baa, “Pu ande-m na m, ti fu pu-fu meme rifunn yi ti ani ci mbe.”

²² Ibram ri te Ukwe na Sodom baa, “Ame ben uben yi rinyi Yaweh, Rimam ti skeb titag, ti mam apupwen ti riben

²³ baa, ame na u mbe-m iken iki ko kitub ko iji kupwa kufxen ti si ana-fu be, bara be uwe ike afu u ba ri baa, afu ti na nda m rifunn.

²⁴ Ame u cwe u mbe-m iken iki be, se iken ti ande-m sa ci mam pu ba. Amaa, pu na Aner ti Eshikol ti Mamre kutunn-ba, ikyaen ti aba putsa m.”