Kucangtsi 13 - Kutsingken Ira Rimam ti Saen Kyag

Ibram ti Loti Kata Atso

¹ Ibram ti uwa-wu ti Loti nwunn Ejib u tso yi uten Negeb uwae uten Kanana, ti meme iken ti awu site.

² Kiye wune, Ibram site rifunn ko timambe. Awu site asinn ti azurfa ti zinariya.

³ Ama awu nwunn Negeb atang u tso yi Betel, u ka sang uwog ti awu nae atang kucang kutampwa Betel ti uten Ai,

⁴ uwog ti awu mbye kuta atang kucang. Ama awu fen Yaweh atang cwucwo.

⁵ Loti ti putsa Ibram ru ama site iwen ti indag, ti ande kununn-wu.

⁶ Ikyaen yine, riben uwog ti aba som atang, ko-wu ti aba u som tu tetso cwucwo be, ikyaen na asinn-ba ti iken ti aba site meme.

⁷ Tiri unju ti kub sang kutampwa ande ti ku shi asinn na Ibram ti ana Loti. Kiye wu, ande ti Kanana ti ande ti Perizi nae ti riben atang.

⁸ Ibram ri te Loti baa, “Unju-ukub ā ta-yi kutampwa-m te fu, ko kutampwa ande imbyi-ti be, ikyaen ti, ati si ure atso.

⁹ Sae itab ti nae ru ne. Ayi nyangskeb ti ati ā kata atso uwae kujim. Tsab uwog ti nyang uwae-fu. Asiti afu a ru kujwo ife, ame u ru kujwo rici, afu a ru kujwo rici ame ama, u ru kujwo ife.”

¹⁰ Loti sae ayib pakob u sae itab riben ti Yordan ti ambyi ta atang pangma ufang Yaweh, u si pangma uten Ejib ti nae ru yi uwe ti Zowar. (Ayine nde pu yi titawe Rimam twen mbub uten ti Sodom ti Gomora).

¹¹ Ama Loti tsab sa kubxab na Yordan ti ta usir ti kiskinn, u ka som atang. Ayine si fengo ti aba kata atso.

¹² Ibram som ti Kanana, Loti ama nae kutampwa uten uten yi ti ta uwae kubxab na Yordan, ama u sur afug-wu fer ti Sodom.

¹³ Ande ti Sodom beb, u nde Yaweh ikentitibi ko timambe.

Ibram ti Saraya Ru Ka Som Hebiron

¹⁴ Isim ti Loti kata pu wu te Ibram, Yaweh ri te Ibram baa, “Sae ayib-fu tso ti fu nung, sae tso isku ti isi, ayib usir ti kiskinn ti ti ureb meme.

¹⁵ Meme uwog ti ayib-fu a sae ka tsikunn atang, ame u nda fu ti rishi-fu, ti aba u som kunn atang ru fife yi uwe.

¹⁶ Ame u nda itso-fu u jwunn pangma isa riben, asiti unde a pwen tu isa riben, aba u pwen tu rishi-fu ama.

¹⁷ Nwunn, ti baen riben wune, sae rikob-wu ti riyaen-wu ikyaen ti ame u sa wu na fu.”

¹⁸ Tiri, Ibram sub afug-wu nwunn ru ka nae fer ituku tiyang na Mamre ti ta Hebiron. Atang, awu mbye kuta u fen Yaweh.